An Shirya Hallaka Atiku Ana Tunkarar Zaben 2027? APC Ta Magantu
- Kwamitin yaƙin neman zaɓen shugaban ƙasa na APC ya yi magana kan zargin cewa akwai shirin kashe Atiku Abubakar
- APC ta buƙaci Timi Frank ya gabatar da hujjoji kan zargin, tare da kira ga hukumomin tsaro su gayyace shi domin gudanar da bincike
- Timi Frank ya nemi Donald Trump da sauran shugabannin ƙasashen duniya su sa baki kan zargin yunƙurin tsoratarwa da kama Atiku
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.
ABUJA: Kwamitin yaƙin neman zaɓen shugaban ƙasa na jam’iyyar All Progressives Congress (APC-PCC) ya yi magana kan rade-radin wai ana shirin hallaka Atiku Abubakar.
Kwamitin ya bayyaa cewa babu wani shirin kashe tsohon mataimakin shugaban ƙasa, Atiku Abubakar, ɗan takarar shugaban ƙasa na jam’iyyar African Democratic Congress (ADC).
Source: Getty Images
A cikin wata sanarwa da ya fitar ranar Talata, mai magana da yawun kwamitin yaƙin neman zaɓen APC, Dele Alake ya ƙaryata labarin wanda Bayo Onanuga ya wallafa a X.
An musanta zargin shirin hallaka Atiku
Alake ya ce ya ce zargin da Timi Frank, wani mamba na ADC, ya yi ƙarya ne, kuma dole ne ya gabatar da hujjoji don tabbatar da shi.
Sanarwar ta ce:
“Mun yi watsi da zargin cewa fadar shugaban ƙasa ta Najeriya ko kwamitin yaƙin neman zaɓen APC na da hannu a duk wani shiri na kashe tsohon mataimakin shugaban ƙasa, Atiku Abubakar, ko wani ɗan adawa.
"Wannan babban zargi ne da dole Mista Frank ya tabbatar. Saboda haka, muna kira ga hukumomin tsaro su gayyace shi domin ya gabatar da hujjojinsa, ganin girman zargin da kuma muhimmancin kare rayuka cikin gaggawa.”
Kwamitin ya kuma yi watsi da rahotannin da ke cewa an janye jami’an tsaron Atiku wanda hakan zai zama barazana.
Ya ce:
"Rahoton cewa an janye jami’an tsaron da aka ware wa tsohon mataimakin shugaban ƙasa ƙarya ce tsagwaronta. Atiku na samun cikakken kariya daga ’yan sanda da Hukumar Tsaron Farin Kaya (DSS).”
Source: Getty Images
Kariyar da Tinubu ya ba yan takara
Ya ƙara da cewa, sabanin ƙaryar da Timi Frank ke yaɗawa, Shugaba Tinubu ya bayar da umarni kwanan nan ga hukumomin tsaro su ƙara ƙarfafa kariya ga ’yan takarar shugaban ƙasa, mataimakin shugaban ƙasa, gwamnoni da mataimakansu a faɗin ƙasar.
Alake ya bayyana cewa, kasancewarsa tsohon mataimakin shugaban ƙasa, Atiku na samun matakan kariya biyu da gwamnati ke ɗaukar nauyinsu.
Ya ƙara da cewa Shugaba Tinubu ya ƙara tsaurara tsaron Atiku a matsayinsa na ɗan takarar shugaban ƙasa gabanin babban zaɓen 2027.
Atiku ya yi wa Tinubu martani mai zafi
A baya, an ji cewa Atiku Abubakar ya ce kwatanta cire tallafin fetur da wani bangaren tarihin Annabi Musa ya nuna yadda Tinubu bai fahimci wahalhalun da ’yan Najeriya ke ciki ba.
Tsohon mataimakin shugaban ƙasar ya ce zai rage tsadar rayuwa ta hanyar tallafa wa kayayyakin man fetur da aka tace a Najeriya kawai.
Atiku ya soki gwamnatin Tinubu kan matsalar rashin tsaro, yana mai cewa dole ne shugaban ƙasa ya kare rayuka da dukiyoyin al’umma.
Asali: Legit.ng
