Jerin Jihohi 10 na Najeriya da Ke da Yawan Basussukan Waje a Wuyansu

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Ofishin kula da basussukan Najeriya (DMO) ya bayyana jimillar basussukan waje na jihohi 36 da babban birnin tarayya Abuja.

A bayanan da DMO ya fitar basussukan waje da aka biyo jihihon ƙasar nan da birnin tarayya Abuja, ya kai dala biliyan 4.61 a ranar 31 ga watan Disamba, 2023.

Wannan ya nuna cewa an samu ƙari daga kan dala biliyan 4.46 da aka samu a shekarar 2022.

A cikin shekara guda, bashin waje na jihohi 36 da babban birnin tarayya Abuja ya ƙaru da kusan kaso 3.36% ko kuma dala miliyan 150.

Kara karanta wannan

'Yan bindiga sun kai kazamin farmaki kan bayin Allah a watan azumi, sun kashe mutane da yawa

Jaridar Nairametrics ta jero jihohi 10 na Najeriya da suka fi yawan bashin ƙasashen waje a kansu.

Jihohi masu bashin waje mafi yawa

Ga jerinsu nan ƙasa:

1. Jihar Legas

Jihar Legas na kan gaba cikin jerin jihohin Najeriya da ke da yawan basussuka a kansu.

Bashin waje da ake bin jihar ya kai dala biliyan 1.24 a shekarar 2023. Sai dai, wannan adadin bai kai bashin dala biliyan 1.25 da jihar ta ciyo ba a shekarar 2022.

An samu wannan ragin ne saboda dogaro da ƙarin bashin cikin gida wanda ya kai kimanin naira tiriliyan 1.05, ƙididdigar DMO ta tabbatar.

2. Jihar Kaduna

Jihar Kaduna na da bashin waje a kanta na dala miliyan 587.07 a shekarar 2023, wanda ya haura daga dala miliyan 573.74 a shekarar 2022.

3. Jihar Edo

Basussukan waje na jihar Edo sun haura zuwa dala miliyan 314.45 a shekarar 2023 daga dala miliyan 261.15 a shekarar 2022.

Kara karanta wannan

'Yan bindiga sun ƙara shiga Abuja, sun tafka mummunar ɓarna a watan azumi

4. Jihar Cross River

Basussukan wajen jihar Kuros Ribas sun ƙaru zuwa dala miliyan 211.13 a shekarar 2023 daga dala miliyan 209.53 a shekarar 2022.

5. Jihar Bauchi

Da bashin wajen dala miliyan 187.63 a shekarar 2023, jihar Bauchi ta samu ƙari daga dala miliyan 165.78 a shekarar 2022.

Ƙaruwar basussukan na nuna buƙatar ƙara samar da hanyoyin samun kuɗaden shiga.

6. Jihar Ogun

Adadin bashin waje da ke kan Jihar Ogun da ke makwabtaka da Legas ya kai dala miliyan 168.83 a shekarar 2023, inda ya ƙaru daga dala miliyan 136.26 a shekarar 2022.

7. Jihar Ekiti

Basussukan waje da ake bin jihar Ekiti ya ƙaru sosai cikin ɗan ƙanƙanin lokaci. A shekarar 2022 bashin waje da aka biyo jihar ya kai dala miliyan 105.59, sai dai wannan adadin ya ƙaru zuwa dala miliyan 121.05 a cikin shekarar 2023.

8. Jihar Enugu

Jihar Enugu ta samu raguwar basussukan waje da aka biyo ta. Basussukan sun ragu daga dala miliyan 120.86 a shekarar 2022 zuwa dala miliyan 120.45 a shekarar 2023.

Kara karanta wannan

Jerin ƙasashen Afirka 12 da tarin basussuka ya masu katutu kuma ya zama barazana

9. Jihar Kano

Basusukan waje da ake bin jihar Kano ya ƙaru zuwa dala miliyan 107.92 a shekarar 2023, sama da dala miliyan 100.67 a shekarar 2022. Hakan ya nuna an samu ƙaruwar kaso 7.2%.

10. Jihar Anambra

Jihar Anambra ita ce ta zo ta 10 a cikin jerin jihohin da basussukan waje da aka biyo su ke da yawa.

A shekarar 2023 bashin waje da aka biyo jihar ya kai dala miliyan 107.24, wanda hakan ke nuna samun ƙari daga dala miliyan 103.82 a shekarar 2022.

Bashin waje na Najeriya ya ƙaru

A wani labarin kuma, kun ji cewa bashin da ƙasashen Faransa, China, Indiya, Jamus da Japan ke bin Najeriya ya ƙaru sosai.

Ƙididdigar da ofishin kula da basussukan Najeriya (DMO) ya fitar ta nuna aƙalla ƙasashen biyar na bin Najeriya dala biliyan 5.

Asali: Legit.ng