Wata Sabuwa: Ministan Tsaron Isra'ila Ya Dura Masallaci na 3 Mafi Daraja a wurin Musulmai

• Ofishin Ministan Tsaron Cikin Gida na Isra’ila, Itamar Ben-Gvir, ya fitar da wani bidiyo da ke nuna shi yana shiga harabar Masallacin Al-Aqsa
• An ga dan siyasar masu tsattsauran ra’ayi ne karkashin rakiyar ‘yan sandan Isra’ila yayin bikin Sukkot na Yahudawa, inda aka ce ya gudanar da wasu ibadun addini
• Ma’aikatar kula da harkokin addini ta Falasdinawa ta ce irin wadannan ayyuka na neman ruruta yakin addini a yankin baki daya

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Isra'ila - Ministan Tsaron Cikin Gida na Isra’ila, Itamar Ben-Gvir, ya fitar da wani bidiyo da ke nuna shi yana shiga harabar Masallacin Al-Aqsa, masallaci mai daraja ta uku a wurin musulmai.

Bidiyon ya nuna dan siyasar masu tsattsauran ra’ayi karkashin kariyar ‘yan sandan Isra’ila yayin bikin Sukkot na Yahudawa. Rahotanni sun ce ya gudanar da wasu ibadun addini a wurin.

Kara karanta wannan

Gwamnatin Bola Tinubu za ta ci bashin biliyoyin daloli a bankin duniya

Tashar Al-Jazeera ta ruwaito cewa karkashin yarjejeniyar “status quo” da Isra’ila ta amince da ita tun 1967, gwamnatin Isra’ila ta bar hukumar Waqf da Jordan ta naɗa, ta ci gaba da gudanar da harkokin yau da kullum a msallacin.

Haka zalika, yarjejeniyar ta kuma tanadi cewa Musulmi ne kadai za su yi ibada a wannan wurin.

Ministan Isra'il shiga harabar Al-Aqsa

Jaridar Guardian ta ruwaito cewa Itamar Ben-Gvir, ya bi sahun dubban Yahudawan masu tsattsauran ra’ayi da suka kutsa cikin wurin ibada mafi muhimmanci da ake takaddama a kansa a Kudus.

‘Yan sandan dauke da makamai sun yi musu rakiya, inda suka yi addu’a, suka daga tutar Isra’ila tare da rera taken kasar a wani abin da ya nuna karfin siyasa cikin tsokana.

A karkashin wata yarjejeniyar “status quo”, an haramta wa wadanda ba Musulmi ba yin addu’a a wurin, wanda Musulmi ke kira harabar Al-Haram Al-Sharif, yayin da Yahudawa ke kiransa Dutsen Haikalin.

Kara karanta wannan

Trump ya kawo babbar matsala bayan Iran ta mika tayin buɗe Hormuz ga Amurka

Ben-Gvir ya raunana wannan yarjejeniya a shekarun baya ta hanyar kai jerin ziyara masu tayar da hankali zuwa haraba masallacin Al-Aqsa, da kuma yin sauye-sauye.

Falasdinawa sun yi Allah wadai da lamarin

A cikin wata sanarwa, Ma’aikatar Kula da Harkokin Addini ta Falasdinawa ta ce:

“Wadannan ayyuka na tsokana, wadanda suke fitowa daga manyan jami’an siyasar gwamnatin mamaya, suna neman ruruta yakin addini a duk fadin yankin.”

A ranar Alhamis, Isra’ilawa sun gudanar da addu’o’i a wasu sassan harabar da ke kusa da Masallacin Al-Aqsa da kuma Dome of the Rock, wani wurin ibada da aka gina a karni na bakwai.

Yan adawa sun taso Firaministan Isra'ila

Kun ji cewa ’yan adawar Isra’ila sun nemi Benjamin Netanyahu ya bar mulki bayan rahoton cewa shugaban UAE ya gargade shi kan shirin Hamas kafin harin 7 ga Oktoba.

Gadi Eisenkot, tsohon kwamandan sojin Isra’ila kuma ɗaya daga cikin manyan abokan hamayyar Netanyahu a zaɓen da za a gudanar ranar 27 ga Oktoba, ya zargi firaministan da gujewa ɗaukar alhakin gazawarsa.

Asali: Legit.ng