Yadda Farashin Litar Fetur Za Ta Kasance idan Atiku Ya Dawo da Tallafi

• Tsohon Sanatan Kogi ta Yamma, Dino Melaye, ya ce shirin Atiku Abubakar na dawo da tallafin man fetur na iya rage farashin fetur zuwa tsakanin N400 da N500
• A wata hira da aka yi da shi, Melaye ya ce rage farashin fetur zai kuma taimaka wajen rage tsadar sufuri da kayayyaki a Najeriya
• Jigon ADC ya bayyana hakan ne yayin da yake magana kan shirin jam’iyyar na mayar da Najeriya kasa mai saukin rayuwa

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Abuja – Sanata Dino Melaye, ya ce shirin tsohon Mataimakin Shugaban Ƙasa, Atiku Abubakar, na dawo da tallafin man fetur na iya rage farashin fetur zuwa tsakanin N400 da N500.

Hakan na zuwa ne yayin da tattaunawa kan tallafin man fetur ya mamaye fagen siyasar zaben shugaban kasa na 2027.

Kara karanta wannan

Gwamnatin tarayya ta ayyana ranar hutu saboda cikar Najeriya shekaru 66 da samun 'yanci

The Cable ta wallafa cewa Melaye, wanda ke cikin manyan jiga-jigan jam’iyyar ADC, ya bayyana hakan ne ranar Litinin yayin wata hira.

Farashin mai zai iya komawa N400

Melaye ya ce manufar ADC ita ce ganin an mayar da Najeriya kasa mai saukin rayuwa ta hanyar dawo da tallafin man fetur.

Ya ce idan aka rage farashin fetur daga matakin da ya kai yanzu, ’yan Najeriya za su iya fara sayen litar fetur kan N400 ko N500.

A cewarsa, hakan zai haifar da raguwar farashin sauran kayayyaki saboda farashin man fetur yana da tasiri kai tsaye kan sufuri da zirga-zirgar kaya.

Karin bayani kan tallafin mai

Melaye ya ce cire tallafin man fetur ya kara tsadar rayuwa, yana mai cewa ’yan Najeriya na fuskantar farashin fetur iri daya ba tare da la’akari da jam’iyyar siyasar da suke goyon baya ba.

Ya ce babu kasuwar APC ko tashar fetur ta wata jam’iyya, saboda kowa yana zuwa kasuwa daya ne kuma yana sayen fetur a farashin da ake sayarwa.

Kara karanta wannan

Oshiomhole ya fallasa abin da Atiku ya gaya masa kan tallafin man fetur

Ya kuma ce farashin fetur yana shafar sufuri, sannan sufuri yana shafar farashin kayayyaki da sauran harkokin tattalin arziki.

Alkawarin da Atiku ya yi

Atiku, wanda shi ne ɗan takarar shugaban ƙasa na ADC a zaɓen 2027, ya sha alwashin dawo da tallafin man fetur idan aka zaɓe shi Shugaban Ƙasa.

Ya kuma zargi gwamnatin Shugaba Bola Tinubu da rashin bayyana yadda aka yi amfani da kuɗin da aka samu bayan cire tallafin man fetur.

Sai dai Tinubu ya yi watsi da shirin Atiku, yana mai cewa shawarar ta nuna rashin fahimta mai tsanani game da tafiyar da gwamnati da tattalin arziki.

Legit ta tattauna da dan acaba

Wani dan acaba a jihar Gombe, Malam Musa Hassan ya bayyana wa Legit cewa ko N400 aka dawo da lita sun samu sauki.

Ya ce:

"Muna fatan Atiku ya zamo mana alheri. Sauki ko na N1 ne ai yana da dadi balle sama da N500."

'Babban abin da ake fata shi ne cewa ga wani dan takara yana cewa zai kawo sauki, kaga ai dole mu bi shi da gaske."

Kara karanta wannan

Atiku ya ragargaji Tinubu kan karbo bashin kusan Naira tiriliyan 2

Obi zai maido tallafin mai

A wani labarin, mun ruwaito cewa Peter Obi, ɗan takarar shugaban ƙasa na jam’iyyar NDC, ya ce gwamnatinsa za ta dawo da tallafin man fetur idan aka zaɓe shi a 2027.

Obi ya bayyana hakan ne a ranar Litinin yayin wata ganawa da jama’a da aka gudanar a Sokoto domin tallafa wa takararsa da ta Rabiu Kwankwaso.

Ya ce zai fara magance matsalar cin hanci da rashawa kafin dawo da tallafin, yana mai cewa cin hanci da rashawa ne babbar matsalar Najeriya.

Asali: Legit.ng