Da Gaske Gwamnatin Tinubu Ta Ciyo Bashin Naira Tiriliyan 120 cikin Shekaru 3

• Dada Olusegun ya yi magana kan ikirarin cewa Tinubu ya ci bashin Naira tiriliyan 120 cikin shekaru uku
• Ya bayyana cewa bashin da ba a saka cikin kundin hukuma ba da kuma sauyin farashin musayar kuɗi sun ƙara yawan bashin da aka nuna a takardu
• Fadar shugaban ƙasa ta ce bashin Najeriya ya ƙaru da dala biliyan 7.5 tsakanin Yuni 2023 da Yuni 2026, yayin da kuɗaɗen FAAC suka haura Naira tiriliyan 2.4

​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Fadar shugaban ƙasa ta yi watsi da ikirarin cewa Shugaba Bola Ahmed Tinubu ya ci bashin Naira tiriliyan 120 cikin shekaru uku, duk da cire tallafin man fetur.

Mataimaki na Musamman ga shugaban ƙasa kan harkokin yaɗa labarai a kafafen sada zumunta, Dada Olusegun, ya bayyana ikirarin a matsayin bayanan da ƙungiyoyin adawa ke yaɗawa domin yaudarar jama'a.

Kara karanta wannan

Abu ya gagara karewa: Gwamna Radda ya fadi yadda zai dakile matsalar tsaro

Hadimin shugaban kasar ya bayyana hakan ne a cikin wata sanarwa da ya wallafa a shafinsa na X ranar Lahadi, 8 ga watan Nuwamban 2026.

Ya ce ikirarin cewa shugabannin Najeriya 16 sun ci bashin Naira tiriliyan 46 cikin shekaru 63, amma gwamnatin Tinubu ta ci Naira tiriliyan 120 cikin shekaru uku, bai nuna cikakken yanayin bashin ƙasar ba.

Yadda aka ƙirƙiri alkaluman bashin

Olusegun ya bayyana cewa alkaluman Naira tiriliyan 46 da ake dangantawa da ƙarshen shekarar 2022 ba su haɗa da bashin Naira tiriliyan 22.7 da Babban Bankin Najeriya (CBN) ya bai wa gwamnati ta hanyar tsarin Ways and Means ba.

Ya ce ba a saka wannan bashin cikin kundin bayanan hukuma ba sai a watan Mayun 2023, duk da cewa an riga an ci bashin tun kafin lokacin.

Haka kuma, ya ce wasu ƙididdiga sun yi amfani da farashin musayar dala na Naira 448, duk da cewa a kasuwannin canjin kuɗi farashinta ya haura Naira 700.

Kara karanta wannan

Amaechi ya hango abin da zai haddasa yakin basasa a Najeriya ana batun zaben 2027

Olusegun ya ce haɗa farashin musayar kuɗi a watan Yunin 2023 ya sa adadin bashin da ake bin Najeriya a dala ya bayyana da ƙarin Naira tiriliyan 13.4 a takardu, ba tare da gwamnati ta ƙara karɓar ko dala ɗaya a matsayin sabon bashi ba.

Abin da alkaluman bashin suka nuna

Ya bayyana cewa idan aka auna bashin Najeriya da dalar Amurka, adadinsa ya tashi daga dala biliyan 113.4 a watan Yunin 2023 zuwa dala biliyan 120.9 a watan Yunin 2026.

Wannan na nufin bashin ya ƙaru da dala biliyan 7.5 cikin shekaru uku, a cewar jami'in fadar shugaban ƙasar.

Alkaluman Ofishin Kula da Bashin Ƙasa (DMO) sun nuna cewa jimillar bashin ƙasar ya kai kusan Naira tiriliyan 87.38 a watan Yunin 2023.

Ya ƙaru zuwa kusan Naira tiriliyan 166.79 a watan Yunin 2026, wanda ya yi daidai da dala biliyan 120.93.

Fadar shugaban ƙasa ta kare cire tallafin man fetur

Dangane da cire tallafin man fetur, Olusegun ya ce matakin ya taimaka wajen ƙara yawan kuɗaɗen da ake rabawa gwamnatocin jihohi da ƙananan hukumomi ta hanyar Asusun Raba Kuɗaɗen Tarayya (FAAC).

Ya ce kuɗaɗen da ake rabawa sun tashi daga Naira biliyan 656 a watan Afrilun 2023 zuwa Naira tiriliyan 2.4 a watan Satumban 2026.

Kara karanta wannan

Zance ya kare: Atiku ya bayyana makomar takararsa a 2027 bayan hukuncin kotu

Ikirarin da Olusegun ke mayar wa martani ya samo asali ne daga wani hoto da ya yaɗu a kafafen sada zumunta, wanda ya kwatanta bashin da gwamnatocin baya suka ci da wanda gwamnatin Tinubu ta ci.

Sai dai masu tantance sahihancin labarai sun bayyana hoton a matsayin mai ruɗarwa, domin alkaluman Naira tiriliyan 46 sun nuna bashin da ake bin ƙasar a ƙarshen 2022 ne, ba jimillar bashin da shugabanni 16 suka ci cikin shekaru 63 ba.

Sun kuma nuna cewa kwatancen bai yi la'akari sosai da tasirin sauyin farashin musayar kuɗi da kuma shigar da bashin CBN da ba a rubuta a baya cikin bayanan hukuma ba.

Asali: Legit.ng