Duk da Fargaba a Kaduna, APC Ta Yi Alƙawari ga Tinubu yayin da Zai Fara Kamfen

• Jam’iyyar APC ta tabbatar da cewa za a samu dimbin magoya baya a bikin kaddamar da yakin neman zaben Shugaba Tinubu ranar Asabar a Kaduna
• Sakataren yada labaran APC na Arewa maso Yamma, Mailafiya Mada, ya ce an yi tanadin tsaro da kula da taron duk da karancin wurin taron
• Mada ya bayyana cewa wakilai daga jihohi 36 da Abuja za su halarci taron, tare da magoya bayan jam’iyyar da ’yan siyasa daban-daban

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kaduna - Jam’iyyar APC ta yi magana kan shirye-shirye kaddamar da kamfen din Shugaba Bola Tinubu a Kaduna.

APC ta tabbatar da cewa ana sa ran dimbin magoya bayanta za su halarci bikin kaddamar da yakin neman zaben shugaban kasa ranar Asabar a Kaduna.

Kara karanta wannan

Ebola: Gwamnatin Tinubu ta yi magana kan 'yiwuwar' hana taruwar jama'a

Mailafiya Mada, sakataren yada labaran APC na Arewa maso Yamma, ne ya bayar da wannan tabbaci yayin wata hira da yan jarida, cewar Daily Nigerian.

Mada ya ce an yi la’akari da batutuwan tsaron jama’a, karfin wurin taro, kayan aiki da kuma yadda za a kula da taron, tare da daukar matakan shawo kansu.

Ya amince da damuwar cewa filin wasa na Ranchers Bees Stadium na iya zama karami wajen daukar yawan mutanen da ake sa ran za su halarta, amma ya bayyana cewa ana gyaran filin wasa na Ahmadu Bello Stadium, wanda aka yi tunanin amfani da shi a madadin.

A cewarsa, gyaran da ake yi wa filin wasan da kuma karancin lokacin shirye-shirye sun tilasta wa masu shirya taron neman wani wuri na daban domin kaddamar da yakin neman zaben.

Ya ce shugabannin yakin neman zaben sun kuma yi la’akari da yiwuwar yawan jama’ar da za su halarta ya zarce karfin wurin da aka zaba.

Kara karanta wannan

Yan Majalisa 8 da suka bar APC sun canza shawara bayan haɗuwa da Shugaba Tinubu

Mada ya ce:

“Muna da adadin mutanen da za su iya shiga cikin filin, yayin da za a tsara yadda za a kula da sauran mutanen da za su kasance a wajen wurin taron.”

Mista Mada ya jaddada cewa manufar ba wai kawai samar da wurin da kowa zai samu damar shiga ba ce, har ma da nuna irin goyon baya da kaunar da ake yi wa shugaban kasa da jam’iyyarsa.

Ya bayyana cewa shugabannin jam’iyyar na jihohi, wadanda za su jagoranci tawagogi daga sassan kasar, sun san matsalar karancin wurin taron kuma ana sa ran za su bi tsarin da shugabannin yakin neman zaben suka tsara.

An yi tanadin tsaro da kula da taron

Dangane da tsaro da kula da jama’a, Mada ya ce an yi la’akari da matsalolin da ka iya tasowa sakamakon taron a matsayin wani bangare na shirye-shiryen gudanar da gangamin.

Ya ce masu shirya taron sun fahimci bukatar kula da dimbin jama’ar da ake sa ran za su halarta, tare da tabbatar da gudanar da taron cikin kwanciyar hankali.

Kara karanta wannan

Tashin hankali: Yan daba ɗauke da makamai sun kewaye jigon APC, sun kashe shi nan take

Da aka tambaye shi adadin mutanen da ake sa ran za su halarta, Mada ya ce yana da wahala a bayyana takamaiman adadi saboda kungiyoyi da daidaikun mutanen da ake sa ran za su halarta.

Ya bayyana cewa tawagogi daga jihohi 36 da Babban Birnin Tarayya, Abuja, za su halarci taron, tare da magoya bayan da aka tattaro ta hanyar tsarin jam’iyya da kuma ’yan siyasa daban-daban.

Gwamnonin Arewa sun magantu kan takarar Tinubu

An ji cewa gwamnonin jihohin Arewacin Najeriya sun tabbatar da goyon bayansu ga Shugaba Bola Ahmed Tinubu 100%.

Gwamnonin sun bayyana cewa wajibi ne Arewa ta mutunta yarjejeniyar karba karba da ta yi da Kudu tun a shekarar 1999.

Gwamna Uba Sani na jihar Kaduna ya ce yarjejeniyar ta tanadi cewa Arewa za ta yi wa’adi biyu a jere, wanda Shugaba Muhammadu Buhari ya yi.

Asali: Legit.ng