Binciken Magu da sauran manyan abubuwa 2 da suka wakana a makon jiya

Binciken Magu da sauran manyan abubuwa 2 da suka wakana a makon jiya

A yau Lahadi, 12 ga watan Yulin 2020, Legit.ng ta zakulo wasu muhimman ababe da suka wakana a kasar nan cikin makon jiya.

Jigo cikin manyan al'amuran da suka karade dandalai da zaurukan sada zumunta kuma har yanzu suna gudana kan harsunan al'umma, shi ne titsiyar da ake yi wa Ibrahim Magu.

Sauran ababen da suka faru a makon jiya sun hadar da yadda ake kai ruwa rana kan sha'anin siyasa musamman dangane da zaben gwamnan Edo da na Ondo da za a gudanar a watan Satumba da kuma mai bi masa wato Oktoba.

Akwai kuma batun rattaba hannu da shugaban kasa Muhammadu Buhari ya yi kan kasafin kudin kasar nan na bana da aka yi wa kwakwarima.

Badakar Magu:

A ranar Talata ne dai fadar shugaban kasa ta dakatar da Ibrahim Magu daga jagorancin hukumar EFCC mai yaki da masu yi wa tattalin arzikin kasar nan ta'annati.

Wata majiya mai karfi da ta bukaci a sakaya sunanta wadda ta fito daga fadar shugaban kasa, ita ce ta bayar da tabbas a kan wannan rahoto.

Ibrahim Magu
Hoto daga; Vanguard

Ibrahim Magu Hoto daga; Vanguard
Source: Depositphotos

Hukuncin da fadar shugaban kasar ta dauka ya biyo bayan bayyanar Magu a gaban kwamitin da shugaban kasa ya kafa domin bincike kan zargin da ake yi masa na aikata ba daidai ba.

Kwamitin wanda ke karkashin jagorancin tsohon mai shari'a Ayo Salami, ya gayyaci Magu ne domin jin ta bakinsa kan abubuwan da suka shafi jagorancinsa a hukumar ta EFCC.

Har kawo yanzu, Magu dai yana can tsare a hannun kwamitin, inda ake ci gaba da titsiye shi tare da tatso bayanai daga garesa a yayin neman samun tabbaci kan zargin almundahana da dukiyar kasa da ake tuhumarsa.

Buhari ya rattaba hannu kan kasafin kudin bana da aka yi wa kwaskwarima:

Shugaban kasar Najeriya, Muhammadu Buhari, ya saka hannu a kan kasafin kudin shekarar 2020 da aka yi wa kwaskwarima.

Tolu Ogunlesi, hadimi na musamman a kan sabuwar hanyar sadarwa ga shugaban kasar, ya wallafa cewa, Buhari ya sanya hannu a kan gyararren kasafin kudin da misalin karfe 11.04 na safiyar ranar Juma'a.

Shugaba Buhari yayin rattaba hannu kan gyararren kasafin kudin bana
Hakkin mallakar hoto; Fadar shugaban kasa

Shugaba Buhari yayin rattaba hannu kan gyararren kasafin kudin bana Hakkin mallakar hoto; Fadar shugaban kasa
Source: Twitter

Tun a ranar Alhamis ne dai Ministar Kudi, kasafi da tsare-tsaren ci gaban kasa; Zainab Ahmed ta shaidawa majalisar dokokin tarayya cewa Buhari zai rattaba hannu a kan kasafin kudin da aka yi wa kwaskwarima a ranar Juma'a.

An yi wa kasafin kudin kwaskwarima ne bayan faduwar farashin danyen man fetur a kasuwannin duniya da kuma bullar annobar korona da ta janyo tsaiko a kan hada hadar kasuwanci a duniya.

Zaben Gwamnan Ondo: Jam'iyyu 17 sun sanar da INEC kudirinsu na gudanar da zaben fidda gwanin takara

Hukumar zabe ta kasa mai zaman kanta INEC, ta sanar da cewa, daga cikin jam'iyyu 18 masu lasisi, 17 sun tabbatar da mata da shirinsu na aiwatar da zaben fidda gwanin takara na gwamnan jihar Ondo.

Za a gudanar da zaben ne a ranar Asabar, 10 ga watan Oktoba na 2020.

Hukumar INEC ta sanar da cewa, an wallafa duk wasu bayanai dangane da jam'iyyun da za su fafata a zabe a shafinta na yanar gizo da kuma na dandalin sada zumunta.

Haka kuma hukumar ta sanar da cewa, za a gudanar da zaben gwamnan Edo a ranar Asabar, 19 ga watan Satumba, a yayin da tuni jam'iyyu 14 sun kammala zabukansu na fidda gwanin takara.

INEC ta tunatar da jam'iyyun cewa, kamar yadda ta fidda tsare-tsare da jadawalin gudanar da zabe, kowace jam'iyya ta tabbatar ta kammala yakin neman zabenta a tsakanin ranar 21 ga watan Yuli zuwa 17 ga watan Satumba.

Domin sauke manhajar labaran Legit.ng a wayar ku ta hannu, latsa wannan rubutu na kasa:

https://play.google.com/store/apps/details?id=com.naij.hausa

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Idan kuna da wata shawara ko bukatar bamu labari,

Tuntube mu a: labaranhausa@corp.legit.ng

Source: Legit.ng News

Mailfire view pixel