Ana Zargin Falasdinawa Sun Kashe Sojojin Isra’ila, Wasu da Dama Sun Jikkata

• An kashe sojojin Isra’ila biyu a wani harin harbe-harbe da wasu da ake zargin Falasɗinawa ne suka kai kan shingen binciken sojoji
• Firaministan Isra’ila, Benjamin Netanyahu, ya umarci sojoji su shirya killace Yammacin Kogin Jordan gaba ɗaya
• Harin ya ƙara tayar da hankali gabanin zaɓen Isra’ila, inda wasu ministoci masu tsattsauran ra’ayi suka buƙaci ƙarin matakan soji

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Tel Aviv, Isra'ila - Sojojin Isra’ila biyu sun mutu a wani harin harbe-harbe da wasu mutane biyu da ake zargin Falasɗinawa ne suka kai.

Jami’ai sun ce wasu Isra’ilawa uku sun jikkata a harin, kafin a harbe maharan biyu har lahira, lamarin ya faru ne a wani shingen binciken sojoji da ke ƙofar shiga birnin Hebron.

Bayan harin, Firaministan Isra’ila, Benjamin Netanyahu, ya ce ya umarci sojoji su shirya killace Yammacin Kogin Jordan gaba ɗaya, daga baya a ranar Juma’a, cewar Al Jazeera.

Kara karanta wannan

Gwamnatin Tinubu ta ɗauko hanyar gyara, za a samu rangwamen tsadar rayuwar kwana 90

Yadda aka yi musayar wuta a Isra'ila

Harin ya faru ne a lokacin da ake fama da tsananin tashin hankali, inda wasu Yahudawa masu tsattsauran ra’ayi ke kai hare-hare kan Falasɗinawa yayin girbin zaitun na shekara-shekara.

Hotunan bidiyo da BBC ta tabbatar da sahihancinsu sun nuna musayar wuta mai tsanani tsakanin sojojin Isra’ila da maharan.

Rundunar sojin Isra’ila ta ce ta gano makamai da alburusai masu yawa a cikin motar maharan. Ta kuma bayyana cewa tana zargin maharan sun shirya kai wani babban hari a kan babbar hanyar Route 35 da ke kusa, amma suka gamu da shingen binciken sojoji, wanda ya sa suka buɗe wuta a wurin.

Wasu hotunan kyamarar tsaro da ba a tabbatar da sahihancinsu ba sun nuna wasu mutane biyu suna fitowa daga mota dauke da abin da ake ganin bindiga da bindiga mai sarrafa kanta, sannan suka fara harbe-harbe kan sojoji a shingen binciken kafin sojojin su mayar da martani.

Kara karanta wannan

'Yan bindiga sun farmaki ayarin motoci a Sokoto, an kashe malami da wasu mutane

Yadda hari ya shafi zaben Isra'ila

Harin ya fara shafar kamfen ɗin zaɓen da ake gudanarwa, inda Netanyahu, wanda ya gina kamfen ɗinsa kan alkawarin samar da tsaro, ya ce jam’iyyarsa ta Likud za ta soke wasu tarukan yaƙin neman zaɓen da aka shirya gudanarwa a safiyar Juma’a.

Ya kuma ziyarci wurin da harin ya faru a yammacin Juma’a, inda ya ce Isra’ila a shirye take ta ɗauki “matakai masu faɗi” a Yammacin Kogin Jordan.

Bezalel Smotrich, abokin haɗin gwiwar Benjamin Netanyahu a gwamnatin haɗin gwiwa kuma ɗan siyasa mai tsattsauran ra’ayi, ya yi kira da a ƙaddamar da wani gagarumin farmakin soji a Yammacin Kogin Jordan, kamar waɗanda aka gudanar a Gaza ko Lebanon.

Shi kuwa Itamar Ben Gvir, ministan tsaron cikin gida mai tsattsauran ra’ayi, ya yi kira da a rusa Hukumar Falasɗinawa mai cin gashin kanta.

Netanyahu ya yi barazana ga Iran

Mun ba ku labarin cewa Benjamin Netanyahu ya yi barazana ga Mojtaba Khamenei, sabon jagoran addini na Jamhuriyar Musulunci ta Iran.

Kara karanta wannan

Rigima sabuwa: Sabon shirin da Amurka da Iran suka shirya kan Iran

Ya zargi sabon jagoran Iran da bin sawun mahaifinsa, Ayatollah Ali Khamenei, wanda aka kashe a harin sama a farkon yaƙin Amurka da Isra’ila kan Iran.

Kalaman sun fito ne yayin da Netanyahu ke shirin tunkarar zaɓen Isra’ila, tare da ci gaba da fuskantar shari’ar zargin cin hanci da rashawa da yake musantawa.

Asali: Legit.ng