'Yan Bindiga Sun Barke da Kazamin Fada, an Hallaka Babban Jagora a Zamfara

• Rahotanni sun ce mayakan da ke biyayya ga Aleru sun kashe Kachallah Dogo Baldu a gabashin Mada, jihar Zamfara
• Ana zargin arangamar ta yi sanadin mutuwar wasu mayakan Dogo Baldu, yayin da faɗan ke ci gaba da kamari
• Har yanzu ba a iya samun tabbaci daga wajen hukumomi ba kan fadan da ya barke tsakanin kungiyoyin 'yan bindigan masu gaba da juna

​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Zamfara - Sababbin rahotanni daga jihar Zamfara sun nuna cewa mayakan da ke biyayya ga fitaccen jagoran ’yan bindiga, Aleru, sun kashe wani jagoran ’yan bindiga da ake kira Kachallah Dogo Baldu.

Rahotannin sun ce an kashe Dogo Baldu ne yayin arangama tsakanin ƙungiyoyin ’yan bindiga masu hamayya da juna a gabashin Mada.

Masani kan harkokin tsaro a yankin Tafkin Chadi da Arewacin Najeriya, Zagazola Makama, ya bayyana hakan a shafinsa na X ranar Lahadi, 18 ha watan Oktoban 2026.

Kara karanta wannan

Yan Majalisa 8 da suka bar APC sun canza shawara bayan haɗuwa da Shugaba Tinubu

An kashe wasu mayakan yayin arangamar

Majiyoyi daga yankin sun bayyana cewa an kashe Dogo Baldu ne a yayin kazamin faɗan, wanda ya kuma yi sanadiyyar mutuwar wasu daga cikin mayakansa.

Rahotannin sun nuna cewa arangamar na ci gaba da gudana a lokacin da aka haɗa wannan rahoto, lamarin da ya haifar da fargabar cewa za a iya samun ƙarin asarar rayuka.

Ana ci gaba da sa ido kan yadda rikicin zai kasance, yayin da ƙungiyoyin biyu ke fafatawa da juna.

Rikicin ƙungiyoyin ’yan bindiga a Zamfara

Ana ganin wannan faɗa na da alaƙa da hamayya da ke ci gaba tsakanin ƙungiyoyin masu ɗauke da makamai a wasu sassan jihar Zamfara.

Ƙungiyoyin masu aikata laifuka sun sha fafatawa da juna kan tasiri da kuma iko da yankunan da suke gudanar da ayyukansu.

Sai dai, har zuwa lokacin kammala wannan rahoto, ba a iya tabbatar da mutuwar Dogo Baldu ko cikakken adadin waɗanda suka mutu a arangamar ba ta hanyar bincike mai zaman kansa.

Kara karanta wannan

'Yan ta'addan ISWAP sun hallaka sojojin Najeriya a wani yanayi mara dadi a Borno

Rikice-rikice tsakanin kungiyoyin 'yan bindiga ba sabon abu ba ne a jihar Zamfara wadda ta dade tana fama da matsalar rashin tsaro.

Barkewar fada a tsakanin kungiyoyin dai na jawo asarar rayukan mayaka da dama tare da masu jagorantarsu.

Karanta wasu karin labaran kan 'yan bindiga

• Nuhu Ribadu ya jero abubuwa 4 da suka hana magance matsalar 'yan bindiga a Najeriya
• Yan bindiga da ke guduwa zuwa Zamfara sun tsaya a hanya, sun yi barna a Niger
• 'Yan bindiga na barazanar kashe mata da mijin da suka sace, Atiku ya yi magana

An kashe hatsabibin dan bindiga a Katsina

A wani labarin kuma, kun ji cewa an samu bayanan da ke nuna cewa an kashe wani da ake zargi da jagorantar ’yan bindiga a jihar Katsina da ke yankin Arewa maso Yamma na Najeriya.

Majiyoyi sun tabbatar da kisan hatsabibin dan bindigan mai suna Wakiyu, yayin arangama tsakanin jami’an tsaro a Katsina.

Majiyar ta yi zargin cewa Wakiyu na da alaƙa da ƙungiyar fitaccen jagoran ’yan bindiga, Kachalla Maha wanda ya daɗe yana addabar mazauna yankin Matazu da ke Katsina da yankunan da ke kewaye.

Asali: Legit.ng