'Yan Bindiga Sun Sace Mahaifin Dan Takarar Jam'iyyar ADC

• An sace Pa Joseph Iduoriyekemwen mai shekaru 90 daga gidansa da ke Amagba, Benin City, da sanyin safiyar Talata
• Lamarin ya jawo damuwa a Edo, yayin da wasu ke zargin cewa satar na iya kasancewa da alaƙar siyasa, amma babu hujjar tabbatar da hakan
• Gwamnatin Edo ta ce jami’an tsaro na aiki tare domin ceto dattijon, tare da yin gargadin kada a danganta lamarin da siyasa ba tare da hujja ba

​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

​Jihar Edo - Wasu da ake zargin ’yan bindiga ne sun yi awon gaba da Pa Joseph Iduoriyekemwen, mai shekaru 90, mahaifin ɗan takarar kujerar Majalisar Dattawa ta Edo ta Kudu na jam'iyyar African Democratic Congress (ADC).

An sace dattijon ne daga gidansa da ke Amagba, Benin City, a cikin sa’o’in farko na safiyar Talata, 6 ga watan Oktoban 2026.

Kara karanta wannan

'Yan ta'adda sun tare babbar hanya a Zamfara, an yi awon gaba da matafiya

Jaridar Leadership ta ce sace dattijon ya jawo damuwa a Edo Lamarin ya jawo damuwa a jihar Edo, musamman bayan wasu mutane sun fara nuna zargin cewa satar dattijon na iya kasancewa da alaƙar siyasa.

Sai dai har zuwa lokacin da aka kammala wannan rahoto, bayanan da suka shafi yadda lamarin ya faru ba su fito fili ba.

Rahotanni sun ce ana ci gaba da ƙoƙarin ganin an kuɓutar da Pa Iduoriyekemwen cikin ƙoshin lafiya.

Gwamnati ta yi tir da satar

Kwamishinan Yaɗa Labarai da Dabarun Sadarwa na Jihar Edo, Hon. Kassim Afegbua, ya yi Allah-wadai da satar, yana mai bayyana ta a matsayin abin da “ya saɓa wa ɗabi’a”.

Sai dai kwamishinan ya yi gargadin kada a danganta lamarin da siyasa ba tare da samun kwararan hujjoji ba.

Afegbua ya ce abin takaici ne yadda wasu mutane suka yi gaggawar zargin gwamnatin jihar da hannu a satar.

Kara karanta wannan

Dan siyasa a Kano ya kira ruwa bayan nuna bindiga a wurin taro

A cewarsa, irin waɗannan zarge-zarge na iya kawo cikas ga ƙoƙarin da gwamnati ke yi wajen yaƙi da rashin tsaro a jihar.

“Me zai sa a sace irin wannan dattijo?”

Kwamishinan ya ce: “Me zai iya zama dalilin da zai sa wani ya sace irin wannan uba da kaka?”

Afegbua ya ƙara da cewa Gwamna Monday Okpebholo ya zuba jari mai yawa wajen inganta kayan aikin tsaro.

Ya ce gwamnan ya kuma umarci hukumomin tsaro da su yi aiki tare domin tabbatar da an kuɓutar da Pa Iduoriyekemwen cikin gaggawa.

An ce an yanke wa masu garkuwa da mutane hukuncin kisa

Kwamishinan ya tunatar da cewa wata kotu ta musamman da aka kafa domin gurfanar da masu aikata laifin garkuwa da mutane a jihar ta yanke wa wasu mutane huɗu hukuncin kisa kwanan nan.

Ya ce sabon lamarin ya zo a matsayin abin damuwa kuma “babban cin fuska” ga ƙoƙarin gwamnatin jihar na dakile ayyukan masu aikata laifuka.

Gwamnati ta nemi bayanan da za su taimaka

Afegbua ya tabbatar da cewa gwamnatin jihar na nan kan matsayinta na tabbatar da Edo ta zama wuri mai tsaro ga dukkan mazauna jihar, ba tare da la’akari da jam’iyyar siyasar da suke goyon baya ba.

Kara karanta wannan

Gwamnatin tarayya ta fitar da bayanai kan jirgin saman sojoji da ya yi hatsari

Ya kuma yi kira ga duk wanda ke da wani bayani da zai taimaka wajen gano inda Pa Iduoriyekemwen yake da ya gaggauta sanar da hukumomin tsaro.

'Yan bindiga sun kai hari a Kaduna

A wani labarin kuma, kun ji cewa 'yan bindiga sun kai hari yankin Estate da ke Millennium City a Ƙaramar Hukumar Chikun ta Jihar Kaduna, inda suka yi garkuwa da mutum huɗu.

Mutanen da aka sace sun haɗa da wata mai juna biyu, wani mutum da matarsa da kuma jaririnsu mai wata shida.

Asali: Legit.ng