'Yan Bindiga Sun Gamu da Mummunan Bala'in da Ya Fi Karfinsu cikin Daji a Katsina
- Mahara 14 da ake zargi da zama ’yan bindiga sun gamu da gamonsu bayan artaba da mafarauta a ƙauyen Gidan Wawo da ke jihar Katsina
- Mafarauci mai suna Mohammed Ibrahim Jidda da matafiyi Jamilu Lawal sun mutu, yayin da aka ceto sauran matafiya uku da ransu
- Gwamnatin Katsina ta yi gargaɗin yiwuwar ramuwar gayya daga ’yan bindigar, tare da ƙarfafa matakan tsaro a yankin.
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Jihar Katsina - An kashe wasu mutane 14 da ake zargin ’yan bindiga ne bayan sun yi musayar wuta da mafarauta da suka dakile wani hari a ƙauyen Gidan Wawo, da ke unguwar Kakumi, ƙaramar hukumar Bakori a jihar Katsina.
Gwamnatin jihar ta ce wani mafarauci da matafiyi sun mutu a lamarin, yayin da aka samu nasarar ceto wasu mutane uku da ransu.
Source: Facebook
Kwamishinan tsaron cikin gida da harkokin cikin gida na jihar, Dakta Nasir Mu’azu, ne ya bayyana hakan a cikin wata sanarwa da aka fitar ranar Juma’a, 23 ga watan Oktoban 2026, cewar rahoton jaridar Daily Trust.
An samu bayanai kan 'yan bindiga tun farko
A cewar sanarwar, jami’an tsaro sun samu bayanan sirri cewa wasu ’yan bindiga 26 dauke da makamai, a kan babura 13, suna tafiya zuwa dajin Dawan Laila da ke ƙaramar hukumar Bakori.
Bayan samun wannan bayani, an sanya jami’an tsaro a yankin cikin shirin ko-ta-kwana domin dakile wani shiri na sace mutane da yawa a wasu al’ummomin da ke maƙwabtaka.
Sai dai daga bisani, maharan sun kai hari kan motar wani mutum mai suna Jamilu Lawal, mai shekara 50, wanda ke tafiya tare da wasu mutane uku daga unguwar Kakumi zuwa kasuwar Illela da ke jihar Sokoto. Sanarwar ta ce maharan sun ƙona motar a yayin harin.
Mafarauta sun kai dauki, An kashe mahara 14
Bayan samun labarin harin, mafarautan al’ummar Gidan Wawo sun gaggauta haɗuwa tare da tunkarar maharan, lamarin da ya haifar da musayar wuta tsakanin ɓangarorin biyu.
A yayin artabun, an kashe mutane 14 da ake zargin ’yan bindiga ne. Sai dai wani mafarauci mai shekara 29, Mohammed Ibrahim Jidda, ya rasa ransa a yayin fafatawar.
Haka kuma, wani mafarauci mai suna Usman Sunday, mai shekara 25, ya samu raunin harbin bindiga mai sauƙi, kuma a halin yanzu yana karɓar magani.
Sanarwar ta ƙara da cewa Jamilu Lawal ya ƙone har lahira a cikin motar da maharan suka cinna wa wuta. Amma sauran mutanen uku da ke cikin motar sun tsira, bayan da aka ceto su da ransu.
Gwamnati ta yi gargadin yiwuwa ramuwar gayya
Kwamishinan ya bayyana cewa bayanan sirri sun nuna yiwuwar ’yan bindigar su kai harin ramuwar gayya sakamakon asarar rayukan da suka yi a artabun, tashar Channels tv ta kawo rahoton.
Ya ce gwamnatin jihar na aiki tare da hukumomin tsaro domin hana sake kai hare-hare da kuma magance duk wata barazana da za ta iya tasowa a yankin.
Nasir Mu’azu ya yaba wa mafarautan al’umma da jami’an tsaro bisa jarumtakarsu wajen tunkarar maharan da kuma ceto mutanen da ke cikin haɗari.
Ya kuma yi kira ga mazauna yankin da su kwantar da hankalinsu tare da kai sahihan bayanai ga jami’an tsaro domin taimakawa wajen kare rayuka da dukiyoyi.
Source: Original
'Yan bindiga sun kashe mutane
A wani labarin kuma, kun ji cewa Akalla mutane 37 sun mutu bayan wasu da ake zargin ’yan bindiga ne sun kai hari a jihar Taraba.
'Yan bindigan sun riƙa harbe-harbe ba kakkautawa, kwashe kayan abinci daga shaguna tare da ƙona gidaje da wuraren kasuwanci.
Asali: Legit.ng
