"Mun Ci Karfinsu": Gwamna Ya Bugi Kirji Kan Markaɗe Ƴan Ta'adda a Katsina

• Gwamnan jihar Katsina, Dikko Umaru Radda ya bugi kirji kan nasarorin da gwamnatinsa ta samu kan ta'addanci a jihar
• Radda ya ce gwamnatinsa ta rage ta'addanci da 70% wurin amfani da dabarun yaki da kuma hadin guiwar jami'an tsaro daban-daban
• Gwamnan ya bukaci kirkirar ƴan sandan jihohi inda ya ce hakan zai taimaka wurin yaki da ta'addanci da ake fama da shi

Abdullahi Abubakar, Editan Legit Hausa ne a bangaren siyasa, kasuwanci da al'amuran yau da kullum ne, ya na da gogewar aikin jarida sama da shekaru uku.

Jihar Katsina - Gwamna Dikko Umar Radda na jihar Katsina ya ce sun ci galaba kan ta'addanci a jihar.

Gwamnan ya ce akalla ya dakile matsalar tsaron jihar da 70% a cikin shekara daya da ya yi a kan karagar mulki.

Kara karanta wannan

Kwara: Sun fadi gaskiya bayan cafke likita da wasu da zargin satar mahaifa da cibiyar jariri

Katsina: Yadda aka murƙushe ƴan ta'addanci

Radda ya bayyana haka ne a yau Asabar 18 ga watan Mayu yayin hira da ƴan jaridu a birnin Yola na jihar Adamawa, cewar rahoton Vanguard.

Dikko ya ce nasarar bata rasa nasaba da hadin kan jami'an tsaron gwamnati da kuma yan banga wurin tabbatar da dakile matsalar tsaro a jihar, cewar The Guardian.

Dabarun yaki da ake bi a Katsina

"Lokaci ya yi da ya kamata a kirkiri yan sandan jihohi domin ci gaba da yakar ta'addanci a Arewacin Najeriya."

"Mun yi nasarar dakile ta'addanci da 60% zuwa 70% saboda irin matakan da muke ɗauka ganin yadda suka sauya taku."

"Maharan yanzu sun fusata inda suke zuwa ƙauyuka suna hallaka mutane da kuma kona su, mun samo dabarun yakarsu."

- Dikko Umaru Radda

Wannan martani na gwamnan na zuwa ne yayin da ƴan bindiga suka addabi jihar musamman a yankunan karkara.

Kara karanta wannan

Rivers: Gwamna ya kuma ɗaga yatsa ga Wike, ya bugi kirji kan jikkata abokan gaba

Ƴan bindiga sun hallaka sojoji a Katsina

A wani labarin, wasu yan bindiga sun kai farmaki kan sansanin sojoji a jihar Katsina inda suka hallaka akalla dakaru guda biyar.

Lamarin ya faru ne a kauyen Yar Malamai da ke karamar hukumar Faskari a jihar a makon da ya gabata kamar yadda rundunar sojoji ta tabbatar.

Yayin harin, sojoji da dama sun jikkata inda suka tsere daga sansanin bayan farmakin bazata da aka kawo musu.

Asali: Legit.ng