Ana Zargin Ebola Ta Ci Gaba da Yaduwa a Najeriya, NCDC Ta Gano Mutane 53 da Suka Yi Mu'amala
- NCDC ta tabbatar da kamuwar wata mata mai shekaru 42 da Ebola bayan ta dawo Najeriya daga Uganda ta Addis
- Hukumar ta gano mutane 53 da suka yi mu’amala kai tsaye da matar, yayin da ake zargi wani ya kamu da cutar a Rivers
- NCDC ta buƙaci asibitoci su ƙarfafa matakan kariya, tare da roƙon mutanen da ake bibiyarsu su ba jami’an lafiya cikakken bayani
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
FCT, Abuja - Hukumar Kula da Cututtuka Masu Yaɗuwa ta Najeriya (NCDC) ta ce tana binciken wani sabon wanda ake zargin ya kamu da cutar Ebola.
Hukumar NCDC na binciken ne bayan tabbatar da bullar cutar ga wata mata mai shekaru 42.

Source: Getty Images
Darakta-Janar na hukumar, Jide Idris, ne ya bayyana hakan yayin taron manema labarai a Abuja ranar Lahadi, 25 ga watan Oktoban 2026, cewar rahoton jaridar TheCable.
Ya ce wani mutum da ake zargin ya kamu da cutar a Jihar Rivers ya yi gwajin da ya nuna cewa ba shi da Ebola.
An gano mutane 53 da suka yi mu’amala da mai cutar
Jide Idris ya ce hukumar ta gano mutane 53 da suka yi mu’amala kai tsaye da matar da aka tabbatar ta kamu da cutar. Ana bibiyarsu domin tantance yiwuwar kamuwa da cutar.
Ya bayyana cewa an tanadi cibiyoyin killace masu cutar da kuma keɓe mutanen da ake sa ido a kansu.
“Mun gano mutane biyu da ake zargin sun kamu da cutar da kuma mutane 53 da suka yi mu’amala kai tsaye da su. Waɗannan mutane ne da suka yi mu’amala kai tsaye. Muna da cibiyar killace masu cutar da kuma cibiyar keɓewa,” in ji shi.
Yadda matar ta kamu da cutar
A cewar Jide Idris, matar mai shekaru 42 ta dawo Najeriya daga Uganda ta Addis Ababa a ranar 3 ga Oktoba, 2026, inda ta isa Abuja ta jirgin sama daga ƙasashen waje.
Ya ce matar ta fara nuna alamun rashin lafiya a ranar 7 ga Oktoba, sannan ta je wani asibiti mai zaman kansa a ranar 10 ga Oktoba.
Washegari, ta je wani asibiti mai zaman kansa, inda aka kwantar da ita domin samun kulawar likitoci.
NCDC ta samu rahoton lamarin a ranar 19 ga Oktoba, bayan haka ta fara bincike tare da ɗaukar samfurin gwaji daga matar.
A ranar 20 ga Oktoba, dakin gwaje-gwaje na ƙasa da ke da alhakin tabbatar da cututtuka ya tabbatar da cewa matar na ɗauke da Ebola.
Jide Idris ya ce alamomin da matar ta nuna sun haɗa da zazzabi, gudawa, ciwon jiki gaba ɗaya da ciwon makogwaro. Sai dai, a cewarsa, matar ba ta nuna alamar zubar jini ba.
NCDC ta ƙarfafa shirye-shiryen gwaji da kariya
Darakta-Janar ɗin ya bayyana cewa akwai dakunan gwaje-gwaje kusan 12 na gwamnati da masu zaman kansu da za su iya yin gwajin Ebola.
Ya ce hukumar ta ƙara ƙarfafa ƙarfin dakunan gwaje-gwajenta domin tabbatar da cewa ana binciken waɗanda ake zargin sun kamu da cutar cikin gaggawa.
NCDC ta kuma buƙaci asibitocin gwamnati da masu zaman kansu su ƙarfafa tantance marasa lafiya, rarrabe waɗanda ake zargin suna da cutar da sauran marasa lafiya, tare da tabbatar da bin ƙa’idojin kariya daga yaɗuwar cututtuka.
Hukumar ta jaddada muhimmancin samar wa ma’aikatan lafiya kayan kariya da suka dace, jaridar Leadership ta kawo rahoton.
A ƙarshe, Jide Idris ya roƙi mutanen da jami’an lafiya suka tuntuba su ba da haɗin kai ga masu bibiyar waɗanda suka yi mu’amala da mai cutar.
Ya ce ya kamata su bayar da sahihan bayanai game da wuraren da suka ziyarta, mutanen da suka haɗu da su da kuma duk wata alamar rashin lafiya da suka gani.

Source: Original
An kwantar da hankula kan Ebola
A wani labarin kuma, kun ji cewa ministan lafiya, Dr Muhammed Ali Pate, ya bukaci ’yan Najeriya da kada su firgita kan bullar cutar Ebola a ƙasar. Ministan ya bayyana cewa
Gwamnatin Tarayya na da ƙwararrun hukumomi da kayan aikin da ake buƙata domin dakile yaɗuwar cutar.
Asali: Legit.ng


