Masussuka: Tinubu Bai Ji Daɗin Kisan Gillar da Aka Yi wa Sheikh ba, Ya ba da Umarni

Masussuka: Tinubu Bai Ji Daɗin Kisan Gillar da Aka Yi wa Sheikh ba, Ya ba da Umarni

  • Shugaba Bola Tinubu ya yi Allah wadai da kisan fitaccen malamin addinin Musulunci, Sheikh Yahaya Ibrahim Masussuka, da abokinsa, Adamu Abubakar
  • Tinubu ya bayar da umarnin gudanar da cikakken bincike kan kisan malamin da abokinsa, tare da cafke waɗanda suka aikata laifin domin gurfanar da su
  • Shugaban ƙasa ya miƙa saƙon ta’aziyyarsa ga iyalan mamatan, mabiyansu da al’ummar Katsina, tare da addu’ar Allah Ya jiƙansu, Ya kuma ba masu alhinin mutuwarsu haƙuri

Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Abuja - Shugaban ƙasa, Bola Ahmed Tinubu, ya yi Allah wadai da kisan fitaccen malamin addinin Musulunci, Sheikh Yahaya Ibrahim Masussuka, da abokinsa, Adamu Abubakar, a Dutsin-Ma, Katsina.

Shugaban ƙasar ya kuma bayar da umarnin gudanar da cikakken bincike kan musabbabin mutuwar mutanen biyu, inda ya ce dole ne a kamo waɗanda suka aikata laifin, a hukunta su.

Kara karanta wannan

Sheikh Ahmad Gumi ya fitar da saƙo kan kisan da aka yi wa Masussuka a Katsina

Tinubu ya jimamin rashin Sheikh Masussuka
Marigayi Sheikh Ibrahim Yahaya Masussuka. Hoto: Sheikh Ibrahim Yahaya Masussuka.
Source: Facebook

Tinubu ya magantu kan kisan Masussuka

Da yake mayar da martani kan lamarin, Bayo Onanuga, mai ba shugaban ƙasa shawara kan yaɗa labarai da dabarun sadarwa, ya ce Tinubu ya kaɗu matuƙa da labarin kisan, cewar Daily Trust.

Wasu ’yan bindiga ne suka kashe malamin da abokinsa a wani harin bindiga da suka kai musu a lokacin da suke cikin mota, a yammacin ranar Litinin.

Shugaban ƙasar ya bayyana kisan a matsayin wani mummunan aiki da ke cin zarafin ƙimomin zaman lafiya da tsarkin rayuwar ɗan Adam.

Onanuga ya ce Shugaba Tinubu ya miƙa saƙon ta’aziyyarsa ga iyalan mamatan, mabiyansu, da gwamnatin Katsina da al’ummar jihar baki ɗaya bisa wannan babban rashi da suka yi.

Tinubu ya yi addu'o'i ga Masussuka
Shugaba Bola Tinubu yayin taron majalisar zartarwa a Abuja. Hoto: Bayo Onanuga.
Source: Twitter

Masussuka: Umarnin da Bola Tinubu ya bayar

Ya ce shugaban ƙasar ya umarci rundunar ’yan sandan Najeriya da sauran hukumomin tsaro da abin ya shafa da su gaggauta ɗaukar mataki, tare da ƙarfafa binciken da rundunar ’yan sandan Katsina ta fara, cewar rahoton TheCable.

Kara karanta wannan

Farfesa Makari ya yi magana kan kashe Sheikh Masussuka

Ya ƙara da cewa Tinubu ya umurci jami’an tsaro da su gano waɗanda suka aikata kisan, su cafke su, sannan a gurfanar da su domin fuskantar hukunci bisa doka.

Shugaba Tinubu ya yi addu’ar Allah Ya jiƙan waɗanda aka kashe, Ya gafarta musu, sannan Ya ba iyalansu da duk waɗanda suke jimamin rasuwarsu haƙurin jure wannan babban rashi.

Kisan malamin ya jawo maganganu a fadin kasar baki daya duba da irin rashin tabbas kan rayukan malamai a Najeriya..

Ansaru ta dauki nauyin kisan Masassuka

An ji cewa kungiyar Ansaru mai alaƙa da Al-Qaeda ta ɗauki alhakin kashe Malam Yahaya Masussuka, wanda aka harbe har lahira a Dutsin-Ma ta jihar Katsina a ranar Litinin.

A cikin wani saƙon murya, ƙungiyar ta zargi malamin da kafirci da adawa da Musulunci, amma ba ta bayyana wani takamaiman laifi da ya aikata ba.

Malam Yahaya Masussuka ya dauki hankalin jama'a sosai a Najeriya, yayin da hukumomin tsaro ke fuskantar kira na gano waɗanda suka aikata kisan.

Asali: Legit.ng

Authors:
Abdullahi Abubakar avatar

Abdullahi Abubakar (Hausa editor) Marubuci kuma kwararren ɗan jarida ne da ya shafe shekaru 5 yana rubutu a fannin siyasa da harkokin yau da kullum. Ya kammala digirin farko a jami'ar Maiduguri. Ya samu horon aikin jarida a Reuters da AFP, ya sha halartar tarukan karawa juna sani game da bincike da adabi. Tuntube shi a abdullahi.abubakar@corp.legit.ng.