Yajin-aikin ASUU ya zaburar da Dalibi, ya koma neman na-kai maimakon zaman banza

• Abdussalam Mohammed Chindo wani dalibi ne da ASUU ta jawo karatunsa ya tsaya cak a Jami’a
• A maimakon ya cigaba da zama haka kurum, Chindo ya fara hada ‘Bleach’ yana saidawa a robobi
• Tun tuni kungiyar ASUU ta ke yajin-aiki saboda zargin Gwamnati ta saba alkawarun da aka yi masu

Gombe - Wani matashi mai suna Abdussalam Mohammed Chindo yana cikin wadanda karatunsu ya tsaya a dalilin yajin-aikin malaman jami’a.

Malam Abdussalam Mohammed Chindo mutumin jihar Gombe ne wanda yake karatun ilmin Injiniya a jami’ar Ahmadu Bello a garin Zaria.

Ganin har yanzu ba a cin ma matsaya tsakanin kungiyar ASUU da gwamnatin tarayya ba, sai Abdussalam Chindo ya nemawa kansa mafita.

Kamar yadda ya bayyana a shafinsa na Twitter a ranar Litinin 20 ga watan Yuni 2022, ya fara hada sinadarin ‘Bleach’ mai fitar da kazanta.

Kara karanta wannan

Buhari: Tausayin Talaka ya sa na ki biyewa masu bada shawarar janye tallafin man fetur

A cewar Chindo ya koyi ilmin hada wannan sinadarin ne a makaranta, don haka ya fara wannan sana’a da za ta rika kawo masa abin kashewa.

“Bayan tuntuba da nazari a matsayin dalibin aji uku a sashen karantar ilmin Injiniyan sinadarai a jami’ar ABU Zaria, na fara taba kasuwanci.”

“Ina hada Bleach a dalilin yajin-aikin kungiyar ASUU. Ina amfani da abin da na koya a makaranta a zahiri. Ku yi mani ciniki; duk kwalba N350.”

- Abdussalam Mohammed Chindo

Yadda aka fara ThinkBig Bleach

Legit.ng Hausa ta zanta da matashin a ranar Talata, ya kuma tabbatar mata da cewa ya koyi wannan sana’a ne a wajen aikin SWEP a bara.

Chindo ya ce saboda karancin jari, sai ya fara da kwalabe 50 domin ganin yadda abin zai kankama.

Dalibin mai shekara 22 yake cewa daga baya ya fahimci za a iya amfani da leda wajen kulla sinadarin domin saidawa masu bukatar kadan.

Kara karanta wannan

Yanzu-Yanzu: Bayan jinya a Landan, an sallami tsohon shugaban Najeriya a asibiti

Matsalar da wannan Bawan Allah zai iya fuskanta wajen aikinsa shi ne tsadar leda. Mutum yana bukatar kudi masu kauri kafin ya iya farawa.

Tanadi katin zabe

A bangare guda, ku na da labari, Sheikh Muhammad Mansur Ibrahim Sokoto ya yi kira da babbar murya a kan mallakar katin zabe watau PVC.

Farfesa Muhammad Mansur Ibrahim Sokoto ya yi amfani da shafinsa na Twitter a kwanakin baya, ya ankarar da jama'a kan muhimmancin zabe.

Asali: Legit.ng