Kwana 1 kafin Wa'adin INEC; Wane Hali Takarar Pantami a 2027 Ke ciki?

• Isa Ali Pantami na fuskantar ƙalubale bayan an cire sunansa daga jerin ’yan takarar gwamna na zaɓen 2027
• Jam’iyyun PDP ta yi barazanar kai INEC ƙara idan ba a warware matsalar cire sunayen ’yan takarar ta ba
• INEC ta bai wa jam’iyyun wa’adin zuwa 24 ga Oktoba domin gabatar da ƙorafi kan sunayen ’yan takarar da suke ganin an cire bisa kuskure

​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Gombe - Tsohon Ministan Sadarwa, Isa Ali Pantami na fuskantar babban ƙalubale yayin da wa’adin hukumar zaɓe mai zaman kanta ta ƙasa (INEC) na shigar da ƙorafi kan cire sunayen ’yan takara ke gab da karewa.

Abin da ke gaban Pantami shi ne ko jam’iyyarsa za ta iya shawo kan matsalar domin tabbatar da cewa an saka sunansa cikin jerin waɗanda za su fafata a zaɓen gwamnonin jihohi na 2027.

Kara karanta wannan

2027: Ana zargin wasu ƙusoshin APC sun fito da kudi don ruguza shirin hadewar yan adawa

Jam’iyyun PDP da NDC sun yi barazanar ɗaukar matakin shari’a kan INEC idan ba a warware matsalar cire sunayen ’yan takararsu ba, cewar rahoton jaridar Daily Trust.

Sai dai bayanan baya-bayan nan sun nuna cewa ƙoƙarin da jam’iyyun ke yi na tattaunawa da hukumar bai haifar da wani sakamako mai gamsarwa ba tukuna.

INEC ta ba jam’iyyu wa’adi

A ranar 10 ga Oktoba ne INEC ta wallafa jerin sunayen ƙarshe na ’yan takarar gwamna a zaɓen 2027, jaridar The Punch ta kawo labarin.

Daga bisani, a ranar 13 ga Oktoba, hukumar ta fitar da ƙarin bayani inda ta bai wa jam’iyyun da lamarin ya shafa wa’adin zuwa ranar 24 ga Oktoba domin sanar da ita game da cire sunayen ’yan takararsu da suke ganin an yi bisa kuskure.

INEC ta ce wa’adin ya yi daidai da sashe na 32(2) na Dokar Zaɓe ta 2026, wanda ya tanadi kwanaki 14 domin jam’iyyun siyasa su kai rahoton cire sunayen ’yan takarar da suke ganin bai kamata a cire ba.

Kara karanta wannan

Ana wata ga wata: Makinde ya fallasa shirin gwamnatin APC kan jam'iyyun adawa

Sai dai wannan damar ba ta nufin za a mayar da duk sunayen da aka cire kai tsaye ba. Jam’iyyun za su buƙaci tabbatar da cewa an cire sunayen ’yan takararsu bisa kuskure, maimakon cire su saboda rashin cika wani sharadin doka.

Wannan batu na da muhimmanci saboda Kotun Ƙoli ta tabbatar da muhimmancin bin ƙa’idojin doka wajen tsayar da ’yan takara.

Pantami na koƙarin warware matsalarsa

Ga Pantami, ƙalubalen ya taso ne duk da cewa ya samu tikitin takarar gwamnan jihar Gombe a ƙarƙashin jam’iyyar PDP.

Wannan ya biyo bayan umarnin kotu na sake gudanar da zaɓen fidda gwani na jam’iyyar a ranar 29 ga Satumba.

Tun da farko, sunan Pantami ya bayyana a jerin sunayen wucin gadi da INEC ta wallafa a ranar 29 ga Agusta. Sai dai lokacin da hukumar ta fitar da jerin sunayen ƙarshe a watan Oktoba, ba a ga sunansa ba.

Rashin sunan nasa a jerin ya sa jam’iyyar PDP da lauyoyinsa suka fara ƙoƙarin ganin an warware matsalar kafin wa’adin da hukumar ta bayar ya ƙare.

PDP ta tuntuɓi INEC kan Pantami

An ruwaito sakataren yaɗa labaran PDP na ƙasa, Mohammed Jungudo, yana cewa jam’iyyar da tawagar lauyoyin Pantami sun tuntuɓi INEC domin tattauna batun cire sunansa.

Kara karanta wannan

"Babu zagi": Yari ya fadi abin da za su tallata Shugaba Tinubu da shi

Lauyoyin Pantami sun kuma rubuta wa hukumar wasiƙa kan lamarin domin neman a warware matsalar.

Sai dai jam’iyyar ta bayyana cewa har yanzu ba a samu wani gagarumin ci gaba ba. Saboda haka, tana nazarin matakan shari’a da za ta ɗauka idan ba a warware matsalar ba bayan cikar wa’adin da doka ta tanada.

Wike ya yi magana kan Pantami

A wani labarin kuma, kun ji cewa Nyesom Wike ya yi magana kan zargin da ake masa cewa yana goyon bayan dan takarar gwamnan jihar Gombe na PDP, Farfesa Isa Ali Pantami.

Wike wanda shi ne ministan Abuja ya yi ikirarin cewa bai taba haduwa da Pantami ido da ido ba tun da yake harkokin siyasarsa.

Asali: Legit.ng