2027: Zargin Yi wa Tinubu Aiki, Kwankwaso Ya Yi wa ADC Martani cikin Fushi

• Rabiu Kwankwaso ya bayyana cewa NDC ba za ta janye wa Peter Obi takara domin goyon bayan ADC ba
• Tsohon gwamnan Kano ya buƙaci ADC ta mayar da hankali wajen amsa zarge-zargen da Kashim Shettima ya yi ga Atiku
• Kwankwaso ya ce APC ta gaza wa ’yan Najeriya, yayin da NDC ke da ingantacciyar mafita da shirin magance matsalolin tsaro

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kano - Tsohon gwamnan Kano, Rabiu Musa Kwankwaso, ya yi martani mai zafi ga jam’iyyar African Democratic Congress (ADC) kan zarge-zargenta.

Kwankwaso ya ce NDC ba za ta janye wa ɗan takararta na shugaban ƙasa, Peter Obi, takara domin goyon bayan jam’iyyar ADC ba.

Kwankwaso ya bayyana hakan ne a shafin X yayin da yake mayar da martani kan zargin da ADC ke yi masu cewa suna yi wa APC aiki.

Kara karanta wannan

Ana zargin Kwankwaso na taimakon Tinubu ya zarce sabdao wasu dalilai

Ya ce maimakon ADC ta mayar da hankali wajen bayyana ƙwarewa, sahihanci da cancantar ɗan takararta ga ’yan Najeriya, ta fi mayar da hankali wajen yaɗa zarge-zarge da yaƙin ɓata suna kan NDC da takararta.

Kwankwaso ya gargadi ADC kan batun janye takara

Kwankwaso ya yi zargin cewa ADC na ƙoƙarin yaudarar magoya bayan NDC ta hanyar nuna cewa jam’iyyar na aiki ne da jam’iyyar APC mai mulki ko kuma za ta janye takararta a minti na ƙarshe domin goyon bayan ɗan takarar ADC.

Ya bayyana cewa babu wani dalili da zai sa NDC ta janye wa ADC ko wata jam’iyya takara, yana mai jaddada cewa tikitin OK na da ƙwarewa da ƙarfin da ake buƙata domin jagorantar Najeriya.

Ya ce:

“Tikitin OK ba ya aiki da sunan APC ko wani ɗan takararta, kuma ba ya wakiltar muradun jam’iyyar ko wani daga cikin ’yan takararta.”

Ya bukaci ADC ta mayar da hankali ga Shettima

Kara karanta wannan

'Nadamar da APC za ta yi a ranar zabe': Kwankwaso ya jaddada kwarin guiwarsu

Tsohon gwamnan ya shawarci kwamitin yaƙin neman zaɓen ADC da ya mayar da hankali wajen amsa zarge-zargen da Mataimakin Shugaban Ƙasa, Kashim Shettima, ya yi wa ɗan takararta, maimakon kai hare-hare gare shi da Peter Obi.

Kwankwaso ya ce NDC na da cikakken kwarin gwiwar cewa tikitinta na da cancanta, ƙwarewa da goyon bayan jama’a a Arewa da Kudu, tare da kyakkyawan tarihin ayyukan da za ta iya gabatarwa ga ’yan Najeriya.

Kwankwaso ya soki gwamnatin APC

Kwankwaso ya bayyana cewa gwamnatin APC ta gaza wajen biyan buƙatun ’yan Najeriya, yana mai cewa ADC ma ba ta bayar da wata mafita mafi kyau ga ƙasar ba.

Ya ce tikitin OK na da niyyar haɗa kan ’yan Najeriya da magance manyan matsalolin ƙasar, musamman tsaro, ilimi, noma, ababen more rayuwa, kiwon lafiya da tattalin arziki.

A ƙarshe, Kwankwaso ya bayyana NDC a matsayin jam’iyyar adawa mafi ƙarfi da cancanta a Najeriya, tare da kira ga magoya bayanta da sauran ’yan ƙasa masu kishin ƙasa da su ci gaba da aiki domin ganin jam’iyyar ta yi nasara.

An bukaci Obi, Kwankwaso su hakura da takara

Mun ba ku labarin cewa lauya, Deji Adeyanju ya yi magana kan zargin takarar Peter Obi da Rabiu Kwankwaso a zaben 2027 da ke tafe.

Kara karanta wannan

"Sun tsorata," Kwankwaso ya gano sasu shirin maguɗi a zaɓen shugaban ƙasa na 2027

Lauyan kare hakkin dan Adam ya ce zai yarda ba sa taimaka wa Bola Tinubu idan suka janye, yana zargin sun taimaka masa a zaben 2023.

Kwankwaso ya ce Peter Obi yana hana Tinubu sukuni saboda farin jininsa, yayin da ya bayyana cewa ya nemi Fulani su matsa wa Atiku ya janye.

Asali: Legit.ng