Wadanda Suka Kashe Sheikh Masussuka Sun Fito Sun Bayyana kan Su

• Ƙungiyar Ansaru mai alaƙa da Al-Qaeda ta ɗauki alhakin kashe Malam Yahaya Masussuka, wanda aka harbe har lahira a Dutsin-Ma ta jihar Katsina a ranar Litinin
• A cikin wani saƙon murya, ƙungiyar ta zargi malamin da kafirci da adawa da Musulunci, amma ba ta bayyana wani takamaiman laifi da ya aikata ba
• Malam Yahaya Masussuka ya dauki hankalin jama'a sosai a Najeriya, yayin da hukumomin tsaro ke fuskantar kira na gano waɗanda suka aikata kisan

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru huɗu, kuma kwararre ne a kawo rahotannin kasuwanci, siyasa da lamuran yau da kullum.

Jihar Katsina – Ƙungiyar Ansaru, mai alaƙa da ƙungiyar Al-Qaeda, ta ɗauki alhakin kashe Malam Yahaya Masussuka, inda ta zarge shi da kafirci da kuma adawa da Musulunci.

Ƙungiyar ta bayyana ɗaukar alhakin kisan ne a wani saƙon murya da ta fitar a ranar Talata, inda ta ce ta kai harin ne da misalin ƙarfe 8:30 na dare.

Kara karanta wannan

Sheikh Ahmad Gumi ya fitar da saƙo kan kisan da aka yi wa Masussuka a Katsina

Lauya mai fashin baki kan tsaro, Audu Bulama Bukarti ne ya bayyana sanarwar da kungiyar ta fitar a shafinsa na Facebook.

Sai dai, duk da cewa mai magana a cikin saƙon ya ce harin ya faru ne a ranar Talata, rahotannin farko sun nuna cewa an kashe malamin ne a daren Litinin, 26 ga Oktoba, 2026.

Ansaru ta zargi Masussuka da kafirci

A cikin saƙon muryar, Ansaru ta zargi Malam Yahaya Masussuka da kafirci da adawa da Musulunci, amma ba ta gabatar da takamaiman hujja ko wani laifi da ta ce ya aikata ba.

Abin da saƙon ya ƙunsa ya nuna cewa matsayin malamin na ƙarfafa tattaunawa tsakanin mabiya addinai daban-daban da kuma zaman lafiya na iya kasancewa cikin abubuwan da suka sa ƙungiyar ta ɗauke shi a matsayin wanda za ta kai wa hari.

Sai dai waɗannan zarge-zarge na Ansaru ne, kuma ba ta tabbatar da cewa malamin ya aikata wani laifi ba a sanarwar da ta fitar..

Kara karanta wannan

Gwamnan Katsina ya fadi matakin da za a dauka kan kashe Masussuka

Tarihin ƙungiyar Ansaru a Najeriya

Ansaru ta balle daga ƙungiyar Boko Haram a shekarar 2012 bayan rashin jituwa da shugabancin Abubakar Shekau.

Tun bayan ballewar, ƙungiyar ta gudanar da ayyukanta musamman a wasu sassan Arewa maso Yamma, ciki har da jihohin Zamfara, Kaduna da Neja.

Ƙungiyar tana da alaƙa da Al-Qaeda, kuma an danganta ta da ayyukan ta’addanci a Najeriya.

Duk da cewa Ansaru ta ɗauki alhakin kisan Masussuka, har yanzu ba a bayyana cikakken bayani kan yadda aka shirya harin ko hujjojin da ƙungiyar ta dogara da su wajen zargin malamin ba.

Sai dai har yanzu ba a tabbatar da wannan alaƙa ta hanyar binciken hukuma ba.

Bayanin gwamna Dikko Radda

A wani labarin, kun ji cewa Gwamnan jihar Katsina, Dikko Umaru Radda, ya yi Allah-wadai da kisan Malam Yahaya Masussuka, yana mai bayyana shi a matsayin malamin addinin Musulunci da ya yi fice.

An ruwaito cewa an harbe Masussuka tare da wani abokinsa da ba a bayyana sunansa ba a wajen gidansa da ke ƙaramar hukumar Dutsin-Ma a daren Litinin, 26 ga Oktoba, 2026.

A cikin wata sanarwa da babban sakataren yaɗa labaransa, Ibrahim Mohammed, ya fitar, Radda ya ce lamarin ya ba shi mamaki, tare da miƙa ta’aziyyarsa ga iyalan marigayin da al’ummar Musulmi.

Asali: Legit.ng