Gwamna Radda Ya Waiwayi Sarakuna, Ya Yi Masu Babban Tagomashi a Katsina
- Gwamna Dikko Radda ya umarci a biya duk kuɗaɗen da sarakunan gargajiya ke bin gwamnati a jihar Katsina ba tare da ƙarin jinkiri ba
- Gwamnan ya bukaci sarakunan da ke fuskantar matsalar jinkirin biyan haƙƙoƙinsu su kai ƙorafinsu kai tsaye ofishinsa
- Dikko Umaru Radda ya kuma yi alƙawarin tallafa wa gyaran masallacin da ba a kammala ginawa ba, tare da ƙarfafa haɗin gwiwa wajen magance matsalar tsaro da bunƙasa al’umma
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Jihar Katsina - Gwamnan jihar Katsina, Dikko Radda, ya bayar da umarnin gaggauta biyan duk haƙƙoƙin kuɗi da ake bin sarakunan gargajiya a faɗin jihar.
Radda ya bayar da umarnin ne ranar Asabar, 14 ga watan Nuwamban 2026 yayin ganawa da sarakunan gargajiya, shugabannin addinai da wakilan al’umma a fadar Hakimin gundumar Baure.
Source: Facebook
Jaridar Daily Trust ta ruwaito cewa taron na daga cikin rangadin yaƙin neman zaɓen Tinubu/Dikko/Jobe a shiyyar Daura.
Radda ya nemi a biya sarakuna haƙƙoƙinsu
Gwamnan ya ce bai kamata a yi watsi da duk wani mai riƙe da sarautar gargajiya da ya cancanci samun irin waɗannan kuɗaɗe ba.
Ya kuma buƙaci sarakunan da ke fuskantar jinkirin biyan haƙƙoƙinsu da su kai ƙorafinsu kai tsaye ofishinsa, tare da gabatar da cikakkun bayanai domin ɗaukar matakin gaggawa.
A kalamansa, Radda ya ce:
“Ina kallon ku a matsayin iyayena, ni kuma ɗanku ne. Na zo nan ne domin girmama ku da kuma nuna godiyata bisa addu’o’inku, shawarwarinku da goyon bayan da kuke ba ni.”
Gwamnan zai tallafa wa gyaran masallaci
Radda ya kuma yi alƙawarin bayar da gudummawa daga kuɗaɗen aljihunsa domin tallafa wa aikin gyaran wani masallaci da ba a kammala ba a yankin.
Ya ɗauki wannan matakin ne bayan shugabannin al’umma sun gabatar masa da roƙon a taimaka wajen kammala aikin.
Gwamnan ya tuna cewa Baure na cikin al’ummomin da ya fara kamfen ɗinsa a shekarar 2023, yana mai cewa dawowarsa yankin na da nasaba da cika alƙawarin nuna godiya ga mutanen da suka mara masa baya.
Radda ya yi magana kan tsaro
Gwamnan ya yaba wa mazauna yankin bisa kyakkyawar tarbar da suka yi masa cikin lumana.
Ya sake jaddada aniyar gwamnatinsa ta ci gaba da aiki tare da sarakunan gargajiya, shugabannin addinai da sauran al’ummomi domin magance matsalar tsaro, tabbatar da zaman lafiya da kuma hanzarta ci gaba.
Gwamnan ya bayyana cewa an ƙirƙiri shirin raya al’umma (Community Development Programme – CDP) ne domin bai wa al’ummomi damar gano tare da tsara ayyukan da suka fi buƙata.
A cewarsa, wannan tsari zai taimaka wajen tabbatar da cewa ayyukan raya ƙasa sun dace da buƙatu da abubuwan da al’umma suka fi ba muhimmanci.
Ya tuna da gudummawar marigayi Buhari
Radda ya kuma amince da irin gudummawar da tsohon shugaban ƙasa, marigayi Muhammadu Buhari, ya bayar wajen ci gaban jihar da Najeriya baki ɗaya.
Ya tabbatar da cewa gwamnatinsa za ta ci gaba da ayyukan alheri da Buhari ya bari a matsayin gadonsa, tare da ƙara inganta jin daɗin mazauna jihar Katsina.
Source: Facebook
Gwamna Radda ya yi kora a gwamnati
A wani labarin kuma, kun ji cewa gwamnan jihar Katsina, Malam Dikko Umaru Radda, ya amince da sallamar shugaban gidan talabijin na jihar, Katsina State Television (KTTV), Malam Abba Zayyan.
Gwamnan ya ɗauki matakin ne bisa zargin cewa manajan ya kasa tafiyar da tashar yadda ya dace da manufofin gwamnatinsa, duk da makudan kuɗin da aka zuba wajen inganta ayyukanta.
Asali: Legit.ng
