A Lokacin da Ake Rokon Talaka Ya Kara Hakuri, An Saya wa Matasan APC Motocin 'N1bn'

• Shugaban matasan APC na kasa, Dayo Israel ya yi wa mutanensa rabon sababbin motocin Toyota Prado 2026
• Jam’iyyar NDC ta yi lissafin cewa an kashe sama da N1bn a kan motocin alhali an kyale talakawa suna wayyo Allah
• N1.05bn kiyasi ne da NDC ta yi bisa farashin motocin domin ba a san ainihin kudin da aka kashe a wajen sayensu ba

M Malumfashi ya shafe shekaru 10 yana kawo labaran Hausa musamman na siyasa, addini, tarihi, wasanni da al’ada

Abuja - Jam’iyyar NDC ta soki APC bayan shugaban matasanta na kasa, Dayo Israel, ya sanar da raba sababbin manyan motoci.

Dayo Israel ya yi rabon Toyota Prado na 2026 ga wasu zababbun shugabannin matasa domin taimaka wajen yi wa APC kamfe.

NDC ta soki kashe N1.05bn kan motocin matasa

NDC ta ce motocin guda bakwai da aka nuna a wani bidiyo sun kai kimanin Naira biliyan 1.015 a cewar jaridar Vanguard.

Kara karanta wannan

INEC ta tsaida lokacin da Pantami da Aminu Gwarzo za su san makomar takararsu

Jam’iyyar hamayyar ta yi kiyasin cewa kowace mota tana kan Naira miliyan 145 a kasuwa.

NDC ta zargi gwamnatin Shugaba Bola Tinubu da kashe kudi kan jin dadin ’yan siyasa, yayin da talakawa su ke fama.

Tun da Bola Tinubu ya shiga ofis a 2023, kukan tsadar rayuwa ya karu sosai kuma ana ta kokarin kawo a talaka sa'ida a kasar.

NDC ta ce ana tilasta wa ’yan Najeriya su jure wahalhalun sauye-sauyen tattali, amma an ba ‘yan siyasa motoci masu tsada.

Jam'iyyar NDC ta yi kira a guji zaben APC

Saboda haka ne jam’iyyar ta kar yin kira ga ’yan Najeriya da su kada kuri’unsu domin cire APC daga mulki a zaben shekarar 2027.

Ta kuma ce dan takararta na shugaban kasa, Peter Obi ya kuduri aniyar rage kudin tafiyar da gwamnati idan ya samu nasara.

Meyasa aka raba wa matasan APC motoci?

Kara karanta wannan

G100: Atiku, Peter Obi suna daf da tsaida ‘dan takara 1 da zai tunkari Tinubu

A nasa bangaren, Dayo Israel ya ce an ba shugabannin matasan APC motocin ne domin taimaka musu wajen harkokin siyasa.

Za a yi amfani da motocin na Prado wajen gudanar da ayyukan wayar da kai da neman goyon bayan masu zabe a fadin Najeriya.

Remi Tinubu ta saya wa 'yan APC motocin?

Dayo Israel ya kuma gode wa uwargidan shugaban kasa, Oluremi Tinubu, bisa goyon bayan da take bai wa tsarin matasan jam’iyyar.

Bayani da hotunan da aka gani ya sa aka fara zargin akwai hannun Sanata Remi Tinubu wajen sayen motocin na biliyoyin kudi.

A doka, Mai dakin shugaba Bola Tinubu ba ta da wani ofis. Sai dai an saba jin ta bada kyautar makudan kudi bayan hawansu mulki.

Matashin ya yi bayanin a kafar sada zumunta na X a ranar Lahadi, 25 ga Oktoba 2026 kamar yadda za a iya gani a shafin Parallel Facts.

2027: Jam'iyyar NDC za ta fara kamfe

Labarin da aka samu shi ne NDC ta kafa kwamitin yaƙin neman zaɓen shugaban kasa na 2027 mai mambobi sama da 150.

Kara karanta wannan

Tinubu zai fara karɓar harajin 25% daga kuɗaɗen shigan ƴan Najeriya?

Jam’iyyar ta naɗa Ibrahim Hussain Abdulkarim a matsayin Darakta Janar a takarar shugaban kasa, zai tunkari APC da ADC.

Seriake Dickson da Babachir Lawal da wasu manyan NDC za su dage wajen ganin nasarar Peter Obi/Rabiu Kwankwaso.

Asali: Legit.ng