Rusa Takarar Atiku: Kalubalen da Ke gaban ADC kan Zaben 2027

• Babbar Kotun Tarayya da ke Abuja ta soke shugabancin ADC ƙarƙashin Sanata David Mark, tare da rusa matakan da kwamitin ya ɗauka
• Hukuncin ya jefa takarar Atiku Abubakar da Rotimi Amaechi cikin barazanar shari’a, duk da cewa jam’iyyar ta ɗaukaka ƙara
• Idan kotunan ɗaukaka ƙara da Kotun Ƙoli suka tabbatar da hukuncin, Atiku na iya rasa damar tsayawa takara, lamarin da zai iya sauya lissafin siyasar adawa

​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Shin tsohon mataimakin shugaban ƙasa, Atiku Abubakar, zai sake kasancewa cikin ’yan takarar shugaban ƙasa a zaɓen da aka tsara gudanarwa ranar 16 ga Janairu, 2027?

Wannan ce tambayar da ke jan hankalin masu bibiyar siyasar Najeriya bayan Babbar Kotun Tarayya da ke Abuja ta yanke hukuncin da ya jefa jam’iyyar ADC cikin sabon rikici.

Kara karanta wannan

Yan takarar gwamnan ADC sun ɗauki zafi kan hukuncin hana Atiku takara a zaben 2027

Mai shari’a Peter Lifu ne ya yanke hukuncin, inda ya kori shugabancin jam’iyyar na ƙasa ƙarƙashin Sanata David Mark tare da soke dukkan matakan da shugabancin ya ɗauka tun lokacin da aka kafa shi, cewar rahoton jaridar Tribune.

Hukuncin ya jefa makomar Atiku da dubban sauran ’yan takarar da ADC ta tsayar a zaɓuɓɓuka daban-daban cikin rashin tabbas.

Yadda hukuncin kotu ya shafi takarar Atiku

A ranar 12 ga Satumba, Hukumar Zaɓe Mai Zaman Kanta ta Ƙasa (INEC) ta wallafa jerin sunayen ƙarshe na ’yan takarar shugaban ƙasa na 2027, inda aka saka Atiku da mataimakinsa, Rotimi Amaechi, tsohon gwamnan jihar Rivers.

Sai dai a ranar Alhamis, 5 ga Nuwamban 2026 mai shari’a Peter Lifu ya ayyana kwamitin riƙon ƙwarya na ADC ƙarƙashin Mark a matsayin wanda bai halatta ba.

Wannan kwamitin ne ya shirya zaɓen fitar da gwani da ya samar da Atiku a matsayin ɗan takarar shugaban ƙasa, tare da sauran ’yan takarar jam’iyyar a faɗin ƙasar.

Kara karanta wannan

Da wace doka alkali ya dogara wurin rushe takarar Atiku da shugabancin ADC

Kotun ta yanke hukuncin ne bayan ta amince da ƙarar da Nafiu Bala Gombe, tsohon mataimakin shugaban ADC na ƙasa mai kula da Arewa maso Gabas, ya shigar.

Nafiu Bala Gombe ya ƙalubalanci yadda kwamitin David Mark ya karɓi shugabancin jam’iyyar. Ya ce bayan murabus ɗin tsohon shugaban jam’iyyar na ƙasa, Cif Ralph Nwosu, shi ne ya cancanci jagorantar ADC.

Saboda haka, ya nemi kotu ta soke dukkan matakan da shugabancin Mark ya ɗauka a madadin jam’iyyar.

ADC ta ɗaukaka ƙara kan hukuncin

A cikin sanarwar da ya fitar ranar Juma’a, 6 ga Nuwamban 2026, Daraktan Yaɗa Labarai na Kwamitin Kamfen ɗin Atiku ta ADC, Phrank Shaibu, ya ce jam’iyyar ta sanar da INEC game da ɗaukaka ƙarar da kuma neman dakatar da aiwatar da hukuncin.

Phrank Shaibu ya buƙaci hukumar zaɓen ta dakatar da duk wani mataki kan lamarin har sai an warware ƙarar.

Me zai faru da Atiku da sauran ’yan takarar ADC?

Yayin da ake jiran sakamakon ƙarar da ADC ta ɗaukaka, makomar ’yan takarar jam’iyyar, ciki har da Atiku, na fuskantar ƙalubalen shari’a, musamman ganin cewa saura kwanaki 69 kafin zaɓen 2027.

Kara karanta wannan

Yadda hukuncin kotu ya sake kara damuwar da Atiku da jam'iyyar ADC ke ciki

Idan hukuncin kotun ya tabbata, Atiku na iya fuskantar matsalar rasa damar tsayawa takara. Sai dai tsohon mataimakin shugaban ƙasar ya dage cewa zai kasance cikin ’yan takarar da za su fito a kan takardar zaɓe.

Mutanensa kuwa na ganin cewa rikicin wani yunƙuri ne na karkatar da hankalinsa daga burinsa na neman shugabancin ƙasa.

Duk da haka, Atiku da ADC za su jira hukuncin Kotun Ɗaukaka Ƙara, sannan wataƙila Kotun Ƙoli, kafin a san matsayinsu na ƙarshe.

Atiku ya ce babu fashin takara a 2027

A baya Atiku ya riga ya bayyana cewa zaɓen 2027 zai zama karo na ƙarshe da zai nemi shugabancin ƙasa.

Idan aka cire shi daga jerin 'yan takara, shi da sauran ’yan takarar ADC za su fuskanci zaɓin inda za su karkata, ko su koma APC mai mulki ko kuma NDC mai hamayya, wadda ita ma ta fuskanci wasu ƙalubalen shari’a a baya-bayan nan.

Sai dai Atiku ya bayyana a cikin wata sanarwa da ya fitar a shafinsa na Facebook ranar Juma’a cewa babu wani matakin kotu da zai sa ya yi watsi da burinsa.

Wa zai amfana idan Atiku bai tsaya takara ba?

Kara karanta wannan

Amaechi ya hango abin da zai haddasa yakin basasa a Najeriya ana batun zaben 2027

A zaɓen 2023, Shugaba Bola Tinubu ya lashe zaɓe da ƙasa da 37% cikin 100% na ƙuri’un da aka kaɗa.

Wasu masu sharhi kan siyasa sun bayyana cewa da ’yan adawa sun haɗa kai a bayan ɗan takara guda, sakamakon zaɓen na iya bambanta.

Atiku da Peter Obi, waɗanda suka samu 29.07% da 25.40% na ƙuri’u a zaɓen 2023, har yanzu ba su cimma matsaya kan yadda za su guji raba ƙuri’un ’yan adawa a karo na biyu ba.

Sai dai idan Kotun Ɗaukaka Ƙara da Kotun Ƙoli suka tabbatar da soke takarar Atiku, hakan zai iya haifar da fafatawa tsakanin Tinubu da Obi kai tsaye.

Wasu masu lura da siyasa na ganin hakan na iya zama dama ga ’yan adawa, musamman idan magoya bayan Atiku suka koma bayan ɗan takarar NDC, Obi.

Sai dai rashin Atiku a takardar zaɓe na iya sauya wannan lissafi, musamman idan ya samu goyon bayan Obi.

Tinubu da Obi ’yan Kudu ne, yayin da Atiku ya fito daga Arewa. Wannan bambancin yankin na iya shafar yadda wasu masu zaɓe za su yi la’akari da batun raba mulki tsakanin Arewa da Kudu.

Kara karanta wannan

Kurunkus: Matakin da INEC za ta dauka kan rusa takarar Atiku a 2027

A ra’ayin wasu masu sharhi, idan Atiku ya goyi bayan Obi, hakan na iya ƙara wa ɗan takarar NDC ƙarfin da ya rasa a zaɓen 2023.

Tasirin rikicin ADC ga siyasar Najeriya

A halin yanzu, masu lura da harkokin siyasa na ganin rashin tabbas da hukuncin kotun ya haifar na iya ƙara zafafa siyasar ƙasar, musamman yayin da ake zargin ana fuskantar wasu matsaloli kan jam’iyyun adawa.

Har yanzu sunayen Atiku, Amaechi da sauran ’yan takarar ADC na nan a shafin intanet na INEC. Jam’iyyar ta buƙaci hukumar zaɓen ta ci gaba da barin komai yadda yake har sai an warware ƙarar.

Sai dai ba a san tsawon lokacin da wannan matsayi zai ci gaba ba. Wani muhimmin batu shi ne yadda hukuncin mai shari’a Lifu ya saɓa da wani hukuncin da wata kotun mai matsayi ɗaya, ƙarƙashin mai shari’a Musa Liman, ya yanke a baya.

A ranar 2 ga Yuli, 2026, mai shari’a Musa Liman ya yanke hukunci kan ƙarar da Hon. Leke Abejide da wasu mutum huɗu suka shigar kan shugabancin ADC.

Ƙarar mai lamba FHC/ABJ/1637/2025 ta sa kotun ta bayyana cewa ba ta da hurumin shiga harkokin cikin gida na jam’iyyar siyasa.

Kara karanta wannan

Zance ya kare: Atiku ya bayyana makomar takararsa a 2027 bayan hukuncin kotu

Mai shari’a Liman ya kuma ce masu ƙarar ba su da cikakken matsayi na shigar da ƙarar, sannan ba su fara amfani da hanyoyin warware rikici na cikin jam’iyyar ba kafin zuwa kotu.

A hukuncinsa, ya amince da shugabancin ADC ƙarƙashin Sanata David Mark tare da umartar masu ƙarar su biya kuɗin shari’a.

Sabon hukuncin mai shari’a Peter Lifu ya zo ne a matsayin wanda zai iya soke tasirin hukuncin Liman na 2 ga Yuli, 2026.

Yanzu hankulan masu ruwa da tsaki sun karkata ga Kotun Ɗaukaka Ƙara da Kotun Ƙoli, waɗanda za su warware bambancin hukuncin kotunan tare da fayyace makomar shugabancin ADC da ’yan takararta.

Nafiu Bala ya yi maganar Atiku

A wani labarin kuma, kun ji cewa Nafiu Bala Gombe, shugaban wani bangare na jam’iyyar ADC, ya ce bai ji dadin abin da Atiku Abubakar ya yi masa ba.

Nafiu Bala ya nuna takaicinsa kan yadda tsohon mataimakin shugaban kasa, Atiku Abubakar, bai tuntube shi ba duk da cewa dukansu sun fito daga shiyya daya.

Asali: Legit.ng