'Yan Bindiga Sun Ƙara Yi Wa 'Sojoji' Ɓarna bayan Sun Karɓi Naira Miliyan 10 a Kogi
- Tsohon Manjo a rundunar sojin Najeriya, Joe Ajayi ya mutu a hannun masu garkuwa da mutane bayan an biya kuɗin fansa Naira miliyan 10
- Tun farko ƴan bindiga sun yi garkuwa da Ajayi ne da suka kai farmaki gidansa a garin Odo-Ape, karamar hukumar Kabba-Bunu ta Jihar Kogi
- Majiyoyi sun ce tsohon Manjon ya shiga mawuyacin hali a hannun ƴan bindigar sakamakon rashin lafiyar da yake fama da ita
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Jihar Kogi - Wani tsohon jami’in sojin Najeriya, Manjo Joe Ajayi (Mai ritaya) ya mutu a hannun ƴan bindigar da suka yi garkuwa da shi a jihar Kogi.
Ƴan bindiga sun sace Ajayi ne a gidansa da ke garin Odo-Ape, karamar hukumar Kabba-Bunu ta Jihar Kogi.
Source: Original
Ƴan bindiga sun karɓi kuɗin fansa N10m
Vanguard ta tattaro cewa tsohon Manjo a rundunar sojin Najeriya ya rasa rayuwarsu a hannun masu garkuwa da mutane duk da an biya Naira miliyan 10 don kuɓutar da shi.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
An sace Manjo Ajayi ne da misalin karfe 11:30 na dare, ranar Laraba, 21 ga Mayu, 2025, lokacin masu garkuwan suka kai farmaki gidansa.
Majiyoyi sun ce masu garkuwan sun bukaci kudin fansa har Naira miliyan 50 a farko, sai dai rashin biyan waɗannan kudi ya jefa Ajayi cikin matsala saboda rashin lafiyar da yake fama da ita.
Me ya yi ajalin tsohon Manjo a Kogi?
Masu garkuwan sun sanar da iyalansa cewa za su karɓi karin kudi kafin su amince a kai masa magani, amma hakan ma bai yiwu ba saboda ƴan uwansa ba su da kuɗin.
A karshe, bayan sun fahimci cewa ba zai iya rayuwa ba, sai suka rage bukatar kudin fansa zuwa ₦10m, abin da iyalinsa suka gaggauta biya da fatan cewa yana raye.
Sai dai bayan biyan kudin, maimakon a tarar da shi a wurin da ƴan bindigar suka yi wa iyalansa kwatance, sai aka tarar da gawarsa.
A halin yanzun an kai gawar tsohon sojan ɗakin ajiyar gawarwaki na Asibitin Kabba a jihar Kogi.
Source: Twitter
Wane mataki ƴan sanda suka ɗauka?
Rundunar ‘Yan Sandan Jihar Kogi ta tabbatar da rasuwar Manjo Joe Ajayi mai ritaya, a hannun masu garkuwa da shi duk da biyan kudin fansa N10m.
SP Williams Ovye-Aya, mai magana da yawun rundunar, ne ya tabbatar da hakan ga manema labarai a ranar Litinin a Lokoja, rahoton Punch.
Ya kuma ƙara da cewa rundunar ba za ta yi ƙasa a guiwa ba wajen ganowa da cafke waɗanda suka aikata wannan ɗanyen aiki tare da gurfanar da su a kotu.
Ƴan bindiga sun kuma kai hari a Kogi
A wani labarin, kun ji cewa ƴan bindiga sun sake kai kazamin hari yankin ƙaramar hukumar Yagba ta Yamma a jihar Kogi.
Bayanai sun nuna cewa ƴan bindigan sun sace mutane huɗu a ranar Talata a garin Okoloke, da ke ƙaramar hukumar Yagba ta Yamma a jihar.
Rahotanni sun nuna cewa a safiyar ranar Laraba, mutane da dama sun fara barin garin sakamakon tsananin hare-haren da ake yawan kai musu.
Wanda ya tantance Muhammad Malumfashi, babban edita a Legit.ng.
Asali: Legit.ng
