Sheikh Pakistan Ya Faɗi Aikin Tinubu a Kano da Ya Cancanci a Zaɓe Shi a 2027

• Tsohon shugaban hukumar NAHCON, Farfesa Abdullahi Saleh Pakistan, ya ce ayyukan sama da Naira tiriliyan tara sun isa Tinubu ya samu wa’adi na biyu
• Pakistan ya ce tsaro ya inganta a wasu yankunan Arewa ƙarƙashin Tinubu, musamman Arewa maso Gabas
• Malamin ya ce bai ga wani gamsasshen shirin Atiku Abubakar na magance matsalar tsaro ba, yana mai cewa zai ci gaba da goyon bayan Tinubu

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kano - Tsohon shugaban hukumar kula da aikin hajjin Najeriya (NAHCON), Farfesa Abdullahi Saleh Pakistan, ya yabawa Bola Tinubu.

Pakistan ya ce Bola Tinubu ya cancanci wa’adi na biyu saboda ayyukan da gwamnatinsa ta gudanar da kuma abin da ya bayyana a matsayin ingantuwar tsaro.

Pakistan, wanda kuma shi ne jagoran ƙungiyar Izala a Jihar Kano, ya bayyana hakan ne yayin wata hira da DCL Hausa da aka wallafa a Facebook.

Kara karanta wannan

Yadda gwamnatin Buhari ta wulakanta Tinubu duk da sadaukarwar da ya yi mata

Ayyukan da Tinubu ya yi a Kano

Pakistan ya ce gwamnatin tarayya ta gudanar da ayyukan da kuɗinsu ya haura Naira tiriliyan tara a Kano.

Ya ce mutane da dama ba su san cewa ayyukan da suke gani a muhallansu gwamnatin tarayya ce ke gudanar da su ba.

Malamin ya bayyana cewa gwamnan Kano ya shaida musu yayin wata ganawa cewa gwamnatin tarayya tana gudanar da ayyuka da dama a jihar, amma mutane da yawa ba su san cewa tallafin gwamnatin tarayya ne ba.

Ya kawo misalin samar da na’urorin samar da wutar lantarki ta hasken rana ga Jami’ar Arewa maso Yamma da ke Kano, wanda ya ce ya ci Naira biliyan shida, duk da cewa jami’ar mallakin gwamnatin jihar ce.

Ya kuma ce gwamnatin tarayya ta samar da tsarin wutar lantarki ta hasken rana ga gidan rediyon Kano, wanda ya ci Naira biliyan biyu.

Pakistan ya ce zai ci gaba da yaɗa manufofin gwamnatin Tinubu saboda ya yi imanin shugaban ya nuna ƙwarewar shugabanci kuma ya cancanci wani wa’adi domin kammala ayyukan da ya fara.

Kara karanta wannan

Tinubu na Kaduna, El Rufai ya jefa masa tambayoyi 12, ya tuna masa hadisin Manzo

Ya kawo misalin hanyar Kaduna zuwa Abuja, inda ya ce a baya matafiya suna fuskantar matsanancin ƙalubalen tsaro, amma yanayin ya inganta ƙarƙashin gwamnatin Tinubu.

Pakistan ya yi magana kan matsalar tsaro

Malamin ya kuma kare matsayinsa kan matsalar tsaro bayan yaɗuwar wani bidiyo da ake zargin ya bayyana cewa garkuwa da mutane ba matsala ba ce a Arewacin Najeriya.

Ya ce an yi wa bidiyon gyara, yana mai bayanin cewa hujjarsa ita ce tsohon Shugaba Muhammadu Buhari ya gaji matsalar Boko Haram, yayin da babu matsalar ’yan bindiga a Katsina, Kaduna, Sokoto da Zamfara a wancan lokacin.

A cewarsa, Tinubu ma ya gaji matsalar garkuwa da mutane da ragowar ’yan Boko Haram daga gwamnatin Buhari.

Ya ƙara da cewa matsalar garkuwa da mutane ta zama babbar barazana a Zamfara a lokacin mulkin Buhari, lokacin da tsohon ministan tsaro shi ma ɗan jihar ne.

Pakistan ya ce ya yi imanin cewa rashin tsaro ya ragu sosai ƙarƙashin Tinubu, musamman a Arewa maso Gabas, inda ya yi iƙirarin cewa rahotannin kashe-kashen jama’a da yawa ba su yawaita kamar da ba.

Kara karanta wannan

Ana zargin yana tare da APC, Kwankwaso ya bada shawara kan sake zaɓen Tinubu a 2027

Game da zaɓen shugaban ƙasa na 2027, ya ce tsohon mataimakin shugaban ƙasa, Atiku Abubakar, bai gamsar da shi cewa yana da tsarin da ya fi na Tinubu wajen magance matsalar tsaro ba.

Ya ce bai ga wani bayani mai gamsarwa daga Atiku kan yadda yake shirin magance matsalar ba.

Pakistan ya kuma musanta rahotannin da ke cewa ya yi barazanar cewa Najeriya za ta faɗa cikin tashin hankali idan ba a sake zaɓen Tinubu ba.

Sai dai malamin ya ce ba zai yi amfani da matsayinsa na addini wajen inganta muradunsa na siyasa ba.

Har ila yau, ya ce yana ware ayyukansa na addini daga siyasa, kuma ba ya amfani da mimbarin wa’azi wajen shawo kan mabiyansa su rungumi ra’ayoyinsa na siyasa.

Ya ƙara da cewa ba ya tilasta wa ’ya’yansa su goyi bayan zaɓinsa na siyasa, yana mai jaddada cewa kowane ɗan Najeriya na da ’yancin kasancewa da ra’ayinsa na siyasa da bayyana shi.

Talauci: Tinubu ya zargi yan adawa

An ji cewa Shugaba Bola Tinubu ya zargi jam’iyyun adawa da haddasa yunwa da talauci a Najeriya, yayin da ya kaddamar da yakin neman zabensa a Kaduna.

Tinubu ya kare cire tallafin man fetur, yana mai cewa hakan ya kawo karshen cin hanci, karya takardun biyan kudi da safarar mai.

Asali: Legit.ng