Tirkashi: An Yanke Wa Mutumin da Ya Kashe Abokinsa kan Tashi Sallar Asubah Hukunci a Kano

• An yanke wa Ayuba Sani Tumfafi hukuncin daurin shekaru 10 a gidan gyaran hali bisa kashe abokinsa, Ibrahim Dan Larai
• Saɓanin da ya haddasa mutuwar marigayin ya samo asali ne daga gardama kan tashi domin yin sallar Asuba
• Kotu ta kuma umarci wanda aka yanke wa hukuncin da ya yi karatun addinin Musulunci da na zamani yayin zaman gidan yari

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Kano, Nigeria - Wata Babbar Kotun Jihar Kano ta yanke wa Ayuba Sani Tumfafi hukuncin daurin shekaru 10 a gidan gyaran hali bayan ta same shi da laifin kashe abokinsa, Ibrahim Dan Larai, ba bisa ƙa’ida ba.

Hukuncin ya biyo bayan wani saɓani da ya ɓarke tsakanin Ayuba da marigayin kan tashi domin yin sallar Asuba, wanda daga baya ya kai ga mutuwar Ibrahim.

Kara karanta wannan

Tinubu zai fara karɓar harajin 25% daga kuɗaɗen shigan ƴan Najeriya?

Daily Trust ta ruwaito cewa mai shari’a Dije Abdu Aboki ce ta jagoranci shari’ar a Babbar Kotun Jihar Kano mai lamba ɗaya, inda ta yanke hukuncin bayan sauraron shaidun da ɓangarorin biyu suka gabatar a gaban kotun.

Yadda saɓani ya faru tsakanin abokai

Bayanan da aka gabatar yayin shari’ar sun nuna cewa saɓani ya shiga tsakanin Ayuba da abokinsa, Ibrahim Dan Larai, kan batun tashi da sassafe domin yin sallar Asuba.

Rashin jituwa da ya biyo bayan wannan batu ya kai ga faruwar lamarin da ya yi sanadin mutuwar Ibrahim.

Sai dai bayanan da aka bayar game da shari’ar ba su yi cikakken bayani kan yadda rikicin ya rikide zuwa kisan ba ko kuma ainihin matakan da suka kai ga mutuwar marigayin.

Bayan faruwar lamarin, an gurfanar da Ayuba a gaban kotu domin ya amsa zargin da ake masa na kashe abokinsa ba bisa ƙa’ida ba.

Shaidun da aka gabatar a kotu

Kara karanta wannan

Yari: Idan Buhari ya gaza magance matsalar tsaron Najeriya, me ku ke tunani daga Tinubu?

A yayin shari’ar, lauyar masu gabatar da ƙara, Amina Uba Adamu, ta gabatar da shaidu uku da kuma wasu hujjoji guda uku domin tallafa wa ƙarar da ake yi wa wanda ake zargi.

A nasa ɓangaren, Ayyka ya kare kansa kan zargin da aka gabatar a kansa. Kotun ta saurari bayanan da ɓangarorin biyu suka gabatar kafin ta yanke hukunci kan lamarin.

Bayan nazarin shari’ar, kotun ta same shi da laifin kisan kai ba bisa ƙa’ida ba, sannan ta yanke masa hukuncin daurin shekaru 10 a gidan gyaran hali.

Umarnin yin karatu a kurkuku

Baya ga hukuncin daurin, kotun ta umarci Ayuba da ya yi karatun addinin Musulunci da kuma na zamani a lokacin da yake zaman gidan gyaran hali.

Wannan umarni na daga cikin hukuncin da kotun ta yanke bayan ta same shi da laifi. Ba a bayar da ƙarin bayani kan ko wanda aka yanke wa hukuncin zai ɗaukaka ƙara ba.

An fara shari'ar kisan Dan Shagamu

Kun ji cewa Kotun Shari’a ta Kofar Kudu ta bayar da umarnin tsare mutane uku kan zargin haɗa baki wajen kashe Ibrahim Khalil Dan Shagamu.

Ana zargin mutanen sun shiga gidan fitaccen mai sharhi kan harkokin siyasa da ke Kumbotso a Kano da daddare tare da yanke masa maƙogaro.

Asali: Legit.ng