Ana Zargin Tinubu na cikin Wani Hali, Bai San Ma Waye Shugaban Ƙasa ba

• Phrank Shaibu na jam’iyyar ADC ya zargi Shugaba Bola Tinubu da rashin fahimtar halin da ’yan Najeriya ke ciki na matsin tattalin arziki
• Shaibu ya ce cire tallafin man fetur ya jawo tashin farashin kayayyaki da ayyuka, lamarin da ya sa ’yan Najeriya ke fama da wahalar samun abinci
• Jami’in ADC ya soki Tinubu kan zargin ’yan adawa da haddasa yunwa, yana mai cewa ya kamata shugaban ƙasa ya ɗauki alhakin manufofin gwamnatinsa

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abuja - Daraktan yaɗa labaran dabarun yaƙin neman zaɓen shugaban ƙasa na jam’iyyar African Democratic Congress ya fadi halin da Bola Tinubu ke ciki.

Phrank Shaibu, ya zargi Shugaba Bola Tinubu da rasa fahimtar hakikanin rayuwa, yana mai cewa bai fahimci matsin tattalin arzikin da ’yan Najeriya ke fuskanta ba.

Kara karanta wannan

'Yan Najeriya na kaunar Tinubu ba kamar yadda ake gani a kafafen sadarwa ba'

Shaibu ya bayyana hakan ne yayin wata hira da gidan talabijin na ARISE News ranar Lahadi 25 ga watan Oktobar shekarar 2026.

Kakakin ADC ya yi zarge-zarge kan Tinubu

Shaibu ya soki shugaban ƙasar kan zargin ’yan adawa kamar Atiku Abubakar da haddasa yunwa, duk da cewa ya shafe shekaru uku da rabi yana mulki.

Ya bayyana bayanin da Tinubu ya yi game da matsalar yunwa a ƙasar a matsayin tunani marar tushe, yana mai cewa ya kamata shugaban ƙasar ya ɗauki alhakin halin tattalin arzikin da ake ciki a ƙarƙashin gwamnatinsa.

Ya ce:

“Ya rasa fahimtar hakikanin rayuwa. Bola bai san abin da ke faruwa a muhallinsa ba. Bai san halin da ’yan Najeriya ke ciki ba. Bai ma san cewa shi ne shugaban ƙasa ba.

“Na kalle shi jiya, kuma ɗana mai shekara takwas da ke kusa da ni ya tambaya, mene ne wannan mutumin yake magana a kai? Ya shafe shekaru uku da rabi yana mulki, amma yana cewa ’yan adawa ne suka haddasa yunwa. Ina ganin wannan tunani ne marar tushe."

Kara karanta wannan

2027: Tinubu ya sake neman alfarmar yan Najeriya yayin kamfen a Kaduna

Kalubalen da ADC ta tura wa Tinubu

Shaibu ya ƙalubalanci Tinubu da ya kwatanta tsadar rayuwa lokacin da ya hau mulki a ranar 29 ga Mayu, 2023, da halin da ake ciki yanzu, yana mai cewa bai kamata ’yan Najeriya su kasance cikin mawuyacin hali a ƙarƙashin jagorancinsa ba.

Ya ambaci cire tallafin man fetur a matsayin ɗaya daga cikin manyan dalilan tashin farashin kayayyaki, yana mai cewa wannan mataki ya haddasa tsananin ƙarin farashin kayayyaki da ayyuka.

“Bola Tinubu ya hau kan dandamali ya sanar da cewa an cire tallafin man fetur. Nan take kuwa, me ya faru? Farashin komai ya tashi matuƙa. A yau, ’yan Najeriya ba za su iya samun abinci sau uku a rana ba."

- in ji Shaibu

APC ta caccaki Atiku Abubakar

Mun ba ku labarin cewa jam’iyyar APC ta zargi Atiku Abubakar da ADC da shirin amfani da bidiyoyin bogi da takardun ƙarya domin ɓata taron kamfen ɗinta a Kaduna.

Kara karanta wannan

Tinubu na ganin ƴan adawa suka jefa ƙasa a halin ƙunci duk da matakan da ya ɗauka

Kakakin kwamitin kamfen APC, Dele Alake, ya ce an ƙirƙiri wasiƙar bogi da ke zargin gwamnatin Kaduna da kashe naira tiriliyan 2.3 wajen taron.

APC ta yi zargin cewa ana shirin yaɗa tsofaffin bidiyoyi da aka sauya domin nuna rashin amincewar jama’a, tare da kira ga ’yan Najeriya su yi taka-tsantsan.

Asali: Legit.ng