Musulmai Sun Yi Rashi: Babban Malamin Musulunci a Najeriya, Sheikh Sa'idu Imam Ya Rasu

• Babban limamin Masallacin Juma’a na Shagon Goro da ke jihar Gombe, Sheikh Sa'idu Imam ya riga mi gidan gaskiya
• Rahotanni sun tabbatar da cewa za a yi jan'izar marigayin da misalin karfe 1:00 na tsakar rana a yau Litinin, 19 ga watan Oktoba, 2026
• Tsohon ministan sadarwa, Farfesa Isa Ali Oantami ya tabbatar da rasuwar malamin, inda ya mika sakon ta'aziyya ga iyalan Sheikh Saidu Imam

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Gombe, Nigeria - Sheikh Sa'idu Imam, babban limamin Masallacin Juma’a na Shagon Goro da ke jihar Gombe a Arewa maso Gabashin Najeriya ya riga mu gidan gaskiya.

Bayanai sun nuna cewa babban limamim, wanda malami ne a kungiyar Izala reshen jihar Gombe ya rasu ne bayan fama da rashin lafiya.

An tabbatar da rasuwar Sheikh Saidu Imam

Kara karanta wannan

Zaben 2027: Yadda Tinubu, Atiku da Peter Obi ke fafatawar neman nasara a jihohin Arewa 5

Dan marigayin, Abdulhayyu Sa'id Imam ya tabbatar da rasuwar mahaifin na su a wata gajeruwar sanarwa da ya wallafa a shafinsa na Facebook da safiyar yau Litinin, 19 ga watan Oktoba, 2026.

Ya bayyana cewa za a yi jana'izar malamin da misafin karfe 1:00 na tsakar ranar yau Litinin a masallaci na I da ke Commercial Area a jihar Gombe.

"InnalilLahi Wa Inna Ilaihi Raji'un, Allah Ya yi wa mahaifin mi rasuwa, Sa'idu Imam. Za a yi jana'iza da karfe 1:000 na rana a masallacin Juma'a na daya New Commercial Arewa, Gombe."

Sheikh Pantami ya mika sakon ta'aziyya

Tsohon ministan sadarwa, Farfesa Isa Ali Oantami ya tabbatar da rasuwar malamin, inda ya mika sakon ta'aziyya ga iyalan Sheykh Saidu Imam.

A sakon da ya wallafa a Facebook, Sheikh Pantami ya ce:

"Mun yi babban rashi na ɗaya daga cikin fitattun malamanmu da masu ba mu tarbiyya, Sheikh Saidu Imam, babban limamin Masallacin Juma’a na Shagon Goro da ke Gombe.

"Muna miƙa saƙon ta’aziyyarmu ga iyalansa, musamman Dakta Abubakar Saidu Imam, da sauran ’yan uwansa, ɗalibansa, abokansa, maƙwabtansa da abokan hulɗarsa.

Kara karanta wannan

Ana batun cire sunayen wasu 'yan takara, shugaban jam'iyyar PDP ya yi murabus

Haduwar Pantami da malamin ta karshe

Pantami ya ce Marigayi Sheikh Saidu Imam mutum ne da ya yi fice wajen haɗa kan al’umma, wanzar da zaman lafiya da kuma tawali’u. Ya kasance masani sosai, mai fara’a, mai tsananin tawali’u kuma mai riƙon amana.

Ya ce kimanin makonni uku da suka gabata, ya kai masa ziyara tare da Alhaji Hussaini Ahmad Ganga (Ɗan Amar na Gombe), Alhaji Usman Gurama da Dakta Abubakar Saidu (Dakta Yagi), domin jajanta masa kan rashin lafiyar da yake fama da ita.

Tsohon ministan ya kar da cewa:

"Za mu yi matuƙar kewar zallar muryarsa mai daɗi yayin gabatar da huɗubar sallar Juma’a da kuma wa’azuzzukansa na mako-mako, musamman waɗanda suka shafi ranar Alƙiyama.

"Idanu suna zubar da hawaye, zuciya kuma tana cike da baƙin ciki, amma ba za mu faɗi komai ba sai abin da Ubangijinmu Ya yarda da shi. Hakika, Shaykh Saidu Imam, mun yi babban rashi sakamakon tafiyarka."

Daga karshe Pantami ya roki Allah Ya shigar da shi Aljannatul Firdaus tare da iyayenmu da sauran masoyanmu da suka riga mu gidan gaskiya.

Kara karanta wannan

Kwana ya ƙare: Mawakin addini a Najeriya ya riga mu gidan gaskiya

Malamin Musulunci a Adamawa ya rasu

Kun ji cewa an sanar da rasuwar malamin musulunci, Modibbo Abubakar Bobboi Modibbo Iya Wuro Yombe a jihar Adamawa.

Sanarwar da aka fitar ta ce an gudanar da sallar jana’izarsa a ranar Juma’a, 9 ga Oktoba, 2026, a Masallacin Dodore da ke Yola, da ƙarfe 4:00 na yamma.

Asali: Legit.ng