An Samu Kudi: Kamfanin NNPCL Ya Bayyana Ribar Tiriliyoyin da Ya Samu a 2025
- NNPCL ta sanar da samun ribar Naira tiriliyan 7.2 bayan haraji a shekarar 2025, daga cikin kudaden shiga da suka kai Naira tiriliyan 34.5
- Kamfanin ya ce ribar ta karu da sama da kashi 30 cikin 100 idan aka kwatanta da shekarar 2024, inda ya samu Naira tiriliyan 5.76
- NNPCL ta kuma bayyana cewa ta tura Naira tiriliyan 22.3 ga Gwamnatin Tarayya a matsayin haraji, kudin sarauta da sauran kudaden da ta biya
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.
Abuja - Kamfanin Nigerian National Petroleum Company Limited (NNPCL) ya ce ya samu ribar Naira tiriliyan 7.2 bayan cire haraji a shekarar 2025.
Babban Daraktan Rukunin Kamfanin (GCEO) na NNPCL, Injiniya Bashir Bayo Ojulari, ya bayyana hakan ne a ranar Talata yayin gabatar da bayanan binciken kudi na shekarar 2025.
Source: Getty Images
Ojulari ya ce ribar ta samu ne daga kudaden shiga da kamfanin ya samar, wadanda suka kai Naira tiriliyan 34.5 a shekarar, cewar Daily Trust.
Bambanci a ribar da aka samu a 2024
Shugaban ya ce ribar ta wakilci karin sama da kashi 30 cikin 100 idan aka kwatanta da ribar da aka samu a shekarar 2024.
Sai dai, jimillar kudaden shigar kamfanin ta ragu da Naira tiriliyan 10.6 daga Naira tiriliyan 45.1 da aka samu a shekarar 2025.
Ya ce NNPCL ta biya Gwamnatin Tarayya haraji, kudin sarauta da sauran kudaden da suka kai Naira tiriliyan 22.3.
Ya kara da cewa kamfanin ya samar da matsakaicin ganga miliyan 1.77 na danyen mai a kowace rana, da kuma kafufin iskar gas biliyan 7.2 a kowace rana.
Source: Facebook
Yadda NNPCL ya samu nasarar tara maƙudan kudi
An dai tuna cewa kamfanin NNPCL ya samu ribar Naira tiriliyan 5.76 a shekarar 2024 wanda ya nuna bai kai abin da ya samar a 2025 ba, cewar Daily Post.
Ojulari ya ce:
“Abin da muka cimma a shekarar 2025 ya nuna irin abin da tsayayyen aiki cikin tsari da kuma ƙwararrun ma’aikata za su iya samarwa.
“Mun na ƙara ƙarfafa kudaden shigar kamfanin, ƙara yawan man da muke samarwa, tare da saka hannun jari ga ma’aikata da kadarorin da za su taimaka wajen dorewar daraja ga masu hannun jari, al’ummomi da al’ummar Nijeriya.”
Ya kara da cewa kamfanin ya samar da matsakaicin ganga miliyan 1.77 na danyen mai a kowace rana, da kuma kafufin iskar gas biliyan 7.2 a kowace rana.
NNPCL ya zuba biliyoyi a asusun gwamnati
A baya, an ji cewa NNPCL ya tura Naira tiriliyan 6.286 zuwa Asusun Tarayya tsakanin Janairu da Yunin 2026, ƙasa da rabin abin da ta biya a shekarar 2025.
Kamfanin ya samu ribar Naira biliyan 535 a watan Yuni duk da ɗan raguwar yawan ɗanyen mai da aka haƙo.
Ayyukan bututun iskar gas na OB3 da AKK sun kusa kammala, inda ake sa ran fara samar da iskar gas nan ba da jimawa ba.
Asali: Legit.ng
