Masarautar Zazzau Ta Yi Rashi: Allah ya Yiwa Uwar Gidan Sarki Shehu Idris Rasuwa
- Allah ya yi wa Hajiya Habiba Shehu Idris rasuwa, uwar gidar marigayi Shehu Idris, sarkin masarautar Zazzau na 18
- An ruwaito cewa Hajiya Habiba ta rasu ne a safiyar Juma'a, 30 ga watan Agustan 2024 bayan fama da 'yar gajeruwar jinya
- Masarautar Zazzau ta yi karin haske kan lokacin jana'izar Hajiya Habiba, suruka ga Sarkin Zazzau, Ahmed Nuhu Bamalli
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida
Zariya, Kaduna - Rahoton da muka samu yanzu na nuni da cewa Allah ya yi wa Hajiya Habiba Shehu Idris rasuwa a ranar Juma'a, 30 ga watan Agustan 2024.
Hajiya Habiba ta kasance uwar gidar sarkin Zazzau na 18 daga tsatson Fulani, marigayi Alhaji Shehu Idris.
Asali: Twitter
Masarautar Zazzau ta rasa Habiba Shehu Idris
Masarautar Zazzau ce ta sanar da rasuwar Hajiya Habiba a shafinta na X a safiyar Juma'a.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Masarautar ta ce uwar gidar marigayi Dakta Shehu Idris ta rasu ne bayan ta yi fama da 'yar gajeruwar rashin lafiya.
Sarkin Zazzau ya yi rashin suruka
Sanarwar ta bayyana cewa marigayiya Hajiya Habiba ita ce mahaifiya ga Danruwata Babban Zazau, Alhaji Bello Shehu Idris.
Sauran manyan 'ya'yanta sun hada da Dan Isan Zazzau, Alhaji Umar Shehu Idris.
A cikin 'ya 'yan nata akwai Gimbiya Maryam Shehu Idris, matar sarkin Zazzau, Malam Ahmed Nuhu Bamalli, da sauransu.
An shirya jana'izar Hajiya
Kadan daga abin da sanarwar ta kunsa na cewa:
"Cikin mika lamura ga Allah, muna masu sanar da ku rasuwar Hajiya Habiba Shehu Idris a safiyar yau bayan ta yi fama da gajeruwar jinya.
"Marigayiya Hajiya Habiba ita ce uwar gidan marigayi mai martaba sarkin Zazzau, Dakta Shehu Idris.
"Za a sanar da jama'a lokacin da za a gudanar da jana'izar Hajiya Habiba nan ba da jimawa ba."
Masarautar ta yi addu'ar Allah ya ji kan mai dakin marigayi sarkin Zazzau.
Sarkin Zazzau ya kwanta dama
A wani labarin a can baya, mun ruwaito cewa Allah ya yi wa sarkin Zazzau, Dakta Shehu Idris rasuwa yana da shekaru 84 a duniya.
An ce marigayi Sarki Shehu Idris ya rasu ne a asibitin 44 da ke Kaduna wajajen karfe 11 na safiyar Lahadi, 20 ga watan Satumban 2020.
Muhammad Malumfashi, babban edita a sashen Hausa na Legit ya duba labarin.
Asali: Legit.ng
