Buhari: Sanatoci su na kokarin hada-kai domin gyara dokar zabe da karfi da yaji ta Majalisa

Buhari: Sanatoci su na kokarin hada-kai domin gyara dokar zabe da karfi da yaji ta Majalisa

  • Shugaban kasa Muhammadu Buhari ya ki amincewa da kudirin yi wa dokar zabe kwaskwarima
  • Wasu Sanatoci sun nuna hakan ba za ta sabu ba, sun ce dole za su warware matakin da Buhari ya dauka
  • Dokar Najeriya ta ba ‘Yan Majalisar tarayya dama su sha gaban shugaban kasa idan suka samu rinjaye

FCT, Abuja - A ranar Talata, 21 ga watan Disamba, 2021, Sanatoci suka fara yunkurin warware matakin da shugaban kasa Muhammadu Buhari ya dauka.

Daily Trust tace ‘yan majalisa su na so ayi wa dokar zabe garambawul bayan shugaban Najeriyar ya ki amincewa da kudirin da zai wajabta zaben ‘yar tinke.

‘Yan majalisar dattawan sun tado wannan magana ne yayin da suka yi zaman farko a makon nan. Da alamun za su daga hutunsu saboda wannan magana.

Kara karanta wannan

Sanatoci sun shiga ganawar sirri kan sabon kundin zabe 2021 da Buhari ya ki sa hannu

Wasu Sanatoci da-dama sun bijiro da maganar dokar zaben, inda suka bada shawarar cewa ‘yan majalisa su yi amfani da karfinsu, su shigo da wannan doka.

Me tsarin mulki yace?

Sashe na 58 (5) na kundin tsarin mulkin shekarar 1999 ya ba ‘yan majalisa damar su iya yin watsi da matakin da shugaban kasa ya dauka, su shigo da wata doka.

Sai dai babu tabbacin cewa masu wannan shiri za su yi nasara domin shugaban kasar ya na tare da kusan duka Sanatocin jam’iyyar APC da ke majalisar dattawa.

Majalisa
'Yan Majalisar Dattawa Hoto: @NgrSenate
Asali: Facebook

The Guardian tace Sanata George Sekibo ya fara bijiro da wannan magana, yace ya kamata a tattauna a kan batun, kafin a fara maganar kasafin kudin 2022.

Sanatoci sun fara yin gayya

Sanatoci da yawa sun tabbatar da cewa sun fara neman sa hannun abokan aikinsu, domin su iya warware matakin da Mai girma Muhammadu Buhari ya dauka.

Kara karanta wannan

Yanzu-Yanzu: Shugaba Buhari ya tura wasika ga majalisa kan kudirin gyara kundin zabe

“A doka, mu na da karfin da za mu iya janye matakin da (Muhammadu Buhari) ya dauka. Wannan shi ne abin da sashe na 58 (4 & 5) na tsarin mulki yace.”
“Mun samu sa hannun Sanatoci 73 daga kowace jam’iyya domin dokar ta samu shiga. - Sanata Sekibo.

Abba Moro na tare da Sekibo, yace adadin masu goyon bayan hakan sun haura 80. Sanata Matthew Urhoghide yace majalisa ta taba yin haka a lokacin Obasanjo.

Majalisa ta karanta wasikar Buhari

A makon nan ne aka ji Muhammadu Buhari ya ki sa hannu kan sabuwar dokar zaben da majalisa ta amince da ita wadda za ta wajabta yin 'yar tinke wajen fitar da gwani.

Da ake muhawara a kan maganar kudirin zaben, wasu Sanatoci sun soki shugaban kasa Buhari, suka ce hujjojin da ya bada na kin rattaba hannu a kudirin ba su da karfi.

Asali: Legit.ng

Online view pixel