Gwamnatin Tinubu Ta Kawo Tsarin da 'Yan Najeriya Za Su Sayi Fetur da Arha

• Gwamnatin Tarayya ta sanar da cewa za a sayar da fetur mai rahusa a gidajen mai na NNPC na tsawon kwanaki 30
• Ministan Kuɗi, Taiwo Oyedele ya ce masu motocin jigilar jama’a za su samu fifiko wajen cin gajiyar rangwamen
• Gwamnati ta kuma ce za a samu sabon tsarin farashin sauke fetur wanda za a rika duba shi duk wata

​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Gwamnatin Tarayya ta sanar da cewa ’yan Najeriya za su fara sayen fetur a farashi mai rahusa a gidajen mai na NNPC na tsawon kwanaki 30.

Ministan Kuɗi kuma Mai Kula da Tattalin Arziƙin Ƙasa, Taiwo Oyedele, ne ya bayyana hakan a wani taron manema labarai da aka gudanar a Abuja ranar Alhamis, 8 ga watan Oktoban 2026.

Za a rage farashin fetur na kwanaki 30

Kara karanta wannan

Babban malamin jami'a ya mutu a otel bayan lalata da karuwa

Oyedele ya bayyana cewa za a yi rangwame kan farashin fetur da ake sayarwa a gidajen mai na NNPCL na tsawon kwanaki 30, cewar rahoton jaridar Daily Trust.

Ya ce masu motocin jigilar fasinjoji za su samu fifiko wajen cin gajiyar wannan rangwame.

Ministan ya ce, “Za a yi rangwame kan fetur na NNPC na tsawon kwanaki 30, tare da bai wa masu jigilar jama’a fifiko.”

Za a rika duba farashin duk wata

Oyedele ya kuma bayyana cewa Gwamnatin Tarayya za ta samar da wani sabon tsarin farashin sayo fetur da aka cimma ta hanyar tattaunawa.

A cewarsa, za a rika duba wannan farashi duk wata domin tabbatar da cewa tsarin ya dace da yanayin kasuwar man fetur.

Ministan ya ce gwamnati na ɗaukar ƙarin matakai ne saboda matakan da ake amfani da su a yanzu ba su samu nasarar rage wahalar nauyin da hauhawar farashin fetur da sufuri ke jefa wa jama'a da ’yan kasuwa ba.

Gwamnati na shirin daidaita farashin fetur

A karkashin sabon tsarin da ake shirin amfani da shi wajen daidaita farashin fetur, gwamnati na tattaunawa kan sanya iyakar farashin sayo fetur ko farashin da ake samu kafin a kai shi gidajen mai zuwa N1,350 kan kowace lita.

Kara karanta wannan

Donald Duke: Dan takara ya gama shiri, ya fadi yadda zai dawo da fetur N300

Gwamnatin ta ce za a rika duba wannan iyaka duk wata domin la’akari da sauye-sauyen da ke faruwa a kasuwar mai da kuma canjin kuɗin waje.

N1,350 ba sabon farashin fetur ba ne

Gwamnati ta jaddada cewa shirin sanya iyakar N1,350 ba yana nufin za a rika sayar da litar fetur a N1,350 a gidajen mai ba, jaridar Vanguard ta kawo labarin.

A maimakon haka, matakin na da nufin rage tasirin sauye-sauyen farashin ɗanyen mai a kasuwannin duniya da kuma canjin kuɗin kasashen waje kan farashin fetur a Najeriya.

Oyedele ya ce bai kamata farashin fetur da ake sayarwa ga jama’a ya rika bin duk wani sauyi da ya faru a farashin ɗanyen mai ko canjin kuɗin kasashe waje nan take ba.

“Farashin da ake sayarwa a gidajen mai bai kamata ya rika bin duk wani sauyi a farashin ɗanyen mai a duniya ko canjin kuɗin kasashen waje ba.”

“Gwamnati na tattaunawa kan sanya iyakar N1,350 kan kowace lita a farashin sayo fetur domin taimakawa wajen daidaita farashin da ake sayarwa a gidajen mai.” In ji shi.

Kara karanta wannan

'Yan bindiga sun sace mahaifin dan takarar jam'iyyar ADC

Duke zai mayar da farashin fetur N300

A wani labarin kuma, kun ji cewa ɗan takarar shugaban ƙasa na jam’iyyar Peoples Redemption Party (PRP) a zaɓen 2027, Donald Duke, ya yi maganar rage farashin man fetur.

Dnald Duke wanda tsohon gwamnan Cross Rivers ne ya ce zai rage farashin fetur zuwa kusan N300 kan kowace lita idan aka zaɓe shi.

Asali: Legit.ng