Wani mai jinyar karaya ya yi karfin-hali, ya sace motar daukar marasa lafiya a jihar Kano

• Wani mai jinyar daurin karaya a kafa ya sace motar asibiti a wani kauye a garin Dawakin Tofa, Kano
• Jami’an ‘yan sanda sun gano wannan motar daukar marasa lafiya da aka dauke a Babura, jihar Jigawa
• Bincike ya nuna cewa mutumin da ya aikata wannan danyen aiki dan asalin garin Daura ne, jihar Katsina

Kano - An samu labarin wani mai jinya da ya sace motar asibiti. Abin ban mamakin shi ne wannan maras lafiya ya na fama da daurin karaya a kafa.

Jaridar Aminiya ta rahoto cewa wannan abin ban mamaki da takaici ya faru ne a garin Kano.

‘Yan Sanda sun yi nasarar damke wannan barawo da ya sace motar daukar marasa lafiya a kauyen Takwasa, karamar hukumar Babura, jihar Jigawa.

Jami’an ‘yan sandan Najeriya sun ce an gano wannan mota da aka dauke a jihar Kano a can kauyen Takwasa, a hannun wannan mutum da ya karye.

Kara karanta wannan

Muryar jami'in EFCC ya na sanar da yadda Malami ke kange masu cin rashawa ta bayyana

Ana zargin wannan mutumi da sungume motar daukar marasa lafiya da gawa, tattare da duk wasu magungunan da ake ajiyewa a cikinta saboda larura.

Jawabin kakakin 'yan sanda

Mai magana da yawun bakin Jami’an ‘yan sanda na reshen Jigawa, ASP Lawan Shi’isu, ya shaidawa manema labarai wannan a ranar Talatar nan.

“’Yan sanda sun gano motar a kauyen Takwasa, a Karamar Hukumar Babura, Jihar Jigawa, a hannun wani mutum ‘dan asalin Karamar Hukumar Daura ta Jihar Katsina, mai muguwar karaya a kafarsa.”

“An yi sanadiyyar gano motar ne bayan samun rahoton sace motar daukar marasa lafiyan kirar ‘Hummer Bus’ mara lamba a jikinta - da magungunan cikinta, mallakin Karamar Hukumar Ungogo, Kano.”

- ASP Lawan Shi’isu

Yadda aka gano barawon motar - NPF

A cewar ASP Lawan Shi’isu, an dauke wannan mota ne a wani kauye da ake kira Kanya Hora a Karamar Hukumar Dawakin Tofa, Jihar Kano, kwanaki.

Kara karanta wannan

Sanatan APC ya rabawa 'yan mazabarsa motoci 50, babura 500 da kayan gona a tashi daya

Bayan samun rahoton satar, sai ‘yan sandan da ke garin Babura su ka fara bincike domin gano inda motar ta shiga, ba a je ko ina ba kuwa sai aka gano ta.

An gano motar ne a ranar Litinin, 11 ga watan Disamba, 2021. Yanzu haka ana cigaba da gudanar da bincike domin a iya kai wannan mutumi zuwa kotu.

'Danuwan Rabiu Musa Kwankwaso ya rasu

A makon nan aka ji cewa Inuwa Musa Kwankwaso ya rasu. Inuwa Musa ya yi fama da rashin lafiya kafin Allah ya dauki rayuwarsa a asibitin Aminu Kano.

Kamar dai yadda Musulmai suka saba, tuni an birne Marigayin a kauyensu na Kwankwaso a Garin Madobi, a jihar Kano inda dinbin mutane suka halarta.

Asali: Legit.ng