Wasu 'Dalilai' da Ka Iya Jefa ’Yan Siyasar Najeriya cikin Talauci bayan Barin Ofis

Akwai dalilai da dama da ka iya sa 'yan siyasa su shiga talauci bayan sun bar ofis wanda a baya suke fantamawa yadda suka ga dama saboda damarmaki da suke samu.

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Wasu daga cikin dalilan sun haɗa da ƙalubalen komawa rayuwa ta yau da kullum bayan dogon lokaci a harkar mulki.

Dalilai da ke talauta wasu 'yan siyasa

Akwai matsalolin kuɗi saboda rashin tsari kafin ko lokacin mulkinsa, da kuma batutuwa masu nasaba da cin hanci da ɓarna ko ɓacin suna, cewar rahoton BBC Hausa.

Da yawa daga cikin wasu 'yan siyasa suna kokawa kan yadda suke tafiyar da rayuwarsa cikin wahala bayan rasa madafun iko.

Legit Hausa ta yi bincike kan wasu dalilai da ake ganin suna da tasiri wurin talauta 'yan siyasa bayan barin mulki.

1. Matsalolin tattalin arziki da sauyin rayuwa

• Raguwar kuɗin shiga:

Albashin 'yan siyasa yawanci yana da tsoka, amma baya wadatarsu har tsawon rayuwarsu.

Sauka daga kujerar mulki yana nufin raguwar kuɗin shiga, musamman idan aikin da suka yi kafin shiga siyasa ba mai ɗaukar ido ba ne.

• Rashin hanyar samun kuɗi:

Wasu 'yan siyasa ba su da wata hanya ta samun kuɗi bayan saukarsu daga ofis, wani lokaci ba su da ƙwarewar da za su iya amfani da ita wajen samun aiki a wajen harkokin siyasa.

• Yawan bashin da aka tara:

'Yan siyasa na iya tara bashi yayin mulkinsu ciki har da na yaƙin neman zaɓe ko na kashe kuɗi na karan kansu.

Wannan na iya zama nauyi a wuyansu idan kuɗin shigar su ya ragu bayan sun bar ofis da suke takama da ita.

• Sabawa da daukar nauyin rayuwarsu:

Yayin da suke ofis, gwamnati ke ɗaukar nauyin buƙatu kamar lafiya, sufuri da masauki.

Bayan sun sauka, waɗannan alfarma sukan ƙare, lamarin da ke jefa su cikin matsin kuɗi.

2. Rashin kyakkyawan tsarin kuɗi da shiri

• Rashin adana kudi:

Wasu 'yan siyasa ba su adana isasshen kuɗi a lokacin da suke ofis don amfani a rayuwarsu ta gaba.

• Zuba jari inda bai dace ba:

Suna iya zuba jari a wuraren da ba su da tabbas, ko kuma su kasa rarraba jarinsu yadda ya kamata ta wasu bangarori.

Hakan ya sa suke sabawa da rayuwar jin daɗi lokacin da suke mulki, sannan su kasa daidaitawa da sabuwar rayuwa mai sauƙi bayan sun sauka.

3. Cin hanci da rasa suna

• Tuhume-tuhume daga hukumomi:

Wasu na iya fuskantar tuhuma ko bincike saboda cin hanci da aikata laifi a lokacin da suke mulki, BusinessDay ta ruwaito.

Wannan yana jawo musu tanadin kuɗin hayar lauya don gudun ɓacin suna, wanda ke hana samun aiki ko sabon damar kasuwanci.

• Durƙushewar suna:

Rashin suna yana hana su samun damar sabbin ayyuka ko kasuwanci domin dogaro da kansu bayan rasa madafun iko.

Ra'ayin jama'a da abin da suke tsammani zai iya hana ɗan siyasa damar fara wata sabuwar rayuwa bayan barin ofis.

4. Kalubale wajen sauyin aikin yi

• Rashin kwarewar aiki:

Wasu ba su da ƙwarewa da gogewar da za su iya amfani da ita wajen samun aiki a wajen siyasa, suna buƙatar yin horo ko koyon sabbin sana'o'i.

Hulɗarsu yawanci tana cikin harkokin siyasa ne, wanda ke hana su samun haɗin gwiwa da masu ba da aikin kasuwanci ko ƙwararru daga wasu fannoni.

• Tsufa da matsalolin lafiya:

Wasu 'yan siyasa sukan shiga siyasa bayan shekarunsu ya ja, don haka suna fuskantar ƙalubale idan sun koma kasuwa, musamman idan lafiyarsu ta raunana saboda damuwar aiki.

Sanata Na'Allah ya koka da rayuwa

A baya, mun ba ku labarin cewa tsohon Sanata, Bala Ibn Na’Allah, ya bayyana cewa yawancin tsofaffin ‘yan majalisa ba sa iya biyan kudin makarantar ‘ya’yansu bayan barin ofis.

Ya ce ba wai yana fadin hakan ba ne don kare tsofaffin shugabanni ba, sai dai yana bayani ne kan gaskiyar abin da ke faruwa idan sun gama aiki.

Tsohon Sanatan wanda ya wakilci mazabar Kebbi ta Kudu a majalisa ta takwas, ya bayyana cewa tsofaffin ‘yan majalisa na jin jiki.

Wanda ya tantance Muhammad Malumfashi, babban edita a Legit.ng.

Asali: Legit.ng