Bayan Nasarar Isa Ali Pantami, PDP Ta Kori Manyan Masu Masa Adawa 2 a Gombe

• Jam'iyyar PDP mai adawa reshen jihar Gombe ta dakatar da wasu jiga-jiganta biyu kwana ɗaya bayan nasarar Isa Ali Pantami
• Jam’iyyar ta ce wasu matakan mutanen biyu sun saɓa wa kundinta, musamman bayan wani daga ciki ya bayyana kansa a matsayin wanda ya lashe zaɓen fidda gwani
• PDP ta miƙa batun ga Kwamitin Ladabtarwa domin bincike da ɗaukar matakan da suka dace kan abubuwan da suka jawo dakatarwar

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Pantami, Gombe - Jam’iyyar PDP ta reshen Jihar Gombe ta dakatar da Hon. Khamisu Ahmed Mailantarki da Hon. Usman Aliyu Garry.

Wannan mataki ya biyo bayan zarginsu da aikata abubuwan da suka saɓa wa manufofin jam’iyyar.

Kara karanta wannan

'Babbar masifar da Arewa za ta fuskanta idan Atiku ko Obi suka lashe zaɓen 2027'

Hakan na cikin wata sanarwa da kakakin jam'iyyar, Abdulkadir Ahmed Dukku ya fitar da aka wallafa a Facebook a yau Laraba 30 ga watan Satumbar shekarar 2026.

An dakatar da Mailantarki, Garry daga PDP

Matakin ya biyo bayan wani taron gaggawa da shugabannin PDP na jihar suka gudanar tare da shugabannin jam’iyyar na mazabun Dawaki da Herwagana, inda ’yan takarar biyu suke da alaƙa.

PDP ta ce duk da amincewar Mailantarki da Garry na shiga zaɓen fidda gwamnan jam’iyyar, wasu ayyukansu sun zama rashin da’a tare da karya tanadin kundin jam’iyya.

Shugabannin jam’iyyar sun nuna damuwa kan kalaman Mailantarki bayan zaɓen fidda gwani da aka gudanar ranar 29 ga Satumba, inda ya ce shi ne ya yi nasara.

A cewar PDP, irin waɗannan matakai na iya haifar da rashin fahimta da rarrabuwar kawuna tsakanin mambobinta, lamarin da ya sa aka ɗauki matakin dakatar da ’yan takarar.

Kara karanta wannan

2027: Rarara ya sake fitowa da maganganu masu zafi kan 'yan Arewa da Tinubu

Saboda haka, jam’iyyar ta dakatar da Mailantarki da Garry na tsawon wata guda tare da tura batunsu gaban Kwamitin Ladabtarwa domin ci gaba da bincike da ɗaukar matakin da ya dace.

Gombe: Yadda aka zaben fitar da gwani

Wannan mataki ya biyo bayan sake zaben fitar da gwani da aka gudanar a Gombe a jiya Talata 29 ga watan Satumbar shekarar 2026.

Sakamakon zaben ya tabbatar da tsohon ministan sadarwa, Farfesa Isa Ali Pantami a matsayin wanda ya lashe zaben fitar da gwani da PDP ta gudanar.

Duk da haka, Mailantarki da Garry sun kalubalaci zaben inda suka ce bai kamata Pantami ya shiga cikin wadanda za a yi zaben fitar da gwani da shi ba.

Mailantarki ya ayyana kansa ɗan takara

A baya, mun ba ku labarin cewa Khamisu Ahmed Mailantarki ya ce shi ne ya lashe zaɓen fitar a gwamnan PDP a Gombe, duk da cewa kwamitin zaɓen ya ayyana Isa Pantami a matsayin wanda ya yi nasara.

Kara karanta wannan

PDP ta sanar da sakamakon zaben fitar da gwani a Gombe, Pantami ya san makomarsa

Mailantarki ya yi zargin cewa Pantami bai kamata ya shiga zaɓen ba, yana mai dogaro da abin da ya ce shi ne hukuncin Kotun Ƙoli kan cancantarsa.

Ya ce a shirye yake ya garzaya kotu, har zuwa Kotun Ƙoli, domin neman tabbatar da abin da ya kira nasararsa a zaɓen fitar da gwani.

Asali: Legit.ng