Hamshakan ‘Yan adawan siyasa 23 da za su gwabza a zaben shugabannin APC a gobe

• FCT, Abuja - A ranar Asabar dinnan, 26 ga watan Maris 2022 ne za a san su wanene za su rike mukamai a matakin jam’iyyar APC mai mulki na kasa
• Daily Trust ta bi yadda wannan zaben shugabannin zai kasance, ta kawo wasu gawurtattun ‘yan adawan siyasa da za su nunawa junansun karfinsu
• Daga sabanin 'Yan G7 da Ganduje zuwa tsohon fadan Rotimi Amaechi da Magnus Abe, mun kawo duk wasu rigingimu da ba a gama shawo kansu ba

1. Lai v Abdulrazaq

An dade ana rikici tsakanin Ministan yada labarai da al’adu, Lai Mohammed da gwamnan jihar Kwara, Abdulrazaq Abdulrahman a gidan jam’iyyar APC.

2. Amaechi v Abe

Ministan sufuri na kasa, Rotimi Amaechi da Sanata Magnus Abe su na cikin wadanda za sus an matsayarsu a jam’iyyar APC bayan zaben da za ayi a gobe.

3. Aregebsola v Oyetola

Jaridar ta kawo sabanin Ogbeni Rauf Aregbesola da magajinsa, gwamna Gboyega Oyetola a cikin daya daga cikin mafi munin gwabzawar da za ayi a zaben APC.

4. Ganduje v Shekarau

Ba sabon labari ba ne cewa ba a jituwa Sanata Ibrahim Shekarau da Gwamna Abdullahi Umar Ganduje. Zaben shugabannin zai nuna wanene zai samu iko da Kano.

5. Amosun v Abiodun

Kamar a jihar Ondo, babu zaman lafiya tsakanin kusoshin APC, Sanata Ibikunle Amosun da wanda ya gaje shi a Ondo, Dapo Abiodun, ‘yan siyasar za su gwabza.

6. Yari v Marafa v Matawalle

Daga cikin rikicin cikin gidan da suka yi kamari a APC akwai na Abdulaziz Yari da Kabiru Matafa da kuma Gwamna Bello Matawalle wanda ya shigo APC daga baya.

7. Wammako v Gada

Legit.ng Hausa ta fahimci rigimar Sanata Aliyu Magatakarda Wammako da Sanata Abubakar Gada yana cikin wadanda har yanzu ba a shawo kansu a APC ba.

8. Aleiro v Malami

Ana zargin har zuwa yanzu babu zaman lafiya tsakanin Sanata Mohammed Adamu Aleiro da Abubakar Malami wanda ake tunanin ya tare da gwamna Atiku Bagudu.

9. Ngige v Uba

Zaben gwamnan da aka yi a Anambra ya nuna gidan jam’iyyar APC ba a dunkule yake ba. A zaben shugabannin, Dr. Chris Ngige zai nemi ya nunawa Ifeanyi Uba iyakarsa.

10. Keyamo v Omo-Agege

Mataimakin shugaban majalisar dattawa, Ovie Omo Agege da karamin Ministan kwadago, Festus Keyamo SAN za su so su samu iko da kujerun NWC na yankinsu a APC.

11. Okorocha v Uzodinma

Ba zai yiwu ayi batun takun sakar da ake yi a APC ba tare da kawo Sanata Rochas Okorocha da gwamnansa, Hope Uzodinma ba. Za su kara da juna a zaben shugabannin.

Rikicin APC Kwara

Kwanakin baya kun ji labari cewa Alhaji Lai Mohammed da kuma Sanata Gbemisola Saraki sun hurowa gwamna AbdulRahman AbdulRazaq wuta a APC taKwara.

Bashir Bolarinwa shi ne ke jagorantar bangaren ‘yan tawaren da ke tare da Lai a reshen jihar Kwara yayin da Fagbemi Adeniran yake da goyon bayan gwamna.

Asali: Legit.ng