NDC Tana Wani Fadan da INEC kan Ba Wasu Mutane daga Waje Tikitin Takara a Kano

• Jam’iyyar NDC a Kano ta zargi wata jami’ar INEC da fitar da rahotanni masu cin karo game da zaben tsaida gwani
• Ana kukan cewa rahotannin sun kunshi sunayen mutanen da ba su shiga zabn ba, aka ce su ne ‘yan takara a zaben 2027
• NDC ta bukaci INEC ta binciki lamarin, amma ba a samu martanin hukumar ko wata jami'a a Kano kan zarge-zargen ba

Kano - Jam’iyyar NDC ta zargi Hukumar Zabe Mai Zaman Kanta ta Kasa (INEC) da kakaba mata wasu ‘yan takara.

NDC ta ce INEC ta fitar da rahotanni daban-daban masu sabani kan zaben fitar da gwanin jam’iyyar a reshen jihar Kano.

Kano: Jam'iyyar NDC ta kai kukan jami'ar INEC

Jam’iyyar ta yi wannan zargi ne a cikin wata takardar korafi mai kwanan wata 16 ga watan Oktoba, 2026 a cewar Daily Trust.

An shigar da korafi kan Hauwa Buhari Buhari, shugabar sashen zabe da sa ido kan jam’iyyun siyasa a ofishin INEC na Kano.

Kara karanta wannan

Jerin sunayen mutane 155 da za su taya Gwamna Abba yakin neman zaben Kano

NDC ta aika da korafin ne ta hannun lauyoyinta, Tahir Chambers, zuwa ga INEC ta hannun Kwamishinan Zabe na jihar.

Jam’iyyar hamayyar ta yi zargin cewa jami’ar ta fitar kuma ta sanya hannu kan nau’ukan rahoto da dama masu karo da juna.

Ta ce rahoton zabukan fitar da gwani na jam’iyyar da aka samu daga wajen ta dauke da wasu bayanai masu sabani da juna.

NDC ta ce an cusa mata 'yan takara a Kano

Jam’iyyar ta ce wasu daga cikin rahotannin sun ambaci sunayen mutanen da ba ’yan takararta ba ne amma aka ba su tuta.

Ana zargin an dauko wasu da ba su da rajista kuma ba su shiga zabe ba, aka tsaida su a NDC.

A gefe guda, NDC ta yi korafin jami’ar INEC din ta cire sunayen wasu da jam’iyyar ta zaba bisa ka’ida domin wakiltar ta.

The Guardian ta ce NDC ta kuma nuna damuwa kan yadda ake yada rahotannin da ake takaddama a kansu a yanzu.

Wata matsalar da jam’iyyar ta nuna ita ce rashin bayyana ranar da aka gudanar da zaben tsaida gwanin cikin rahotannin.

Kara karanta wannan

Kamar Kano, NDC ba ta da ‘dan takarar gwamna a Kaduna da INEC ta fitar da sunaye

Sannan jam’iyyar ta bukaci INEC ta lura da bambance-bambancen da ke cikin rahotannin.

Wani mataki NDC ta ke so a dauka?

Sai dai takardar korafin da aka samu ba ta fayyace duk matakan da take son hukumar ta dauka dangane da zaben na 2027 ba.

Har zuwa lokacin da aka fitar da rahoton, ba a tabbatar da tabbaci ko rashin hakan dangane da zarge-zargen da NDC ta yi ba.

Haka kuma, INEC da jami’ar da aka ambata ba su mayar da martani kan batun ba zuwa yanzu.

Hamza Telan Mata ya fitar da takardun korafin a Facebook

Rigima tsakanin hadiman gwamnan Kano

Labari ya zo cewa Alhaji Salisu Yahaya Hotoro yana ganin 'yan SR da SSR ba su kare gwamnan Kano yadda ya kamata.

Shugaban kungiyar masu dauko rahoto ya maida wa shugaban matasan APC a jihar Kano amsa saboda ya taba mutuncinsu.

Amir Kima ya ce suna tare da Abba Gida Gida kuma ‘yan kungiyarsu ba su jin tsoron wani hadimi da asali ma bai nufin su da alheri.

Asali: Legit.ng