Shugaba Tinubu Ya Tsige Shugaban NASENI, Ya Nada Wani Mai Shekara 32
- Shugabancin Dr. Bashir Gwandu a hukumar NASENI ya zo karshe daga Satumban nan na 2023
- Bola Ahmed Tinubu ya dauko Khalil Suleiman Halilu a matsayin sabon shugaban hukumar kasar
- Ajuri Ngelale ya fitar da sanarwar nada ‘dan shekara 32 da haihuwa da yawun shugaban kasa
Bola Ahmed Tinubu ya sallami Dr. Bashir Gwandu daga kujerar da ya ke kai ta babban shugaban hukumar nan ta NASENI.
Mai taimakawa shugaban Najeriya wajen yada labarai da hulda da jama’a, Ajuri Ngelale, ya sanar da haka a yammacin Juma’a.
Ajuri Ngelale ya ce wanda zai maye gurbin Gwandu a NASENI shi ne Khalil Suleiman Halilu.
Asali: UGC
Gwamnatin tarayya ta kafa wannan hukumar ne domin kula da kimiyya a bangaren samar da abubuwan more rayuwa a Najeriya.
DUBA: Bibiyemu a Instagram don samun labarai masu muhimmanci kai tsaye cikin manhajar
Khalil Suleiman Halilu
Kamar yadda jawabi ya fito daga fadar shugaban Najeriya dazu, Khalil Suleiman Halilu zai yi shekara biyar a kan mukamin.
Kamar yadda dokokin NASENI na 2014 su ka yi tanadi, sabon shugaban zai iya zarcewa kan kujerar bayan wa’adin farko ya kare.
Da wannan nadin mukami da aka fitar a ranar 1 ga Satumban 2023, wa’adin Khalil Halilu mai shekara 32 zai kare ne a 2028.
Cif Ngelale ya ce ana sa ran sabon shugaban hukumar ya yi amfani da kwarewarsa wajen kawo cigaba a hukumar tarayyar.
Matashi ya samu shiga
Makonni bayan nada ministoci, da wannan umarni na shugaban kasa, nadin mukamin ya fara aiki ba tare da bata lokaci ba.
Watakila Mista Khalil shi ne mai mafi karancin shekaru a wadanda Bola Ahmed Tinubu ya ba mukami bayan hawansa kan mulki.
Tasirin cire tallafin fetur
Dazu nan rahoto cewa kamfanin mai na NNPC ya bayyana asarar da ya tafka bayan cire tallafin man fetur da aka yi a Mayun 2023.
NNPC ya ce an samu raguwar amfani da man fetur a Najeriya da 30%. Hakan ya nuna mutane da-dama sun fara hakura da shan mai.
Asali: Legit.ng
