Kwamishinan lafiya a jihar Legas ya yi karin bayani a kan mutuwar Ajimobi

Kwamishinan lafiya a jihar Legas ya yi karin bayani a kan mutuwar Ajimobi

Farfesa Akin Abayomi, kwamishinan lafiya na jihar Legas, ya yi karin bayani a kan jinya da mutuwar tsohon gwamnan jihar Oyo, Abiola Ajimobi, a wani asibit mai zaman kansa a Legas.

A cikin wani takaitaccen sako da ya wallafa a shafinsa na manhajar Tuwita, Farfesa Abayomi ya ce Ajimobi ya mutu ne sakamakon daina aikin da halittu da dama a jikinsa suka yi bayan kwayar cutar korona ta harbe shi.

Ajimobi ya rasu a ranar Alhamis 25 ga watan Yuni, shekarar 2020 sakamakon kamuwa da cutar da ake zargin COVID-19 ce; wato coronavirus.

Tsohon gwamnan ya mutu ne yana da shekaru 70 bayan fama da muguwar cutar nan ta Coronavirus.

Ajimobi, ya yi gwamnan jihar Oyo tsakanin shekarar 2011 da 2019, kafin daga baya aka nadashi mataimakin shugaban jam'iyyar All Progressives Congress APC na yankin kudu.

Tsohon gwamnan ya yi jinya ne a asibitin First Cardiologist and Cardiovascular Consultants Hospital, dake Legas ranar 2 ga watan Yuni, 2020.

DUBA WANNAN: Abun tausayi: Bidiyon masu kukan mutuwar tsohon gwamna Ajimobi a gidansa na Ibadan

Daga baya ya warke daga cutar Koronar amma duk da haka bai daina jinya ba. An kwantar da shi tare da matarsa, Florence, a asibitin amma ta samu sauki kuma aka sallameta.

Ga wasu muhimman abubuwa a kan marigayi Ajimobi:

1. An haifi Abiola Ajimobi ne a ranar 16 ga watan Disamban shekarar 1949 a Oja-Iba a Ibadan.

2. Kakansa basarake na Sobaloju na Ibadan. Mahaifinsa, Pa Ajimobi, shima dan majalisa ne a tsohuwar shiyar Yamma kuma kawunsa, Hon. N.A. Ajimobi tsohon ministan Ayyuka da Sufuri ne a shiyar ta Yamma.

3. Yayi karatunsa na frimari a Saint Patricks School, Oke-Padre kuma ya kammala frimari a City Council Primary School Aperin.

Ya yi karatun sakandare a Lagelu Grammar School. Yana cikin dalibai masu hazaka wurin wasanni kamar kwallon kafa, guje-guje da sauransu.

4. Ajimobi ya yi karatun digiri na farko a State University of New York a Buffalo a Amurka. Ya yi digirinsa na biyu a Governors State University, Illinois.

5. Ajimobi ya auri Florence Ajimobi a shekarar 1980 kuma sun haifi yara biyar. Diyarsa ta farko Abisola Kola-Daisi 'yar kasuwa ce wacce ta kafa kamfanin Florence H Luxury.

6. A 2003, Ajimobi ya zama Sanata a Najeriya. Ya rike mukamin mataimakin shugaban marasa rinjaye.

Domin sauke manhajar labaran Legit.ng a wayar ku ta hannu, latsa wannan rubutu na kasa:

https://play.google.com/store/apps/details?id=com.naij.hausa

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Idan kuna da wata shawara ko bukatar bamu labari,

Tuntube mu a: labaranhausa@corp.legit.ng

Source: Legit

Mailfire view pixel