Babbar Nasara: An Ceto Matasa Yan NYSC da Yan Bindiga Suka Sace a Najeriya

• Jami'an tsaron hadin gwiwa sun samu nasarar ceto matasa 20 da ke shirin shiga aikin bautar kasa, NYSC da wani farar hula bayan an sace su a jihar Imo
• Rundunar sojoji, jami'an hukumar DSS, ’yan sanda da sauran hukumomin tsaro ne suka gudanar da aikin ceton
• Rahotanni sun bayyana cewa yanzu an kai waɗanda aka ceto wani wuri mallakin hukumar DSS domin ba su kulawar lafiya

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Imo, Nigeria - Rahotanni sun nuna cewa dakarun tsaron Najeriya na hadin gwiwa sun yi nasarar ceto matasa 20 yan bautar kasa watau NYSC daga hannun masu garkuwa da mutane a Imo.

Jami'an tsaron sun ceto matasan ne bayan wasu miyagun yan bindiga sun yi garkuwa da su a hanyasu ta zuwa sansanin daukar horo na NYSC domin fara aikin yi wa kasa hidima.

Kara karanta wannan

An saki hoton gurgu da bingigogi da ke taimakon 'yan bindiga

Jami'an tsaro sun ceto yan NYSC 20

Jaridar Vanguard ta ruwwito cewa an ceto mutum 20 da ke shirin shiga aikin yi wa ƙasa hidima na NYSC tare da wani farar hula nutum da aka sace a jihar Imo da ke Kudu maso Gabashin Najeriya.

Bayanai sun tabbatar da cewa an cimma wannan nasara ne bayan wani samame da jami’an tsaro suka gudanar bisa sahihan bayanan sirri.

Dakarun Rundunar soji, Jami'an Hukumar Tsaro Farin Kaya ta Ƙasa (DSS), ’yan sanda da sauran hukumomin tsaro ne suka haɗa kai wajen gudanar da aikin ceton.

An ruwaito cewa an sace mutanen ne yayin da suke tafiya za su wuce ta jihar Imo, lamarin da ya sa jami’an tsaro suka ƙaddamar da wani samame domin gano inda suke da kuma ceto su.

An kai waɗanda aka ceto ofishin DSS

A cewar majiyoyin tsaro, a halin yanzu ana duba lafiyar waɗanda aka ceto a wani wuri da yake mallakin hukumar DSS, kamar yadda jaridar Leadership ta ruwaito.

Kara karanta wannan

Dan siyasa a Kano ya kira ruwa bayan nuna bindiga a wurin taro

Majiyoyin sun ce ana ci gaba da ƙoƙarin gano cikakkun bayanan yadda aka yi garkuwa da mutanen tare da kama sauran waɗanda ake zargin suna da hannu a lamarin.

Rundunar ’Yan Sandan Najeriya ta tabbatar da ceto ’yan NYSC 20 da aka yi garkuwa da su a kan titin Owerri-Onitsha a jihar Imo ranar Alhamis da ta gabata.

Yan sanda sun tabbatar da lamarin

A cikin wata sanarwa da Kakakin Rundunar ’Yan Sandan Najeriya, CSP Ani Iniedu, ya saha nu ya ce an ceto ’yan NYSC ɗin a Amakohia Ubi da ke ƙaramar hukumar Owerri West ta jihar.

Iniedu ya ce an ceto waɗanda aka yi garkuwa da su ne ranar 7 ga Oktoba, 2026, a ƙauyen Amakohia Ubi, bayan jami’an tsaro sun shafe lokaci suna gudanar da ayyukan bincike da ceto.

Kakakin ya ce ƙoƙarin kama waɗanda ke da hannu wajen sace ’yan NYSC ɗin yana ci gaba, domin gurfanar da su a gaban shari’a, cewar rahoton Daily Trust.

“Rundunar ’Yan Sandan Najeriya, tare da haɗin s sauran hukumomin tsaro, ta ceto ’yan NYSC 20 da aka yi garkuwa da su a jihar Imo ranar 1 ga Oktoba, 2026," in ji shi.

Kara karanta wannan

Zaman kashe wando ya kare, an buɗe wa matasa 80,000 damar samun aiki a Najeriya

Yadda maharan suka nemi kudin fansa

Tun farko, kun ji cewa ‘yan bindigan da suka dauke wasu matasa masu yi wa kasa hidima sun bukaci a biya kudin fansa kafin su sake su.

Rahoto ya nun cewa masu garkuwan sun nemi kusan Naira biliyan 1 a matsayin kudin fansar yan NYSC da suka sace kafin yanzu da jami'an tsaro suka ceto su.

Asali: Legit.ng