Ana Jimamin Hatsarin Sojoji, Fasinja Ya Mutu a Jirgin da Ke kan Hanyar zuwa Legas

• Wani fasinja ya mutu a jirgin Kenya Airways daga birnin Nairobi zuwa Legas yayin da ake cikin tafiya
• Jami’in NCAA ya ce fasinjan ya yi ta hayaniya, ya yi yunƙurin shiga ɗakin matukin jirgi tare da ƙoƙarin buɗe ƙofar bayan jirgin
• ’Yan sanda sun karɓi bincike kan lamarin, tare da tabbatar da cewa an kai gawar fasinjan ɗakin ajiyar gawa domin ci gaba da bincike

​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Jihar Legas - Wani fasinja da ke kan hanyar zuwa Legas a jirgin Kenya Airways daga Nairobi ya mutu jim kaɗan bayan wani lamari mai tayar da hankali da ya faru a cikin jirgin.

Hukumar Kula da Sufurin Jiragen Sama ta Najeriya (NCAA) ta tabbatar da cewa rundunar ’yan sanda ta karɓi binciken domin gano abin da ya haddasa mutuwar fasinjan.

Kara karanta wannan

Amurka da Saudiyya sun turo muhimmin saƙo zuwa Najeriya kan hatsarin jirgin sojojin sama

Fasinja ya mutu kafin saukar jirgi

A cewar rahoton jaridar The Punch, lamarin ya faru ne a daren Talata, 6 ga watan Oktoban 2026 lokacin da jirgin Kenya Airways da ya taso daga Nairobi ke gab da sauka a filin jirgin Murtala Muhammed da ke Legas.

Jirgin ya kasance kusan mintuna 20 kafin sauka lokacin da fasinjan, wanda har yanzu ba a bayyana sunansa ba, ya zama marar numfashi.

Kamfanin Kenya Airways ya ce matsalar lafiya ta fara ne da misalin ƙarfe 9:20 na dare, yayin da jirgin ya isa filin jirgin Murtala Muhammed da ƙarfe 9:41 na dare.

Kamfanin ya ce ma’aikatan jirgin sun gaggauta ba fasinjan agajin farko tare da bin hanyoyin da aka tanada domin tunkarar irin wannan yanayi.

Bayan jirgin ya sauka, jami’an lafiya sun shiga jirgin domin duba fasinjan, inda suka tabbatar da cewa ya mutu.

An ce fasinjan ya yi yunƙurin shiga ɗakin matukin jirgi

Kara karanta wannan

'Yan ta'adda sun tare babbar hanya a Zamfara, an yi awon gaba da matafiya

Daraktan Hulɗa da Jama’a da Kare Haƙƙin Masu Amfani na NCAA, Michael Achimugu, ya ce manajan Kenya Airways na Najeriya ya yi masa bayani kan lamarin a safiyar Laraba, 7 ga watan Oktoban 2026.

Achimugu ya ce fasinjan an ɗauko shi ne daga Madagascar, bayan jami’an kwastam sun hana shi shiga ƙasar a baya.

Ya bayyana cewa, kasancewar Kenya Airways ne ya shigo da fasinjan cikin ƙasar, kamfanin ne ake sa ran zai mayar da shi.

Sai dai Achimugu ya ce fasinjan ya fara nuna rashin nutsuwa da tashin hankali a cikin jirgin, TheCable ta kawo rahoton.

A cewarsa, fasinjan ya yi yunƙurin shiga ɗakin matukin jirgin, sannan daga baya ya yi ƙoƙarin buɗe ƙofar bayan jirgin.

An ɗaure hannun fasinjan a lokacin tafiya

Achimugu ya ce ma’aikatan jirgin sun ɗaure hannayen fasinjan a bayansa domin hana shi ci gaba da tayar da hankali da kuma kare lafiyar sauran mutanen da ke cikin jirgin.

Ya ce daga bisani aka kawo fasinjan Najeriya, amma bayan isowarsa ne aka tabbatar da cewa ya mutu.

Jami’in NCAA ya ce ba ya son yin wani hasashe da zai iya kawo cikas ga binciken ’yan sanda, domin tuni rundunar ta karɓi lamarin.

Kara karanta wannan

Dan siyasa a Kano ya kira ruwa bayan nuna bindiga a wurin taro

’Yan sanda sun fara bincike

Kakakin rundunar ’yan sandan filin jirgin sama, Muhammed Adeola, ya tabbatar da faruwar lamarin.

Ya ce an kai gawar mamacin ɗakin ajiyar gawa domin ci gaba da bincike kan musabbabin mutuwarsa.

Adeola ya ƙara da cewa ’yan sanda sun riga sun karɓi bayanan ma’aikatan jirgin da suka haɗa da kyaftin ɗin jirgin.

Ana sa ran binciken zai fayyace abubuwan da suka faru a cikin jirgin, musamman abin da ya faru kafin fasinjan ya mutu.

Mutane sun mutu a hatsarin jirgi

A wani labarin kuma, kun ji cewa an tabbatar da mutuwar sama da mutane 30 a hatsarin jirgin ruwa da ya auku a jihar Benue.

Jirgin ruwan na gargajiya wadda aka hada da katako ya kife ne yankin mashigar Buruku da ke kogin Katsina-Ala, a Karamar Hukumar Buruku ta jihar Benue.

Asali: Legit.ng