Duk da biyan kudin fansan N6m, masu garkuwa sun kashe yarinyar da suka sace a Kano
- Yarinya mai shekaru 5 a jihar Kano da aka sace a hanyarta ta dawowa daga Islamiyya ta mutu
- Kawunta Zubair Siraj ya bayyana cewa guba suka sanya mata a abinci bayan karbar kudin fansa
- An damkesu yayinda suke kokarin kara karban wani sabon kudin fansa karo na biyu
Kano - Duk da karban kudin fansa milyan shida (N6million), masu garkuwa da mutane sun hallaka Hanifa Abubakar, yarinya 'yar shekara biyar da suka sace a Kano.
Kawunta, Suraj Suleiman, wanda ya tabbatar da kisan yace sun samu gawarta cikin wata makaranta a unguwar Tudun Wadan jihar Kano, rahoton DailyNigerian.
A cewarsa, wanda ya saceta matarsa ya fara kaiwa yarinyar ta ajiye masa amma ta kiya.
Yace:
"Mutumin ya fara kai Hanifa wajen matarsa amma taki ajiye ta. Daga nan sai ya kai ta TudunWada inda yake da wata makaranta, sannan ya sanya maganin bera cikin shayi ya bata."
"Bayan ta mutu, masu garkuwan suka yi mata gunduwa-gunduwa sannan suka birneta cikin makarantar."
Shin kana da labarin da ka/ki ke son an wallafa ma ka/ki? Ka tuntubemu a info@corp.legit.ng!
Asali: UGC
An tattaro cewa an damke masu garkuwan a Zaria Road, Kano da daren jiya yayinda suke kokarin kara karban wani kudin fansa.
Lokacin da aka sace Hanifa
A ranar Asabar, 4 ga Disamba, 2021, kun ji cewa an sace wata yarinya ‘yar shekara biyar mai suna Hanifa Abubakar a unguwar Kawaji da ke Kano.
Masu garkuwa da mutane ne suka yi awon gaba da ita a cikin babur din dai-daita sahu yayin da suka yaudare ta da sunan rage hanya
Daily Nigerian ta tattaro cewa lamarin ya faru ne da karfe 5 na yamma lokacin da yarinyar da sauran yaran unguwar suke dawowa daga makarantar islamiyya.
Unguwar Kawaji a karamar hukumar Nassarawa na daya daga cikin unguwannin da ake fama da matsalar satar yara a Kano.
A cikin unguwar a baya, an yi garkuwa da Yusuf Nasiru dan shekara 9 a ranar 28 ga watan Disamba, 2020 bayan ya dawo daga makarantar Islamiyya da rana.
Asali: Legit.ng
