Malamin Addini Ya Gargadi Jonathan Gaba da Gaba kan Zaben 2027

• An shawaci Goodluck Jonathan da kada ya nemi takarar kujerar shugaban ƙasa a 2027, duk da kiran da wasu magoya baya ke yi masa
• Primate Henry Chukwudum Ndukuba ne ya ba wa tsohon shugaban ƙasar wannan shawarar a wani taro da aka ɗauka a cikin wani bidiyo da ke yawo
• A cikin bidiyon, wanda ya fara haifar da martani daban-daban daga ’yan Najeriya, an hango tsohon shugaban ƙasar tare da wani tsohon shugaban Najeriya, Yakubu Gowon

​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Primate Henry Chukwudum Ndukuba ya shaida wa tsohon Shugaban Ƙasa Goodluck Jonathan da ya nesanta kansa da tsayawa takara a zaɓen shugaban ƙasa na 2027.

Malamin addinin Kiristancin ya buƙaci Jonathan da kada ya saurari kiran da ake masa na ya kasance a kan takardar zaɓe a shekara mai zuwa.

Kara karanta wannan

Tinubu ya yi magana bayan Amurka ta yi ikirarin kashe kasurgumin dan ta'adda a Najeriya

Hakan na kunshe a cikin wani bidiyo da @ChuksEricE ya sanya a shafinsa na X a ranar Asabar, 16 ga watan Mayun 2026.

Ana muhawara kan sake takarar Jonathan

Wannan yana zuwa ne a tsakiyar kiran da ake yi wa tsohon shugaban ƙasar na ya shiga takara domin ya fafata da Shugaba Bola Tinubu a shekarar 2027.

Sai dai, an samu ce-ce-ku-ce game da takarar ta Jonathan, idan aka yi la’akari da cewa an rantsar da shi sau biyu a baya, kuma tsarin mulki ya bayyana cewa mutum ba zai iya yin rantsuwa fiye da sau biyu ba.

A halin yanzu, ana shari'a da tsohon shugaban ƙasar a kotu domin ƙalubalantarsa da nufin hana shi shiga zaɓen na shekarar 2027.

A lokaci guda kuma, akwai ikirarin cewa jam’iyyar PDP tana aiki domin dawo da Jonathan ya shiga cikin takarar.

Wane gargadi aka yi wa Jonathan?

Kara karanta wannan

An dora Hayatu Deen a gaban Atiku, Obi da Amaechi a takarar zama shugaban kasa a 2027

Kodayake, lokacin da yake magana kan waɗannan ce-ce-ku-ce, Primate Ndukuba ya ce ya kamata tsohon shugaban ya tsaya a matsayinsa na dattijon ƙasa domin ya ci gaba da samun mutuntawa.

“Mai girma tsohon shugaban kasa Goodluck Jonathan, ka nesanta kanka da siyasa a yanzu. Ka ƙyale su su yi siyasar tasu, kada ka bari su ɓata kyakkyawan sunan da ka gina.”

- Primate Henry Chukwudum Ndubuka

'Yan Najeriya sun mayar da martani

Sakamakon haka, ’yan Najeriya sun fara bayyana ra’ayoyinsu game da kalaman na primate.

Ga kaɗan daga cikin tsokacin da suka yi:

Zany Mendie ya rubuta:

“A bar Unam Ikot ya riƙa washe haƙora kamar akuya, lokacin da muke buƙatarsa a zamanin Buhari ya yi watsi da mu mabiyansa saboda wasu manyan fastoci da mashahuran mutane marasa amfani, yanzu da muke ƙoƙarin ci gaba suna son su dawo da shi don karkatar da hankali, ba zai ma farka ba a ranar zaɓen nan.”

Umeh ya rubuta:

“Wannan shawara ce mai kyau. Tuni ya riga ya tabbatar da kansa kuma ya gina kyakkyawan suna gami da tarihi na gari ga kansa. Ya kamata kawai ya kasance dattijon ƙasa kuma mai sanya sarakuna, domin idan ya tsunduma cikin siyasa, zai ɓata sunansa ne kawai.”

Kara karanta wannan

"Babu irina": Peter Obi ya bayyana bambancinsa da Kwankwaso

Satan ya rubuta:

“Idan har Jonathan ya damu da ƙasar nan da kuma makomar ƙasar, ba zai saurari wannan mutumin ba.”

Jonathan zai yi shawara kan 2027

A wani labarin kuma, kun ji cewa tsohon shugaban kasa, Goodluck Jonathan, ya yi martani kan kiran da ake yi masa ya fito takara a 2027.

Goodluck Jonathan ya ce zai tuntubi mutane da dama tare da yin nazari sosai kafin daukar matakin da ya dace kan tsayawa takara.

Tsohon shugaban kasar ya kuma yi kira ga matasa su kara shiga harkokin siyasa tare da kare sahihin zabe da dimokuradiyya a Najeriya.

Asali: Legit.ng