Innalillahi: 'Yan bindiga sun dasa bama-bamai a ofishin 'yan sanda, sun saki masu laifi
- Wasu 'yan bindiga sun farmaki wani yankin jihar Imo, inda suka lalata ofishin 'yan sandan yankin
- Hakazalika, sun saki mutane da dama da aka tsare a ofishin 'yan sanda bayan aikata mummunan barna
- Ya zuwa yanzu, kakakin rundunar 'yan sandan jihar ya ce batun bai zo gabansa ba, amma dai yana jiran bayanai
Jihar Imo - A ranar Alhamis ne wasu ‘yan bindiga suka dasa bam a hedikwatar ‘yan sandan karamar hukumar Ideato ta Kudu da ke Dikenafai a jihar Imo.
Sun saki mutanen da aka tsare a ofishin na 'yan sanda, inji rahoton jaridar The Nation.
Maharan wadanda suka zo da yawa sun banka wa wani bangare na ofishin ‘yan sandan wuta da bama-bamai.
Asali: UGC
Bama-baman sun lalata ofishin gudanarwa, ofishin jami’an ‘yan sanda na shiyya, da kuma ofishin karbar baki.
Shin kana da labarin da ka/ki ke son an wallafa ma ka/ki? Ka tuntubemu a info@corp.legit.ng!
Shugaban kwamitin riko na karamar hukumar Ideato ta kudu Fasto Bede Ikeaka ya bayyana kaduwarsa da faruwar wannan mummunan lamari.
Kakakin rundunar ‘yan sandan Imo, Michael Abattam, ya ce har yanzu ba a yi masa bayani kan harin ba.
Ya yi alkawarin ba da bayanai idan batun yazo gabansa.
An samu labarin cewa wasu ‘yan banga na yankin sun kama wasu daga cikin wadanda ake tsare da su da suka tsere.
A wani rahoton na P.M News, ‘yan bindigar da suka zo da yawa sun lalata ginin da bama-bamai.
'Yan bindiga sun kone kauyuka 5 kurmus, sun hallaka mutane a Zamfara
A wani labarin, daruruwan mazauna kauyuka biyar ne a kananan hukumomin Anka da Bukkuyum na jihar Zamfara suke ta tururuwa zuwa cikin garin Anka bayan da ‘yan bindiga suka kashe mutane da dama a kauyukansu.
Majiyoyi da suka zanta da jaridar Premium Times sun ce har yanzu ba a tantance adadin wadanda aka kashe ba.
Wani lauya wanda kuma mamba ne a kungiyar agaji ta Zamfara, ya ce ya ga yawancin mutanen kauyen da suka rasa matsugunai a sakateriyar karamar hukumar Anka.
Asali: Legit.ng
