Ana Batun Shirin Dage Zaben 2027, Majalisa Ta Gayyaci Shugaban INEC

• Majalisar Wakilai ta gayyaci shugaban INEC domin ya yi bayani kan shirye-shiryen gudanar da babban zaɓen 2027
• Ɗan majalisa Mansur Soro ya yi gargaɗin cewa ƙarancin kayan rajista, matsalolin sadarwa da ƙarancin ma’aikata na iya hana wasu ’yan Najeriya yin rajista
• Mataimakin Kakakin Majalisar, Benjamin Kalu, ya sauya shawarar a saurari shugaban INEC a zaman majalisa

​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Majalisar Wakilai ta gayyaci shugaban Hukumar Zaɓe Mai Zaman Kanta ta Ƙasa (INEC), Farfesa Joash Amupitan.

Majalisar wakilan ta gayyaci Amupitan ne domin ya yi bayani kan shirye-shiryen hukumar na gudanar da babban zaɓen 2027.

An ɗauki matakin ne bayan wani ƙuduri da ’yan majalisa Mansur Soro, mai wakiltar jam’iyyar APM daga Bauchi, da Abdussamad Dasuki, na ADC daga Sokoto, suka gabatar tare a zaman majalisar ranar Laraba, 28 ga watan Oktoban 2026, cewar rahoton Vanguard.

Kara karanta wannan

To fa: ADC ta fallasa makarkashiyar da ake shiryawa kan zaben 2027, ta ja kunnen Tinubu

Soro, wanda ya jagoranci gabatar da ƙudurin, ya ce sahihanci, gaskiya da karɓuwar zaɓen 2027 za su dogara matuƙa kan yadda INEC ta shirya gudanar da shi.

Ya bayyana cewa shirye-shiryen sun haɗa da rajistar masu zaɓe, wayar da kan jama’a, horas da ma’aikatan zaɓe, haɗin gwiwar tsaro da kuma aiwatar da jadawalin zaɓe a kan lokaci, jaridar The Punch ta kawo labarin.

Damuwa kan matsalolin rajistar masu zaɓe

Soro ya bayyana damuwa kan matsalolin da ake fuskanta a wasu cibiyoyin ci gaba da rajistar masu zaɓe a faɗin ƙasar.

Ya ce matsalolin sun haɗa da ƙarancin kayan rajista, ƙarancin ma’aikata, katsewar sadarwa da kuma dogon lokacin da mutane ke ɗauka kafin su kammala rajista.

A cewarsa, idan ba a magance matsalolin da wuri ba, za su iya hana wasu ’yan Najeriya samun damar yin rajista, musamman waɗanda za su yi zaɓe a karon farko, mazauna ƙauyuka, masu nakasa, ɗalibai da ma’aikata.

Kara karanta wannan

Isa Ashiru ya fito da gaskiyar zance bisa zargin ya fallasa El Rufai kan rashin tsaro a Kaduna

Ya kuma ce zaɓen gwamnan Ekiti da aka kammala kwanan nan ya samar da darussa da ya kamata INEC ta yi amfani da su wajen shirye-shiryen zaɓen 2027.

Darussan sun haɗa da yadda ake gudanar da zaɓe, amfani da fasaha, kula da kayan aiki, haɗin gwiwa da masu ruwa da tsaki, tsaro da kuma ƙarfafa halartar masu zaɓe.

An bukaci INEC ta bayyana matsayarta

Ɗan majalisar ya ce yin shiri tun da wuri yana da muhimmanci wajen sayen kayan zaɓe, samar da fasaha, ɗaukar ma’aikata da horas da su, da kuma gudanar da wayar da kan masu zaɓe.

Ya kuma jaddada muhimmancin tsara matakan tsaro, tantance wuraren da za su iya fuskantar matsaloli da kuma tabbatar da cewa an rarraba kayan zaɓe yadda ya kamata a faɗin ƙasar.

Soro ya gargaɗi cewa jinkirta magance matsalolin rajista, kayan aiki, fasaha da kuɗaɗe na iya rage amincewar jama’a da tsarin zaɓe, tare da kawo cikas ga gudanar da zaɓen cikin lumana.

An sauya yadda za a saurari shugaban INEC

Sai dai mataimakin Kakakin Majalisar Wakilai, Benjamin Kalu, ya ƙi amincewa da shawarar cewa Amupitan ya gabatar da bayaninsa a gaban zaman majalisar gaba ɗaya.

Kara karanta wannan

Gwamna Abba ya yi barazanar korar mukarraban gwamnatinsa, an ji dalili

Maimakon haka, Kalu ya ba da shawarar cewa shugaban INEC ya bayyana a gaban kwamitin majalisar mai kula da harkokin zaɓe, inda duk wani ɗan majalisa zai iya halartar zaman.

INEC za ta fitar da sabon jerin 'yan takara

A wani labarin kuma, kun ji cewa hukumar INEC ta ce za ta fitar da sabon jerin sunayen ’yan takarar zaɓen 2027 bayan kammala bitar bayanan da ta samu.

Shugaban INEC ya bayyana cewa hukumar ta samu ƙorafe-ƙorafe kan kuskuren rubuta sunayen wasu ’yan takara.

Asali: Legit.ng