Zargin Badala: Hukumar Hisbah Ta Cafke Fitacciyar 'Yar TikTok a Kano

• Hisbah ta kama Amani Ishaq, Hauwa Khamis da Sa’adatu Muhammad kan wasu bidiyoyin da aka wallafa a TikTok
• An gurfanar da matan ukun a gaban Kotun Majistare mai lamba 5 da ke kan titin Court Road a Kano, yayin da ake ci gaba da bincike
• Hukumar ta ce tana nazarin bidiyoyin, amma ba a bayyana takamaiman tuhume-tuhume, sharuddan beli ko ranar sauraron shari’ar ta gaba ba

​​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Kano - Hukumar Hisbah ta Jihar Kano ta kama fitacciyar mai amfani da kafar sada zumunta ta TikTok, Amani Ishaq.

Hukumar Hisbah ta cafke Amani Ishaq ne tare da wasu mata biyu bisa zargin wallafa bidiyoyin da ake ganin sun saɓa wa ƙa’idojin addini da tarbiyya a jihar.

Mataimakin kwamandan hukumar, Dakta Mujahid Aminuddeen, ne ya tabbatar da kamen a cikin wata sanarwa, cewar rahoton jaridar Tribune.

Kara karanta wannan

'Yan bindiga sun gamu da mummunan bala'in da ya fi karfinsu cikim daji a Katsina

Ya bayyana sunayen sauran matan da aka kama a matsayin Hauwa Khamis da Sa’adatu Muhammad.

An gurfanar da matan a gaban kotu

Sanarwar ta bayyana cewa matan ukun sun gurfana a gaban Kotun Majistare mai lamba 5 da ke kan titin Court Road a Kano, yayin da ake ci gaba da bincike kan bidiyoyin da suka jawo lamarin.

Hukumar ta zargi Amani Ishaq musamman da wallafa bidiyoyin rawa a TikTok, waɗanda ta ce abubuwan da ke cikinsu ba su dace da koyarwar Musulunci da ƙa’idojin tarbiyya ba.

Hisbah ta ce tana nazarin bidiyoyin ne domin tantance matakin da ya dace ta ɗauka a kan lamarin, jaridar Leadership ta kawo labarin.

Sai dai hukumar ba ta bayyana takamaiman laifuffukan da ake zargin matan da aikatawa ba. Haka kuma, ba a fitar da bayanai kan sharuddan belinsu ko ranar da za a sake sauraron shari’ar ba.

Kamen ya sake jawo hankali kan amfani da TikTok

Kara karanta wannan

Rashin tsaro ya yi kamari, limaman masallatan Juma'a sun yi magana da murya 1

Lamarin ya sake jawo hankali kan yadda ake kula da abubuwan da ake wallafawa a kafafen sada zumunta a Jihar Kano.

Hukumar Hisbah na da alhakin aiwatar da dokoki da ƙa’idojin da suka shafi ɗabi’a da gudanar da harkokin addini a jihar.

A lokuta daban-daban, hukumar ta yi mu’amala da masu amfani da kafafen sada zumunta da masu ƙirƙirar abubuwan nishaɗi kan ayyukan da take ganin sun saɓa wa ƙa’idojin addini da tarbiyya.

Kamen na zuwa ne a lokacin da kafafen sada zumunta irin su TikTok ke ƙara zama wuraren nishaɗi, ƙirƙirar abubuwa da bayyana ra’ayoyin mutum.

Hisbah ta haramta tura fina-finai

A wani labarin kuma, kun ji cewa hukumar Hisbah ta Kano ta sanar da haramta sana'ar sauke da rarraba fina-finai ta amfani da wayoyin salula a fadin jihar.

Hukumar ta bayyana cewa matakin wani bangare ne na kokarinta na kare tarbiyyar al'umma da kuma inganta koyarwar addinin Musulunci a jihar.

Hisbah ta dauki matakin ne bayan samun korafe-korafen cewa wasu masu gudanar da sana'ar na yada fina-finan batsa.

Asali: Legit.ng