Najeriya Ta Ƙulla Alaƙa da Sojojin Amurka yayin da Ta'addanci Ya Yi Ƙamari

• Najeriya da Amurka sun amince da zurfafa haɗin gwiwar soji, musamman wajen yaƙi da ta’addanci da inganta tsaron yankin Tafkin Chadi
• Ministan Tsaro Christopher Musa ya bayyana fannoni da dama na haɗin gwiwa, ciki har da horo, musayar bayanan sirri da sa ido kan iyakoki
• Manjo Janar Matthew Brown ya ce ayyukan sojin Amurka a Najeriya na wucin gadi ne, kuma sun fi mayar da hankali kan tallafa wa hukumomin tsaro

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abuja - Ministan Tsaro, Janar Christopher Gwabin Musa mai ritaya, ya sake tabbatar da aniyar Najeriya na zurfafa alaƙar soji da Amurka, musamman wajen yaƙi da ta’addanci.

Janar Musa ya bayyana hakan ne ranar Laraba a Abuja, yayin da yake karɓar Manjo Janar Matthew Brown, kwamandan Rundunar Sojin Amurka ta Afirka, SETAF-AF.

Kara karanta wannan

Kasa ta rikice: Ƙungiyar Kiristoci ta CAN ta tura buƙata ga Bola Tinubu

A wata sanarwa da Leah Katung Babatunde, mai ba ministan shawara kan harkokin yaɗa labarai, ta fitar, ta ce ziyarar ta duba shirye-shiryen tsaro na haɗin gwiwa, cewar Punch.

Musabbabin hadin guiwar sojojin Amurka da Najeriya

Ta ce ziyarar ta kuma yi nufin tsara ingantaccen tsarin haɗin gwiwar tsaro tsakanin ƙasashen biyu domin cimma sakamako mai kyau a nan gaba.

Musa ya yaba wa gwamnatin Amurka saboda ci gaba da haɗin gwiwar da take yi da Najeriya, yana mai cewa ayyukan tsaro a Arewa maso Gabas sun ƙarfafa gwiwar sojoji.

Ya ce haɗin gwiwar musamman a yankin Tafkin Chadi ya taimaka matuƙa wajen inganta ayyukan sojojin Najeriya da yaƙi da ƙungiyoyin ta’addanci.

Domin ƙara samun nasarori, ministan ya bayyana muhimman fannoni da Najeriya ke son ƙarfafa haɗin gwiwa da Amurka a kansu.

Daga cikin su akwai horar da jami’an rundunar musamman tare, musayar bayanan sirri, ƙarfafa ƙwarewa, inganta tsaron iyakoki da taimakon yaƙi da bama-bamai.

Kara karanta wannan

Ciwon zuciya ya yi kamari: Gwamnatin Tinubu ta nemo dabarun yaki da cutar

Sauran fannoni sun haɗa da taimakon fasahar gano da kawar da bama-bamai da kuma zamanantar da kayayyakin more rayuwar tsaro domin ƙarfafa ƙarfin cikin gida.

Sojan Amurka Ya taya Najeriya murna

A nasa jawabin, Manjo Janar Brown ya taya Najeriya murnar bikin ranar samun ’yancin kai tun da wuri, tare da nuna godiya ga dogon tarihin haɗin gwiwar sojojin ƙasashen biyu.

Ya bayyana cewa alaƙar sojin Najeriya da Amurka ta ci gaba da taimakawa wajen cimma manufofin tsaro da ƙasashen biyu suke da shi, cewar Vanguard.

Brown ya kuma yaba da nasarorin ayyukan yaƙi da ta’addanci da aka gudanar kan ƙungiyoyin da ke da alaƙa da ISIS a Afirka, tare da yaba wa sojojin da suka shiga ayyukan.

Dangane da ayyukan sojin Amurka a yankin bayan ficewar jami’an da suka kasance cikin Rundunar Haɗin Gwiwa ta Musamman da ta yi aiki a Bauchi, Brown ya yi ƙarin bayani.

An tura bataliyar sojoji zuwa Zamfara

An ji cewa Rundunar Sojin Najeriya ta kaddamar da sababbin bataliyoyin soji uku a jihar Zamfara domin ƙarfafa ayyukan tsaro da gaggauta tunkarar barazanar tsaro.

Kara karanta wannan

Atiku ya buƙaci Tinubu ya saki El Rufai, Sheikh Zaria, ya taɓo batun Nnamdi Kanu

Sababbin bataliyoyin sun haɗa da 12 Infantry Battalion da aka kafa a Bakura, 23 Infantry Battalion a Kaura Namoda da 28 Infantry Battalion a Anka.

Rundunar ta ce sababbin rundunonin za su faɗaɗa ayyukanta tare da inganta tsaron yankunan da aka ba su alhakin kulawa da su a jihar.

Asali: Legit.ng