Za a Rikita Tinubu, Yan Adawa Za Su Sanar da Dan Takara Tilo da Zai Fafata da Shi

• Salihu Lukman ya ce jam’iyyun adawa za su fitar da ɗan takarar shugaban ƙasa guda ɗaya yayin da ake shirin zaɓen 2027
• Tsohon mataimakin shugaban APC ya bayyana cewa jam’iyyun adawa shida sun fara haɗin gwiwa
• Lukman ya yi gargaɗin cewa rarrabuwar ƙuri’un Atiku Abubakar, Peter Obi za ta taimaka wa APC wajen samun nasara

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abuja - Mai jagorantar tafiyar hadaka ta siyasa ta kungiyar G100, Salihu Lukman, ya yi magana kan zaben 2027 mai zuwa.

Lukman ya bayyana cewa jam’iyyun adawa za su sanar da ɗan takarar shugaban ƙasa guda ɗaya a zaɓen 2027, mai yiwuwa kwanaki kaɗan kafin zaɓen.

Lukman, tsohon mataimakin shugaban jam’iyyar APC na ƙasa, ya bayyana hakan ne a shirin Hard Copy na gidan talabijin na Channels.

Kara karanta wannan

Abin da ya fi firgita Kashim Shettima kan zaben 2027 fiye da Atiku da Obi

Yawan jam'iyyun da suka hada kai

A cewarsa, ƙoƙarin haɗin kan ya wuce jam’iyyu shida da ke cikin shirin a halin yanzu, ya ce suna ƙoƙarin faɗaɗa haɗin gwiwar ta hanyar tuntuɓar sauran jam’iyyun siyasa.

An kafa ƙungiyar G100 ne domin matsa wa jam’iyyun adawa su haɗa kai, bayan wani taron kolin jam’iyyun adawa da aka gudanar a Ibadan a watan Afrilun 2026 ya amince da samar da ɗan takara guda ɗaya da zai fafata da APC mai mulki.

Ya ce:

“Zan iya tabbatar muku da hakan ba tare da wata shakka ba. Amincewata ta samo asali ne daga abin da nake gani a shugabancin jam’iyyun, domin sun himmatu kuma suna ɗaukar dukkan matakan da suka dace.

“Mai yiwuwa watanni biyu, makonni kaɗan ko kuma kwanaki kaɗan kafin zaɓe ne za su fito su sanar da ’yan Najeriya hanyar da suka zaɓa, sannan kowa ya bi wannan matsaya.”

Kara karanta wannan

Yan takarar gwamnan jam'iyyar adawa sun fadi wanda za su yi a zaben shugaban kasa

Kalubalen da ke gaban ya adawa

Lukman ya ce tun daga lokacin, jam’iyyun da ’yan takararsu suka karɓi ragamar gudanar da shirin daga ƙungiyar.

Ya bayyana babban ƙalubalen da ke gabansu a matsayin rashin amincewa tsakanin jam’iyyun da kuma ’yan takararsu.

Ya ce:

“Lokacin da jam’iyyun suka karɓi tsarin da muka fara, suka ci gaba da shi har suka fitar da shi daga hannunmu, suka fara tattaunawa da juna domin gina amincewar da za ta ba su damar dogaro da juna.”

Ya yi bayanin cewa a wani taron kolin da aka gudanar ranar 31 ga Agusta, an amince da kafa ƙungiyoyin aiki guda biyar, inda ɗaya daga cikinsu zai yi aiki kan samar da ɗan takarar shugaban ƙasa guda ɗaya da kowa zai amince da shi.

Zaben 2027: An fara hada kan Atiku, Obi

A baya, an ji cewa G-100 za ta gudanar da taron hadin kan jam’iyyun adawa a Abuja ranar 18 ga watan Agusta, 2026, gabanin zaben 2027.

Kara karanta wannan

Takarar Pantami da hadu da sabon kalubale daga babban dan PDP

Kungiyar ta gana da shugabannin jam’iyyun adawa shida domin tattauna yadda za a samar da hadin kai.

'Yan G-100 sun ce hadin kan adawa zai bukaci sadaukarwa da sassauci daga shugabannin jam’iyyun na adawa.

Asali: Legit.ng