Iyalan Sojoji da Dukkan Dakarun da ke cikin Jirgin Sojin da Ya Yi Hadari Sun Mutu

• Akalla mutane 32, ciki har da iyalan jami’an soja da ma’aikatan jirgin sama, sun rasu bayan jirgin NAF ATR-42 ya yi hatsari a Igbokoda
• Jirgin ya dauki sojoji da iyalansu, ciki har da wasu yara da ke kan hanyarsu ta komawa makaranta, kafin ya fada cikin fadama
• An bayyana cewa hadarin ya faru ne yayin da jirgin ke gudanar da wata tafiyar aiki daga Benin zuwa Legas da rana a ranar Litinin

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Jihar Delta – Akalla mutane 32 ne suka mutu bayan wani jirgin saman Sojojin Sama na Najeriya (NAF) kirar ATR-42 ya yi hatsari a yankin Igbokoda, hedikwatar karamar hukumar Ilaje ta jihar Ondo.

Jirgin ya fadi ne a wani wuri mai fadama da ke kusa da sansanin sojin ruwa na Igbokoda a ranar Litinin, 5 ga Oktoba, 2026.

Kara karanta wannan

Gwamna ya shiga aikin da ba nasa ba, ya fadi abubuwa 3 da suka jawo hatsarin jirgin sojoji

Iyalan sojoji sun rasu a jirgin sama

Vanguard ta wallafa cewa majiyoyi sun bayyana cewa jirgin na dauke da jami’an sama, sojoji da iyalan wasu jami’an soja.

An ce wasu daga cikin iyalan sun hada da yara da ke komawa makaranta, da kuma wasu ’yan uwa da suka je ziyartar masu daukar nauyin iyalansu da ke aiki a jihohin Edo da Delta.

Rahotanni sun ce jirgin na gudanar da wata tafiyar jigilar kayayyaki da alaka da ayyukan NAF zuwa Legas, inda ake bai wa iyalan jami’an soja damar yin amfani da jirgin wajen tafiya.

Ministan Sufurin Jiragen Sama, Festus Keyamo, ya tabbatar da cewa jirgin na dauke da fasinjoji 25 da ma’aikatan jirgi bakwai, jimillar mutane 32.

Bayanin ’yan sanda game da hatsarin

Shugaban karamar hukumar Ilaje, Maurice Oripelaye, ya tabbatar da faruwar hatsarin, inda ya ce an gano kayayyakin soji a wurin da jirgin ya fadi.

Kara karanta wannan

Halin da ake ciki a Ondo bayan mummunan hatsarin jirgin sama da ya kashe mutane

Da yake magana ta hannun babban sakataren yada labaransa, Taiwo Sadare, Oripelaye ya ce bayanan da suka samu sun nuna cewa yanayin rashin kyawun yanayi na iya kasancewa cikin abubuwan da suka shafi hatsarin.

Ya ce jirgin ya yi kokarin sauya hanya ne kafin ya fada cikin wani wuri mai fadama kusa da ruwa, a bayan sansanin sojin ruwa.

Kakakin rundunar ’yan sandan jihar Ondo, DSP Jimoh Abayomi, shi ma ya tabbatar da faruwar lamarin, yana mai kira ga jama’a da su kwantar da hankalinsu tare da kauce wa yada bayanan da ba a tabbatar da su ba.

'Babu wanda ya tsira'

Sarkin Igbokoda, Oba Afolabi Odidiomo, ya ce da farko ya damu matuka saboda bai san ko jirgin fasinja ne ko kuma helikwafta ba.

Ya ce hadarin ya faru ne yayin da ake ruwa, kuma jirgin ya fada cikin kogi da wani wuri mai fadama wanda ya cika da ruwa.

A cewarsa, jirgin bai kama da wuta ba, amma wani babban bangare nasa ya nutse cikin ruwa.

Sarkin ya ce bisa bayanan da ya samu da binciken da aka gudanar a wurin, babu wani mutum da ya tsira daga cikin jirgin.

Kara karanta wannan

Hadarin jirgin sojoji: Za a yi kwana 3 ana zaman makoki a fadin Najeriya

Wani rahoto da Reuters ta wallafa ma ya nuna cewa dukkan mutanen da ke cikin jirgin sun rigamu gidan gaskiya.

Za a yi zaman makoki

A wani labarin, kun ji cewa shugaba Bola Tinubu ya ayyana kwanaki uku na zaman makoki na kasa domin tunawa da wadanda suka mutu a hadarin.

Ya kuma bayar da umarnin sauke tutocin Najeriya zuwa kasa a fadin kasar domin nuna girmamawa ga wadanda suka rasu.

Tinubu ya umarci NAF da ta gudanar da cikakken bincike kan musabbabin hadarin domin kauce wa sake faruwar irin wannan lamarin.

Asali: Legit.ng