Jerin Sabbin Matakai 8 da Gwamnatin Jihar Kaduna ta Dauka don Dakile Ayyukan Ta’addanci
Gwamnatin jihar Kaduna ta bi sahun makwabtanta na Kastina da Zamfara wajen kafa sabbin dokoki don dakile matsalar tsaro da ya addabi jihar.
Jihohin Arewa maso yammacin Najeriya na fama da matsanancin rikicin yan bindiga masu garkuwa da mutane.
Gwamnan jihar da kansa ya jera sabbin dokoki domin ganin an kawo karshen wannan lamari a jawabin da ya saki a shafinsa na Facebook.
El-Rufa'i yace:
Muna amfani da wannan kafa ta Facebook domin sanar da al'umma matakan da muka ɗauka a ƙoƙarin da muke yi na daƙile ayyukan ta'addanci kamar yadda jami'an tsaro suka ba mu shawara.
Asali: Twitter
Waɗannan matakai sun haɗa da:
1. Rufe layukan sadarwa a wasu yankunan jihar
2. Hana amfani da babura (mashin) a duk fadin jihar har na tsawon wata uku.
3. Hana mallakar makamai
4. Hana amfani da Keke Napep bayan karfe bakwai na yamma zuwa karfe shida na safe, sannan kuma an hana su amfani da labule.
5. Hana sayar da man fetur a jarakuna a Karamar Hukumar Birnin Gwari da Giwa da Chikun da Igabi da Kachia da Kagarko da Kajuru.
6. Hana safarar gawayi da itace
7. Hana safarar dabobbi; shigowa da fita da su wajen jihar
8. Hana cin kasuwannin sati-sati ko mako-mako a ƙananan hukumomin Birnin Gwari da Giwa da Chikun da Igabi da Kasuwar Kawo da ke Ƙaramar Hukumar Kaduna ta Arewa
Gwamnan ya kara da cewa yana bayar da haƙuri na halin ƙunci da al’umma za su shiga saboda waɗannan matakan.
Asali: Legit.ng
