Abubuwan da Suka Hana Atiku, Obi da Sauransu Haduwa Su Kifar da Tinubu

• Shugabannin ’yan adawar Najeriya na ci gaba da tattaunawa domin samar da haɗin kai da zai iya ƙalubalantar Shugaba Bola Tinubu a zaɓen shugaban ƙasa na 2027
• Sai dai burin shugabannin siyasa daban-daban, saɓanin akidu da rashin cimma matsaya kan wanda zai zama ɗan takarar haɗin gwiwar na ci gaba da kawo cikas ga ƙoƙarin
• Wasu masu ruwa da tsaki sun yi gargaɗin cewa rashin haɗin kan ’yan adawa na iya ba Tinubu damar sake samun nasara, yayin da wasu ke ganin cewa lokaci ya kusa ƙurewa

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja – Duk da cewa shugabannin ’yan adawar Najeriya na son ƙalubalantar Shugaba Bola Tinubu a 2027, har yanzu suna fuskantar ƙalubalen samar da haɗin kai mai ɗorewa wanda zai ba su damar tsayawa takara a matsayin ɓangare guda.

Kara karanta wannan

Shin Tinubu ya karya doka da ya ce ba zai je kamfe wasu jihohin Najeriya ba? An samu bayani

Yayin da ake ci gaba da shawarwari tsakanin jam’iyyun adawa, burin samun kujerar shugaban ƙasa, saɓanin akidu da rashin sanin yadda za a zaɓi ɗan takara na haɗin gwiwa na barazana ga nasarar tattaunawar.

Vanguard ta wallafa cewa Tinubu ya ƙaddamar da majalisar gangamin neman zaɓensa, wadda ta ƙunshi wakilai daga Accord Party, APGA da PDP.

Matsalar rashin haɗin kai

Sanata Ben Obi, wanda ya ce ya ɗauki nauyin haɗa manyan shugabannin ’yan adawa domin tattaunawa, ya yi gargaɗin cewa rashin cimma yarjejeniya na iya ƙara wa Tinubu damar lashe zaɓen.

Ben Obi ya bayyana cewa ya tuntubi Atiku Abubakar, Peter Obi da Seyi Makinde domin ƙoƙarin samar da matsaya ɗaya a tsakaninsu.

Ya ce yana ganin cewa idan ’yan adawa suka kasa haɗa kai, za su ɓata lokacinsu ne kawai, domin hakan na iya sauƙaƙa wa shugaban ƙasa mai ci samun nasara.

Ya kuma bayyana cewa yana da alaƙa ta kusa da shugabannin, inda ya ce Atiku abokinsa ne kuma shugabansa, yayin da yake ɗaukar Makinde da Peter Obi a matsayin ƙannensa.

An yi jinkirin fara tattaunawa

Kara karanta wannan

2027: Tinubu ya yi kira ga majalisa bayan nada sababbin mukamai a INEC

Babban mai ba da shawara kan sadarwa na gangamin neman zaɓen shugaban ƙasa na Adebayo-Bugaje, Mark Adebayo, ya ce ɗaya daga cikin manyan matsalolin haɗin kan ’yan adawa shi ne jinkirin fara tattaunawar.

A cewarsa, tattaunawar haɗa jam’iyyun siyasa domin marawa ɗan takara guda baya ya kamata ta fara aƙalla shekaru uku kafin zaɓe, tare da gina tsarin siyasa da zai taimaka wajen gudanar da gangami a faɗin ƙasar.

Ya ce ba abu ne mai sauƙi ba a fara irin wannan muhimmin aiki a jajibirin babban zaɓe.

Adebayo ya kuma bayyana cewa saɓanin akidu da ra’ayoyin shugabanci tsakanin jam’iyyun da ’yan takararsu na daga cikin manyan ƙalubalen da ke hana haɗin kan.

Wa zai jagoranci haɗin gwiwar?

Baya ga bambancin akidu, har yanzu akwai tambayoyi kan wanda zai zama ɗan takarar haɗin gwiwar, yadda za a zaɓe shi da kuma irin yarjejeniyar da sauran masu neman takara za su amince da ita.

Zaɓen ɗan takara na iya buƙatar cimma matsaya tsakanin shugabanni, yarjejeniyar siyasa ko wata hanya da dukkan jam’iyyun za su amince da ita.

Haka kuma, akwai buƙatar cimma matsaya kan wanda zai zama mataimakin ɗan takara, shugaban kamfen, kuɗin gudanarwa, da yadda za a tattara magoya baya a ƙasa baki ɗaya.

Kara karanta wannan

Akwai dalili: Me yasa gwamnoni 33 ke goyon bayan tazarcen Tinibu?

Idan jam’iyyun suka kasa fayyace waɗannan abubuwa tun da wuri, haɗin gwiwar na iya kasancewa a takarda kawai, yayin da kowace jam’iyya ke ci gaba da gudanar da gangaminta da manufofinta daban.

Ra’ayoyin Ben Obi da Mark Adebayo sun nuna cewa ’yan adawa na buƙatar fiye da zama tare domin tattaunawa.

Dole ne su samar da tsarin da zai warware saɓani, tabbatar da amincewa da ɗan takara guda da kuma haɗa ƙarfinsu wajen neman zaɓe.

Kiran Rabiu Kwankwaso ga Atiku Abubakar

A wani labarin, kun ji cewa mataimakin ɗan takarar shugaban ƙasa na NDC, Rabiu Kwankwaso, ya bayyana cewa ya roƙi Atiku Abubakar, ya janye daga takarar shugaban ƙasa a 2027.

Kwankwaso ya ce ya roki wasu Fulani su tattauna da Atiku kafin su koma garuruwansu da ƙauyukansu, domin su shawo kansa ya ajiye burinsa na neman shugabancin ƙasa.

Wannan mataki na Kwankwaso na daga cikin abubuwan da ke nuna irin bambancin ra’ayi da burin siyasa da ke tattare da tattaunawar haɗa kan ’yan adawa gabanin zaɓen 2027.

Asali: Legit.ng