Gwamnan APC Ya Ayyana Hutun Kwanaki 5, Ya Fadi Dalili

• Gwamnan jihar Neja, Mohammed Umar Bago ya bayar da hutun kwanaki biyar domin rabon kayan tallafi a watan Ramadan
• Mai girma Bago ya ce hutun zai kasance ne daga ranar Litinin, 18 ga watan Maris har zuwa ranar Juma'a, 22 ga watan Maris
• Gwamnan na Neja ya bayyana cewa kayan tallafin za a raba su ne domin rage raɗaɗin halin ƙuncin da ake ciki a ƙasar nan

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Minna, jihar Neja - Gwamna Mohammed Umar Bago na jihar Neja ya ayyana ranar Litinin, 18 ga Maris zuwa Juma’a 22 ga Maris a matsayin ranakun hutu.

Umar Bago ya ce hutun na rarraba kayan tallafi ne da ciyarwa a watan Ramadan.

Kara karanta wannan

Tinubu ya canza tunani, ya janye sunan matar da ya naɗa a babban banki CBN, An gano dalili

Hakan na ƙunshe ne cikin wata sanarwa mai ɗauke da sa hannun kwamishiniyar yaɗa labarai, Honorabul Binta Mamman, cewar rahoton jaridar The Nation.

Meyasa Gwamna Bago ya bada hutu a Neja?

Kwamishiniyar ta ce an bada hutun ne domin ba ma’aikatan gwamnati da masu riƙe da muƙaman siyasa damar sa idon kan yadda za a yi rabon a ƙananan hukumominsu.

Gwamnan ya bayyana cewa za a raba kayayyakin tallafin a faɗin jihar ta yankin Arewa ta Tsakiya domin rage raɗaɗin taɓarɓarewar tattalin arziƙin da ake fama da ita a ƙasar nan.

Mamman ta bukaci jama’a da su baiwa jami’ai haɗin kai tare da kasancewa cikin tsari a duk wuraren yin rabon da ciyarwar domin gudanar da aikin cikin nasara.

Ta shawarci ma’aikatan gwamnati da masu riƙe da muƙaman siyasa da su ɗauki wannan aiki a matsayin lokacin yi wa jama'a hidima.

Kara karanta wannan

Tsadar rayuwa: Gwamnatin Tinubu na bada tallafin N500,000 ga matasa? Gaskiya ta bayyana

Bago da hutun rabon abinci a Neja

Wannan dai ba shi ne karon farko da Gwamna Bago ya ayyana hutu ba domin rabon kayan abinci a jihar.

A baya gwamnati ta ayyana hutun kwanaki uku a watan Satumban 2023, jaridar The Punch ta ruwaito.

Ma'aikata sun samu ƙarin albashi a Neja

A wani labarin kuma, kun ji cewa gwamnan jihar Neja, Mohammed Umaru Bago ya shirya faranta ran ma'aikata a jihar.

Gwamnan ya amince da bayar da tallafin albashin N20,000 ga dukkanin ma'aikatan gwamnatin jihar.

Asali: Legit.ng